Tata Sierra: భారత్ ఎన్క్యాప్ టెస్టులో 5-స్టార్ రేటింగ్తో అదరగొట్టిన ఎస్యూవీ!
భారత్ ఎన్క్యాప్ క్రాష్ టెస్టులో టాటా సియెర్రా 5-స్టార్ సేఫ్టీ రేటింగ్ సాధించి అత్యంత సురక్షితమైన ఎస్యూవీగా రికార్డు సృష్టించింది.
టాటా మోటార్స్ గత నవంబర్లో రూ. 11.49 లక్షల (ఎక్స్-షోరూమ్) ప్రారంభ ధరతో మార్కెట్లోకి తీసుకువచ్చిన 'సియెర్రా' ఇప్పుడు మరో ఘనతను సొంతం చేసుకుంది. లాంచ్ సమయంలోనే కటింగ్ ఎడ్జ్ సేఫ్టీ ఫీచర్లతో వచ్చిన ఈ కారు, తాజాగా భారత్ ఎన్క్యాప్ (Bharat NCAP) నిర్వహించిన క్రాష్ టెస్టుల్లో ఫుల్ 5-స్టార్ రేటింగ్ సాధించింది. కేవలం ఇంటర్నల్ టెస్టుల్లోనే కాకుండా, అధికారిక పరీక్షల్లో కూడా ఈ ఎస్యూవీ అత్యుత్తమ ప్రదర్శన కనబరిచి కస్టమర్ల నమ్మకాన్ని రెట్టింపు చేసిందని విశ్లేషకులు పేర్కొంటున్నారు.
అడల్ట్ ఆక్యుపేషన్ ప్రొటెక్షన్ (AOP) వివరాలు
రక్షణ విషయంలో సియెర్రా అద్భుతమైన స్కోరు సాధించింది. మొత్తం 32 పాయింట్లకు గానూ 31.14 పాయింట్లు సాధించి 5-స్టార్ రేటింగ్ పొందింది. ఫ్రంటల్ ఆఫ్సెట్ టెస్టులో డ్రైవర్ తల, తొడ భాగాలకు 'గుడ్' రేటింగ్ లభించింది. ఛాతి, మోకాళ్ల రక్షణకు 'అడెక్వేట్' (తగినంత) రేటింగ్ దక్కింది. కో-డ్రైవర్ విషయానికి వస్తే, కుడి మోకాలు మినహా మిగిలిన అన్ని శరీర భాగాలకు 'గుడ్' సేఫ్టీ రేటింగ్ లభించడం విశేషం. సైడ్ ఇంపాక్ట్ టెస్ట్, సైడ్ పోల్ ఇంపాక్ట్ టెస్టుల్లో కూడా ఈ కారు ప్రయాణీకులకు అత్యున్నత స్థాయి రక్షణ ఇస్తుందని నిరూపితమైంది.
చైల్డ్ ఆక్యుపేషన్ ప్రొటెక్షన్ (COP) స్కోరు
పిల్లల భద్రత విభాగంలో కూడా సియెర్రా 5-స్టార్ రేటింగ్ కైవసం చేసుకుంది. మొత్తం 49 పాయింట్లకు గానూ 44.73 పాయింట్లు సాధించింది. డైనమిక్ టెస్టుల్లో 24 పాయింట్లకు 23.73 పాయింట్లు, సీఆర్ఎస్ (CRS) ఇన్స్టాలేషన్ టెస్టుల్లో 12 కి 12 పాయింట్లు సాధించడం ద్వారా చిన్న పిల్లలకు ఇది అత్యంత సురక్షితమైన వాహనమని తేలింది. వెహికల్ అసెస్మెంట్ స్కోరు 13 కి 9 గా నమోదైంది.
సేఫ్టీ ఫీచర్లు ..
టాటా కార్లు అంటేనే సేఫ్టీకి కేరాఫ్ అడ్రస్ అనడంలో ఎలాంటి సందేహం లేదు. సియెర్రాలో లెవల్ 2 అడాస్ (ADAS), 7 ఎయిర్ బ్యాగ్లు, బ్లైండ్ స్పాట్ మానిటర్తో కూడిన 360-డిగ్రీ కెమెరా వంటి హైటెక్ ఫీచర్లు ఉన్నాయి. ఫ్రంట్, రియర్ పార్కింగ్ సెన్సార్లు, ఆటో-హోల్డ్తో కూడిన ఎలక్ట్రానిక్ పార్కింగ్ బ్రేక్, హిల్ హోల్డ్ అసిస్ట్, టైర్ ప్రెజర్ మానిటరింగ్ సిస్టమ్, ఎలక్ట్రానిక్ స్టెబిలిటీ కంట్రోల్ ప్రయాణాన్ని మరింత సేఫ్ గా మారుస్తాయి.
ప్రస్తుతం సియెర్రా ధర వేరియంట్ ను బట్టి రూ. 11.49 లక్షల నుండి రూ. 21.29 లక్షల (ఎక్స్-షోరూమ్) మధ్యలో ఉంది. మార్కెట్లో ఇది హ్యుందాయ్ క్రెటా, రేనాల్ట్ డస్టర్, కియా సెల్టోస్, మారుతి గ్రాండ్ విటారా, హోండా ఎలివేట్ వంటి పాపులర్ మోడళ్లకు గట్టి పోటీ ఇస్తోంది. తాజా 5-స్టార్ రేటింగ్తో సియెర్రా తన విభాగంలో మోస్ట్ సేఫెస్ట్ ఎస్యూవీగా నిలిచింది.
టాప్ హెడ్ లైన్స్
ట్రెండింగ్ వార్తలు
