Rushikonda : రుషికొండ బీచ్‌కు వెళ్లాలంటే రూ. 20 కట్టాల్సిందే - పార్కింగ్ అదనం !
రుషికొండ బీచ్‌లో ప్రభుత్వం ఎంట్రీ ఫీజు విధించింది. రూ. 20 కడితేనే అనుమతిస్తారు.
Rushikonda : వైజాగ్ లో ఉండే వారికైనా... వైజాగ్ వెళ్లే వారికైనా రుషికొండ బీచ్ అనేది మంచి టూరిస్ట్ స్పాట్. బీచ్ లోకి వెళ్లడానికి ఎలాంటి ఖర్చూ ఉండదు. అందుకే హాయిగా వెళ్లి సముద్ర తీరాన్ని ఎంజాయ్ చేసి వస్తారు. అలసిపోయిన వారు సేద తీరుతారు. అయితే ఇక నుంచి రుషికొండ బీచ్‌కు వెల్లాలంటే టిక్కెట్ కొనాల్సిందే . లేకపోతే అడుగు పెట్టనీయరు. టిక్కెట్ ధరను రూ. ఇరవైగా నిర్ణయించారు. ఓ కుటుంబం బీచ్ కు వెళ్లాలంటే వంద వదిలించుకోవాల్సిందేనన్నమాట.
రుషికొండ బీచ్‌లో తొలి సారి ఫీజు పద్దతిని ప్రవేశ పెట్టిన ప్రభుత్వం
సాగర తీర నగరమైన విశాఖలో ఇప్పటివరకు ఇలా ఎక్కడా బీచ్‌లలో టిక్కెట్లు పెట్టలేదు. ఆర్‌కే బీచ్‌వద్ద గానీ, భీమిలి బీచ్‌లో గానీ ఎక్కడా రుసుములు వసూలు చేయడం లేదు. రుషికొండ, తొట్లకొండ, అప్పికొండ ఎక్కడా ఇలాంటి నిబంధనలు లేవు. కానీ ప్రభుత్వం కొత్తగా ఈ నిర్ణయం తీసుకుంది. రుషికొండను కేంద్ర ప్రభుత్వం ‘బ్లూ ఫ్లాగ్‌ బీచ్’గా గుర్తించడంతో అక్కడ కొన్ని నిబంధనలు అమలు చేయాల్సి ఉంది. పరిశుభ్రమైన, సురక్షితమైన నీరు, టాయిలెట్లు, స్నానాల గదులు, పిల్లలు ఆడుకోవడానికి ఏర్పాట్లు చేశారు.
నిర్వహణ ఖర్చుల కోసం డబ్బులను సందర్శకుల దగ్గర్నుంచే వసూలు చేయాలని నిర్ణయం
ఈ బీచ్‌ను పరిశుభ్రంగా ఉంచడానికి క్లీనర్లు, సెక్యూరిటీ, లైఫ్‌ గార్డులు అంతా కలిసి 39 మంది పనిచేస్తున్నారు. వారికి నెలకు రూ.6 లక్షల వ్యయం అవుతోంది. ప్రభుత్వం ఈ బీచ్‌కు ఎటువంటి నిధులు ఇవ్వడం లేదు. అందుకని పార్కింగ్ ఫీజు, టాయిలెట్‌, స్నానాల గదుల వద్ద ఫీజులు వసూలు చేస్తున్నారు. ఇవి సరిపోవడం లేదని ఇతర రాష్ట్రాల్లో బ్లూఫాగ్‌ బీచ్‌లను పరిశీలించారు. అక్కడ ప్రవేశ రుసుము వసూలు చేస్తున్నారని .. ఇక్కడ కూడా అలాగే చేయాలని నిర్ణయించారు. ఈ నెల 11వ తేదీ నుంచి ఈ బీచ్‌కు వచ్చే వారి నుంచి రూ.20 టిక్కెట్ వసూలు చేస్తామని ప్రకటించారు.
రుషికొండలో సీఎం క్యాంప్ ఆఫీస్ కడుతున్నందున సందర్శకులను నియంత్రిస్తారా ?
ఈ టిక్కెట్ తీసుకునేవారు తాగునీరు, టాయిలెట్లు, స్విమ్మింగ్‌ జోన్‌, ఆటస్థలం వినియోగించుకోవచ్చు. పదేళ్ల లోపు పిల్లలకు రుసుము తీసుకోరు. పార్కింగ్ ఫీజు ఎప్పటిలాగే వసూలు చేస్తారు. రుషికొండ బీచ్ కు ఎదురుగా ఉన్న కొండపై ప్రభుత్వం భారీ భవనాలు నిర్మిస్తోంది. అవి ముఖ్యమంత్రి క్యాంప్ కార్యాలయం అన్న ప్రచారం జరుగుతోంది. అందుకే అక్కడకు సందర్శకుల్ని వీలైనంత వరకూ తగ్గించే ఉద్దేశంతోనే.. ఇలాంటి టిక్కెట్ భారాలను మోపుతున్నారని.. ముందు ముందు సందర్శకులపై మరిన్ని ఆంక్షలు విధిస్తారన్న ప్రచారం జరుగుతోంది.
టాప్ హెడ్ లైన్స్
ట్రెండింగ్ వార్తలు
