Vizianagaram: విజయనగరం జిల్లాలో కరోనా కలకలం... కొత్తవలస పాఠశాలలో 19 మంది విద్యార్థులు, ఒక టీచర్ కు పాజిటివ్

విజయనగరం జిల్లాలో కరోనా కలకలం రేగింది. కొత్త వలస జడ్పీ పాఠశాలలో 19 మంది విద్యార్థులు, ఒక టీచర్ కు కరోనా పాజిటివ్ వచ్చింది.

కొత్త వలస పాఠశాలలో విద్యార్థులకు కరోనా(ప్రతీకాత్మక చిత్రం)

దేశంలో ఒమిక్రాన్ భయాందోళనలు పెరుగుతున్నాయి. కొత్త వేరియంట్ కేసులు పెరుగుతున్నాయి. రాష్ట్రాల్లో కోవిడ్ కేసులు మళ్లీ పెరుగుతున్నాయి. దీంతో రాష్ట్రాలు ఆంక్షలు విధిస్తున్నాయి. ఏపీలో కోవిడ్ కేసులు పెరుగుతున్నాయి. తాజాగా విజయనగరం జిల్లాలో కరోనా కలకలం రేగింది. ఒకే పాఠశాలలో ఉపాధ్యాయుడితో పాటు 19 మంది విద్యార్థులకు కరోనా సోకింది. దీంతో తల్లిదండ్రులు ఆందోళన చెందుతున్నారు. విజయనగరం జిల్లాలోని కొత్తవలస జడ్పీ ఉన్నత పాఠశాలలో 60 మందికి కోవిడ్ నిర్థారణ పరీక్షలు చేశారు. ఒక ఉపాధ్యాయుడు, 19 మంది విద్యార్థులకు కరోనా పాజిటివ్‌గా వచ్చింది. దీంతో పాఠశాలకు రెండ్రోజుల పాటు సెలవులు ప్రకటించారు.

కొత్త వేరియంట్ కలవరం

ఓ వైపు ఒమిక్రాన్, మరోవైపు కరోనా కేసులు ప్రపంచంపై దండయాత్ర చేస్తుంటే తాజాగా మరొక కొత్త వేరియంట్ బయటపడింది. అవును.. ఒమిక్రాన్ కంటే వేగంగా ఇది సోకుతున్నట్లు తేలింది. ఈ కొత్త మ్యుటేషన్ పేరు ఐహెచ్‌యూ (బీ.1.640.2). ఫ్రాన్స్‌లోని ఐహెచ్‌యూ మెడిటరనీ ఇన్‌ఫెకన్‌కు చెందిన శాస్త్రవేత్తలు ఈ కొత్త మ్యుటేషన్‌ను గుర్తించారు. ఆ సంస్థ పేరునే వేరియంట్‌కు పెట్టారు. ఒమిక్రాన్ కన్నా ఐహెచ్‌యూకు మ్యూటేషన్లు ఎక్కువగా ఉండటం ఆందోళన కలిగిస్తోంది. ప్రస్తుతం ఫ్రాన్స్‌లోని మార్సెయ్ అనే సిటీలో 12 కేసులను నిర్ధారించారు. వీరంతా ఆఫ్రికా కామెరూన్ నుంచి వచ్చినట్లు తేలింది. ఈ వేరియంట్ లో 46 మ్యుటేషన్లు ఉన్నట్లు.. దీంతో ఒమిక్రాన్ కన్నా వేగంగా ఇది సోకుతోందని శాస్త్రవేత్తలు చెబుతున్నారు. వ్యాక్సిన్లకు కూడా అది లొంగడం లేదని అంటున్నారు. కొత్త వేరియంట్ ముప్పు గణనీయంగా పెరుగుతోందని ఆందోళన వ్యక్తం చేస్తున్నారు. ప్రస్తుతానికి ఈ కొత్త వేరియంట్ వేరే దేశాల్లో లేదని డబ్ల్యూహెచ్ఓ చెబుతోంది. దీనిని 'వేరియంట్ అండర్ ఇన్వెస్టిగేషన్' జాబితాలో ప్రపంచ ఆరోగ్య సంస్థ చేర్చింది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి