NEET Counselling 2021 Postponed: నీట్ కౌన్సిలింగ్ వాయిదా.. 'ఈడబ్ల్యూఎస్‌'పై కేంద్రం పునరాలోచన!

ఈడబ్ల్యూఎస్‌పై ప్రభుత్వం పునరాలోచిస్తుందని.. తదుపరి నిర్ణయం తీసుకునేవరకు నీట్ కౌన్సిలింగ్‌ను వాయిదా వేస్తామని సుప్రీం కోర్టుకు కేంద్రం వెల్లడించింది.

నీట్ కౌన్సిలింగ్ వాయిదా

నీట్ కౌన్సిలింగ్‌ వాయిదా పడినట్లు తెలుస్తోంది. నీట్​ వైద్యవిద్య ప్రవేశాల్లో రిజర్వేషన్ల విషయంలో వార్షిక ఆదాయం రూ.8 లక్షలు, అంతకన్నా తక్కువగా ఉన్న వారిని ఆర్థికంగా వెనకబడిన తరగతుల(ఈడబ్ల్యూఎస్​) వారిగా పరిగణించడంపై పునరాలోచిస్తామని సుప్రీంకోర్టుకు కేంద్రం గురువారం తెలిపింది. ఇందుకోసం నాలుగు వారాల సమయం కోరింది.

జస్టిస్​ డీవై చంద్రచూడ్​, జస్టిస్ సూర్యకాంత్​, జస్టిస్​ విక్రమ్​నాథ్​తో కూడిన ధర్మాసనానికి సొలిసిటర్ జనరల్ తుషార్ మెహతా ఈ మేరకు  తెలిపారు. ఈడబ్ల్యూఎస్‌పై కేంద్రం నిర్ణయం తీసుకునేవరకు కౌన్సిలింగ్‌ జరిగే అవకాశం లేదని సొలిసిటర్ జనరల్ తుషార్ మెహతా.. సుప్రీం ధర్మాసనానికి స్పష్టం చేశారు. నాలుగు వారాల్లో ఈ విషయంపై నిర్ణయం తీసుకుంటామన్నారు. వాదనలు విన్న అనంతరం కేసు విచారణను జనవరి 6కు వాయిదా వేసింది సుప్రీం కోర్టు.

నీట్​ వైద్యవిద్య ప్రవేశాల్లో రిజర్వేషన్ల అంశంపై వివరణ ఇవ్వాలని కేంద్రం, మెడికల్ కౌన్సెలింగ్ కమిటీని సుప్రీం కోర్టు ఇటీవల ఆదేశించింది. అఖిల భారత కోటాలోకి వచ్చే సీట్లలో వెనుకబడిన తరగతులకు(ఓబీసీలు) 27 శాతం రిజర్వేషన్లు, ఆర్థికంగా వెనకబడిన తరగతులు(ఈడబ్ల్యూఎస్​) వారికి 10 శాతం రిజర్వేషన్లు కల్పిస్తూ.. జులై 29న కేంద్రం తీసుకున్న నిర్ణయానికి వ్యతిరేకంగా దాఖలైన పిటిషన్లపై విచారణ జరిపింది సుప్రీం కోర్టు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి