Nara Lokesh Anantapur Tour Cancelled: నారా లోకేష్ అనంతపురం పర్యటన రద్దు, నేపాల్ నుంచి ఏపీ వారిని వెనక్కి తీసుకురావడంపై ఫోకస్
నేపాల్ లో చిక్కుకున్న తెలుగువారిని వెనక్కి తీసుకురావడంతో ఫోకస్ చేసిన మంత్రి నారా లోకేష్ అనంతపురం పర్యటన రద్దు చేసుకున్నారు.
అమరావతి: నేపాల్ లో నెలకొన్న ఉద్రిక్త పరిస్థితులతో ఆ దేశంలో చిక్కుకున్న తెలుగువారిని సురక్షితంగా రాష్ట్రానికి తీసుకువచ్చేందుకు ఏపీ విద్య, ఐటీ శాఖల మంత్రి నారా లోకేష్ ప్రయత్నాలు మొదలుపెట్టారు. ఇందుకోసం నేడు అనంతపురంలో జరగనున్న సూపర్ సిక్స్-సూపర్ హిట్ కార్యక్రమాన్ని సైతం మంత్రి రద్దు చేసుకున్నారు. నేపాల్ లో చిక్కుకున్న తెలుగువారిని రక్షించడంపైనే ప్రత్యేక దృష్టి సారించారు. ఇందుకు సంబంధించి సచివాలయంలోని రియల్ టైమ్ గవర్నెన్స్ సెంటర్ ద్వారా నారా లోకేష్ పరిస్థితిని నిరంతరం సమీక్షించనున్నారు.
ఈ మేరకు ఆర్టీజీఎస్ సెంటర్ లో ప్రత్యేక వార్ రూమ్ ఏర్పాటుచేయడం జరిగింది. ప్రత్యేక కాల్ సెంటర్, వాట్సప్ నెంబర్ ఏర్పాటుచేసి సంబంధిత మంత్రులు, శాఖల అధికారులతో మంత్రి సమన్వయం చేయనున్నారు. అధికారులు తక్షణమే ఆర్టీజీఎస్ కేంద్రానికి రావాలని ఇప్పటికే ఆదేశించడం జరిగింది. కేంద్ర ప్రభుత్వ సహకారంతో తెలుగువారి వివరాలు సేకరించి తక్షణమే వారిని రాష్ట్రానికి తీసుకురావడంపై కార్యాచరణ ప్రారంభించనున్నారు.
నేపాల్ లో చిక్కుకున్న 187 మంది తెలుగువారు
ఇప్పటివరకు అందిన అధికారిక సమాచారం ప్రకారం నేపాల్ లో 187 మంది తెలుగువారు చిక్కుకున్నట్లు తెలుస్తోంది. వీరంతా నేపాల్ లోని నాలుగు ప్రాంతాల్లో ఉన్నారు. బఫాల్ లో చిక్కుకున్న 27 మంది శ్రీధరాచార్యుల పర్యవేక్షణలో ఉండగా.. గౌశాలలోని పింగలస్థాన్ లో 90 మంది, సిమిల్ కోట్ లో కారి అప్పారావు వద్ద 12 మంది, పశుపతి నగరంలోని మహదేవ్ హోటల్ వద్ద విజయ పర్యవేక్షణలో 55 మంది తెలుగువారు చిక్కుకున్నట్లు ప్రాథమిక సమాచారం ప్రభుత్వానికి అందింది. పూర్తి లెక్కలు తేలితే ఈ సంఖ్య మరింత పెరిగే అవకాశం ఉంది. ఏపీ ప్రభుత్వం ఇప్పటికే నేపాల్ లోని భారత రాయబారి నవీన్ శ్రీ వాస్తవకు పరిస్థితిని వివరించి అప్రమత్తం చేయడం జరిగింది. తెలుగు ప్రజల భద్రతే ప్రాధాన్యంగా మంత్రి నారా లోకేష్ కేంద్ర ఏజెన్సీలు, భారత రాయబార కార్యాలయంతో నిరంతరం సమన్వయం చేయడం జరుగుతోంది.
టాప్ హెడ్ లైన్స్
ట్రెండింగ్ వార్తలు
