Ganza Milk Shake: రూటు మార్చిన గంజాయి స్మగర్లు - ఇప్పుడు మిల్క్ షేక్స్ రూపంలో!

Hyderabad News: గంజాయి స్మగ్లర్లు రోజురోజుకూ కొత్త దారుల్లో అక్రమ రవాణా సాగిస్తున్నారు. తాజాగా, పౌడర్ రూపంలో గంజాయి విక్రయిస్తుండగా ఓ వ్యక్తిని పోలీసులు అదుపులోకి తీసుకున్నారు.

గంజాయి పౌడర్ విక్రయిస్తున్నట్లు గుర్తించిన పోలీసులు

Ganza Milkshakes In Hyderabad: గంజాయి, డ్రగ్స్, మాదక ద్రవ్యాలపై పోలీసులు ఉక్కుపాదం మోపుతున్నా.. రాష్ట్రంలో ఎక్కడో ఒక చోట వీటి ఆనవాళ్లు బయటపడుతూనే ఉన్నాయి. స్మగ్లర్లు కొత్త దారుల్లో వీటిని సరఫరా చేస్తున్నారు. ఇటీవల కొన్ని చోట్ల చాక్లెట్ల రూపంలో గంజాయిని గుర్తించగా.. ఇప్పుడు పౌడర్ రూపంలో దొరకడం కలకలం రేపుతోంది. అంతేకాకుండా గంజాయితో చేసిన మిల్క్ షేక్ ల రూపంలో మార్కెట్లో అమ్మడం ఆందోళన కలిగిస్తోంది. అంతే కాకుండా గంజాయి పొడిని పాలల్లో సైతం కలుపుకొని తాగుతున్న విషయం వెలుగులోకి వచ్చింది. పోలీసులు తెలపిన వివరాల ప్రకారం.. హైదరాబాద్ జగద్గిరిగుట్ట పోలీస్ స్టేషన్ పరిధిలోని ఓ కిరాణా దుకాణంలో గంజాయి పొడిని పోలీసులు స్వాధీనం చేసుకున్నారు. దీనిని పాలల్లో కలుపుకొని మిల్క్ షేక్స్ రూపంలో తాగుతున్నారని సదరు షాప్ ఓనర్ చెప్పడంతో పోలీసులు షాక్ అయ్యారు. ఇలా తాగడం వల్ల ఆరోగ్యానికి ఎంతో మేలని యువతను తప్పుదోవ పట్టించగా.. దుకాణం యజమాని మాటలు విని మిల్క్ షేక్ తాగిన వారు ఏకంగా 7 గంటలు మత్తులో ఉన్నట్లు పోలీసులు తెలిపారు. సైబరాబాద్ స్పెషల్ ఆపరేషన్ టీం.. దుకాణంపై దాడి చేసి యజమానిని అదుపులోకి తీసుకున్నారు. అతని వద్ద నుంచి 4 కేజీల గంజాయి, అలాగే 160 ప్యాకెట్ల గంజాయి చాక్లెట్లు స్వాధీనం చేసుకున్నారు. వీటిని సరఫరా చేసిన ప్రధాన నిందితుడు పరారీలో ఉన్నట్లు తెలుస్తోంది. పోలీసులు దీనిపై మరింత విచారణ చేస్తున్నారు.