కియా సైరోస్ రియల్ వరల్డ్ మైలేజ్ టెస్ట్ - మాన్యువల్‌ది పైచేయా? DCT గెలిచిందా?
కియా సైరోస్ 1.0 టర్బో పెట్రోల్ MT & DCT వేరియంట్‌ల రియల్ వరల్డ్ మైలేజ్ కంపారిజన్‌ వివరాలు ఇవి. సిటీ, హైవే, సగటు మైలేజ్, ధరలు & ఏ వేరియంట్ ఎక్కువ ఇంధన పొదుపు చేస్తుందో తెలుసుకోండి.
Kia Syros real world mileage: కియా సైరోస్, ప్రస్తుతం భారత మార్కెట్‌లో సోనెట్ & సెల్టోస్ మధ్య స్థానంలో ఉన్న కాంపాక్ట్ SUVగా మంచి గుర్తింపు పొందుతోంది. ఈ మోడల్‌లో 1.0 లీటర్ టర్బో పెట్రోల్ & 1.5 లీటర్ డీజిల్ ఇంజిన్ ఆప్షన్లు ఉన్నాయి. ఇందులో 1.0 లీటర్ టర్బో పెట్రోల్ ఇంజిన్‌ను 6-స్పీడ్ మాన్యువల్ (MT) లేదా 7-స్పీడ్ DCT గేర్‌బాక్స్‌తో కొనుగోలు చేసే అవకాశం ఉంది. కంపెనీ ప్రకటించిన మైలేజ్ గణాంకాలు పేపర్‌పై కనిపిస్తున్నప్పటికీ, వాస్తవ వినియోగంలో ఏ వేరియంట్ ఎక్కువ ఇంధన పొదుపు చేస్తుందనేది చాలా మందికి ఉన్న సందేహం. తాజాగా నిర్వహించిన రియల్ వరల్డ్ పరీక్షల్లో ఆసక్తికరమైన ఫలితాలు వెల్లడయ్యాయి.
కియా సైరోస్‌లోని 998cc సామర్థ్యం గల 3 సిలిండర్ టర్బో పెట్రోల్ ఇంజిన్ రెండు గేర్‌బాక్స్‌లలోనూ ఒకే విధమైన పనితీరును అందిస్తుంది. ఈ ఇంజిన్ గరిష్టంగా 120hp పవర్ & 172Nm టార్క్‌ను ఉత్పత్తి చేస్తుంది. రెండు వేరియంట్‌లలోనూ 45 లీటర్ల ఫ్యూయల్ ట్యాంక్ అందుబాటులో ఉంది. తేడా కేవలం గేర్‌బాక్స్‌లో మాత్రమే ఉంటుంది. ఒకదానిలో 6-స్పీడ్ మాన్యువల్ ఉండగా, మరొకదానిలో 7-స్పీడ్ DCT ఆటోమేటిక్ గేర్‌బాక్స్‌ను అందిస్తున్నారు.
కంపెనీ ప్రకటించిన ARAI మైలేజ్ ప్రకారం మాన్యువల్ వేరియంట్ లీటర్‌కు 18.2 కి.మీ. ఇస్తుంది. DCT వేరియంట్ మైలేజ్ లీటర్‌కు 17.68 కి.మీ. ఇస్తుంది. అంటే అధికారిక గణాంకాల్లో కూడా మాన్యువల్ స్వల్ప ఆధిక్యాన్ని కనబరుస్తోంది.
ఇది కూడా చదవండి: హైడ్రోజన్‌తో నడిచే రైలు మాదిరిగానే కార్లు, బస్‌లు, టూవీలర్స్‌ వస్తాయా? సీఎన్జీతో పోల్చుకుంటే వ్యత్యాసం ఏంటీ?
రియల్ వరల్డ్ మైలేజ్ టెస్ట్
కార్ ఎక్స్‌పర్ట్‌లు వాస్తవంగా రోడ్లపై నిర్వహించిన పరీక్షల్లో కూడా మాన్యువల్ వేరియంట్‌దే పైచేయిగా తేలింది. నగర ప్రయాణాల్లో కియా సైరోస్ టర్బో MT లీటర్‌కు 9.10 కి.మీ. మైలేజ్ నమోదు చేసింది. అదే DCT వేరియంట్ లీటర్‌కు 8.30 కి.మీ. మాత్రమే ఇచ్చింది. అంటే సిటీలో మాన్యువల్ వేరియంట్ దాదాపు 0.81 కి.మీ ఎక్కువ మైలేజ్ అందించింది.
