Viral Crime: ఐఫోన్, రీల్స్ కోసం హత్యలు కూడా చేస్తున్న పిల్లలు - ఇలాంటి ఘోరాలు ఇంకెన్నిచూడాలో ?
iPhone Murder: రీల్స్ మంచి క్వాలిటీగా తీయాలని ఐ ఫోన్ దొంగతనం చేయాలనుకున్నారు . ఇందు కోసం ఐ ఫోన్ ఉన్న వ్యక్తిని చంపేశారు ఇద్దరు పిల్లలు.
2 Minors Slit Man Throat to Steal iPhone: సోషల్ మీడియా ప్రభావంతో చాలా మంది పిల్లలు దారి తప్పి ఘోరమైన నేరాలకు పాల్పడుతున్నారు. హత్యలు కూడా చేస్తున్నారు. క్వాలిటీ రీల్స్ తీసుకోవడానికి తమకు ఓ ఐ ఫోన్ కావాలనుకున్న ఇద్దరు పిల్లలు.. అలాంటి ఫోన్ వాడుతున్నయువకుడ్ని అత్యంత ఘోరంగా గొంతు కోసి హత్య చేశారు. ఆ ఫోన్ చోరీ చేశారు. ఈ ఘటన యూపీలో జరిగింది.
ఉత్తరప్రదేశ్లోని బహ్రైచ్ జిల్లాలోని నగరౌర్ గ్రామంలో షాదాబ్ 19 ఏళ్ల యువకుడు దారుణ హత్యకు గురయ్యాడు. అతని ఫోన్ చోరీ కి గురయింది. ఫోన్ ట్రేస్ చేసి.. ఆ ఫోన్ ఎక్కడ ఉందో పోలీసులుకనిపెట్టారు. దాంతో హత్య కేసు చిక్కుముడి కూడా వీడిపోయింది. కానీ ఆ నేరం చేసిన వారిని.. వారు ఎందుకు ఆ నేరం చేశారో తెలుసుకుని పోలీసులు కూడా షాక్కు గురయ్యారు.
19 ఏళ్ల షాదాబ్ ను హత్య చేసింది 14 , 16 సంవత్సరాల వయస్సు ఉన్న ఇద్దరు బాలురు. ఇద్దరు మైనర్లు షాదాబ్ గొంతు కోసి హత్య చేసి, అతని తలను రాయితో నలిపి అతని ఐఫోన్ను దొంగిలించారు. ఎందుకంటే మరిన్ని లైక్ల కోసం "అధిక-నాణ్యత రీల్స్" చేసేందుకు.
బెంగళూరులో నివసించిన బాధితుడు షాదాబ్ (19), తన మామ వివాహం కోసం బహ్రైచ్లోని తన పూర్వీకుల గ్రామం నాగౌర్కు వచ్చాడు.అయితే అతను హటాత్తుగా కనిపించకుండా పోయాడు. షాదాబ్ జూన్ 21న తప్పిపోయినట్లు బంధువులు పోలీసులకు ఫిర్యాదు చేశారు. ఆ తర్వాత రోజు గ్రామం వెలుపల ఉన్న జామ తోటలో శిథిలావస్థలో ఉన్న గొట్టపు బావి సమీపంలో అతని మృతదేహం కనిపించింది. షాదాబ్ గొంతును కత్తితో కోసి, అతని తలపై రాయితో కొట్టి చంపేశారు.
పెద్దగా కష్టపడకుండా నిందితుల్ని పోలీసులు అరెస్టు చేశారు. వారిద్దరూ మైనర్లు. విచారణ సమయంలో బాలురు యువకులు నేరాన్ని అంగీకరించారు. మెరుగైన రీల్స్ తయారు చేయడానికి తమకు అధిక నాణ్యత గల మొబైల్ ఫోన్ అవసరమని చెప్పారు. వారు నాలుగు రోజుల ముందు హత్యను ప్లాన్ చేసినట్లు అంగీకరించారు. షాదాబ్ వద్ద ఐ ఫోన్ ఉండటంతో లక్ష్యంగా చేసుకున్నారని పోలీసులు గుర్తించారు.
సంఘటన జరిగిన రాత్రి, వారు రీల్స్ తయారు చేద్దామని చెప్పి షాదాబ్ను గ్రామం వెలుపల ఉన్న నిర్మానుష్య ప్రాంతానికి తీసుకెళ్లారు. అక్కడ, వారు అతనిపై దాడి చేసి, అతని గొంతు కోసి చంపారు. పోలీసులు షాదాబ్ ఐఫోన్, హత్యకు ఉపయోగించిన కత్తిని స్వాధీనం చేసుకున్నారు. ఇద్దరు మైనర్ నిందితులు , వారి కుటుంబ సభ్యులతో సహా నలుగురు వ్యక్తులపై భారతీయ న్యాయ సంహిత (BNS) సెక్షన్లు 103(1) (హత్య) మరియు 238 (సాక్ష్యాలను దాచడం) కింద కేసు నమోదు చేశారు.
మృతదేహాన్ని కనుగొన్న తర్వాత మైనర్లు , వారి కుటుంబ సభ్యులు మొదట్లో ఇళ్ల నుండి పారిపోయినప్పటికీ వెంటనే వారి ఆచూకీ ట్రేస్ చేసి అరెస్టు చేశారు. ఆయుధాన్ని దాచడానికి సహాయం చేశాడని నిందితుడి బంధువులలో ఒకరిని శుక్రవారం అరెస్టు చేసి జైలుకు పంపారు.
టాప్ హెడ్ లైన్స్
ట్రెండింగ్ వార్తలు
