Iran War Effect On Vizag Steel Plant: విశాఖ ఉక్కుకు ఇరాన్‌ వార్‌ సెగ! పది రోజుల్లో స్టీల్ ప్లాంట్ మూతపడుతుందా? 

Iran War Effect On Vizag Steel Plant: విశాఖ స్టీల్ ప్లాంట్‌లోని స్టీల్‌ మెల్టింగ్ షాప్‌ అత్యంత కీలకమైన విభాగం, ఇక్కడ తయారైన స్టీల్ బ్లూమ్స్‌ అవసరమైన పరిమాణంలో కట్ చేయడానికి ఎల్పీజీని వినియోగిస్తారు.

విశాఖ ఉక్కుకు ఇరాన్‌ వార్‌ సెగ! పది రోజుల్లో స్టీల్ ప్లాంట్ మూతపడుతుందా? 

Source : Social Media

Show Quick Read

Key points generated by AI, verified by newsroom

• పశ్చిమాసియా యుద్ధం విశాఖ ఉక్కు ప్లాంట్‌పై ప్రభావం చూపుతోంది.
• ఎల్పీజీ సరఫరా నిలిచిపోతే ఉత్పత్తి ఆగిపోయే ప్రమాదం ఉంది.
• ప్రస్తుతం పది రోజులకు సరిపడా గ్యాస్ మాత్రమే నిల్వ ఉంది.
• ఎంపీ భరత్ అధికారులతో చర్చించి, సరఫరా కొనసాగాలని విజ్ఞప్తి చేశారు.

Iran War Effect On Vizag Steel Plant: ఎక్కడో పశ్చిమాసియాలో ఇరాన్, ఇజ్రాయెల్‌ దేశాల మధ్య జరుగుతున్న యుద్ధం ఇప్పుడు విశాఖ స్టీల్ ప్లాంట్‌పై తీవ్ర ప్రభావం చూపుతోంది. ఈ యుద్ధ పరిస్థితుల వల్ల అంతర్జాతీయంగా ఇంధన సరఫరాలో మార్పులు రావడం, మన దేశీయ అవసరాల కోసం కేంద్ర ప్రభుత్వం తీసుకుంటున్న నిర్ణయాలు ఇప్పుడు విశాఖ ఉక్కు పరిశ్రమను ఇబ్బందుల్లో పడేస్తోంది. ఇప్పుడు విశాఖ ఉక్కు పరిశ్రమను నడపడానికి అత్యంత కీలకమైన ఎల్పీజీ సరఫరా నిలిచిపోయే పరిస్థితి రావడంతో, మోర పది రోజుల్లో ఉత్పత్తి మొత్తం ఆగిపోయే ప్రమాదం ఏర్పడింది. ఈ సంక్షోభంపై స్టీల్ అధికారులు, కార్మిక సంఘాలు తీవ్ర ఆందోళన చెందుతున్నాయి. 

స్టీల్ ప్లాంట్‌కు గ్యాస్ ఎందుకు అవసరం?

విశాఖ స్టీల్ ప్లాంట్‌లోని స్టీల్‌ మెల్టింగ్ షాప్‌ అత్యంత కీలకమైన విభాగం, ఇక్కడ తయారైన స్టీల్ బ్లూమ్స్‌ అవసరమైన పరిమాణంలో కట్ చేయడానికి ఎల్పీజీని వినియోగిస్తారు. ప్రతి రోజూ సుమారు నాలుగు వేల బ్లూమ్స్ కట్ చేయాల్సి ఉంటుంది.  ఈ బ్లూమ్స్‌ కట్ చేస్తే బెడ్ ఖాళీ అవుతుంది. తద్వారా నిరంతరం కాస్టింగ్ ప్రక్రియ ఇబ్బంది లేకుండా సాగుతుంది. ఈ కటింగ్‌ ప్రక్రియలో ఎల్పీజీకి వేరే ప్రత్యామ్నాయం ఏదీ అందుబాటులో లేదు. ఒక వేళ గ్యాస్ సరఫరా ఆగిపోతే కటింగ్ ఆపవలసి ఉంటుంది. దీంతో ప్లాంట్ మొత్తంలో ఉత్పత్తి ప్రక్రియ ఆగిపోయే ప్రమాదం ఉంది. 

దీని వల్ల ప్లాంట్‌ ప్రతి రోజూ ఉత్పత్తి చేసే పది వేల టన్నుల ఫినిష్డ్‌ స్టీల్ ఆగిపోతుంది. ఇది సంస్థకు భారీ ఆర్థిక నష్టాన్ని మిగులుస్తుంది. ప్లాంట్‌లో పనులు కోసం రోజుకు సుమారు 13 టన్నుల ఎల్పీజీ అవసరం. ప్లాంట్‌లో మొత్తం 325 టన్నుల ఎల్పీజీని దాచుకునే సౌకర్యం ఉంది. ప్రస్తుతం ప్లాంట్‌లో నిల్వలు చాలా తక్కువగా ఉన్నాయి. ఒక అంచనా ప్రకారం 156 టన్నుల గ్యాస్ మాత్రమే ఉంది. ఉన్న నిల్వలు ప్రస్తుత వినియోగం ప్రకారం మరో పది రోజులకు సరిపోతాయి. పది రోజుల తర్వాత గ్యాస్ రాకపోతే ప్లాంట్ మూతపడుతుందని అధికారులు చెబుతున్నారు. 

ఇలాంటి సంక్షోభం ఎదుర్కోవడం విశాఖ స్టీల్ ప్లాంట్‌కు ఇది మొదటిసారి కాదు. 2022లో దేశంలో బొగ్గు సంక్షోభం వచ్చినప్పుడు కూడా నెల రోజుల పాటు ప్లాంట్‌కు బొగ్గు అందలేదు. ఇప్పుడు అలాంటి పరిస్థితి మళ్లీ రిపీట్ అవుతోంది. 

రంగంలోకి దిగిన ఎంపీ భరత్

పరిస్థితిని అధికారులు, కార్మిక సంఘాలు విశాఖ ఎంపీ భరత్‌కు వివరించారు. వెంటనే స్పందించిన భరత్ ఢిల్లీలోని కేంద్ర పెట్రోలియం శాఖ ఉన్నతాధికారులతో చర్చించారు. స్టీల్ ప్లాంట్‌కు గ్యాస్ సరఫరా నిలివేస్తే ఉత్పత్తి ఆగిపోతుందని వేల మందిపై ప్రభావం ఉంటుందని తెలియజేశారు. సరఫరాకు అంతరాయం లేకుండా చూడాలని విజ్ఞప్తి చేశారు. ఎంపీ విజ్ఞప్తికి అధికారులు సానుకూలంగా స్పందించినట్టు సమాచారం.                                         

మరిన్ని చదవండి

ఇరాన్ యుద్ధం ఎఫెక్ట్! ఏపీలో స్విగ్గి, జోమోటో సేవలు బంద్? హోటల్ యాజమాన్యాల కీలక నిర్ణయాలు!

ఇరాన్ సైన్యం పూర్తిగా నాశనం - యుద్ధం త్వరలోనే ముగుస్తుంది - ట్రంప్ సంచలన ప్రకటన