హైవే ప్రయాణాల్లో కూడా ఇదే పరిస్థితి కనిపించింది. మాన్యువల్ వేరియంట్ లీటర్‌కు 12.60 కి.మీ. మైలేజ్ నమోదు చేయగా, DCT వేరియంట్ 11.50 కి.మీ. మాత్రమే ఇచ్చింది. ఇక్కడ కూడా మాన్యువల్‌కు 1.10 కి.మీ. ఆధిక్యంలో ఉంది.
సగటు మైలేజ్‌ను పరిశీలిస్తే, కియా సైరోస్ టర్బో MT లీటర్‌కు 10.85 కి.మీ. మైలేజ్ అందించింది. DCT వేరియంట్ మాత్రం 9.90 కి.మీ. మాత్రమే నమోదు చేసింది. మొత్తం మీద మాన్యువల్ వేరియంట్ దాదాపు 0.95 కి.మీ ఎక్కువ ఇంధన సామర్థ్యాన్ని ప్రదర్శించింది. ఎక్కువ దూరం ప్రయాణించే వారికి ఈ తేడా దీర్ఘకాలంలో ఇంధన ఖర్చును తగ్గించే అవకాశం ఉంది.
ఇది కూడా చదవండి: 169 km రేంజ్‌తో వచ్చిన యమహా EC-06 ఈ-స్కూటర్‌ - పెర్ఫార్మెన్స్‌ టెస్ట్‌లో ఏం తెలిసిందంటే?
ధరలు
కియా సైరోస్ 1.0 టర్బో MT ఎక్స్ షోరూమ్ ధర రూ.8.42 లక్షల నుంచి రూ.12.02 లక్షల వరకు ఉంది. 1.0 టర్బో DCT ధరలు రూ.11.96 లక్షల నుంచి రూ.15 లక్షల వరకు ఉన్నాయి. ఆసక్తికరమైన విషయం ఏమిటంటే, టాప్ ఎండ్ మాన్యువల్ వేరియంట్ ధర ఎంట్రీ లెవల్ DCT వేరియంట్ కంటే కేవలం రూ.6,000 మాత్రమే ఎక్కువగా ఉంది.
ఈ మైలేజ్ పరీక్షలను సాధారణ వినియోగానికి దగ్గరగా ఉండే పరిస్థితుల్లో నిర్వహించారు. పరీక్ష ప్రారంభానికి ముందు వాహనాల ఫ్యూయల్ ట్యాంక్‌ను పూర్తిగా నింపారు. తయారీ సంస్థ సూచించిన టైర్ ప్రెజర్‌ను పాటించారు. నగరం & హైవేలో నిర్ణయించిన మార్గాల్లో ఒకే డ్రైవర్‌తో పాటు AC, ఆడియో సిస్టమ్ & అవసరమైన ఇతర ఎలక్ట్రికల్ ఫీచర్లను సాధారణ యూజర్ల మాదిరిగానే ఉపయోగించారు. పరీక్ష పూర్తయిన తర్వాత మళ్లీ ట్యాంక్‌ను పూర్తి స్థాయిలో నింపి వాస్తవ మైలేజ్‌ను లెక్కించారు.
మొత్తంగా చూస్తే, గేర్ మార్పుల్లో సౌలభ్యం & ట్రాఫిక్‌లో సులభమైన డ్రైవింగ్ కోరుకునే వారికి DCT మంచి ఎంపిక. అయితే తక్కువ ఇంధన ఖర్చు, మెరుగైన మైలేజ్ & తక్కువ ప్రారంభ ధర కోరుకునే వారికి కియా సైరోస్ 1.0 టర్బో మాన్యువల్ వేరియంట్ మరింత ప్రయోజనకరమైన ఎంపికగా కనిపిస్తోంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
