Skill Scam : అవినీతికి ఆధారాలున్నాయా..? స్కిల్ స్కాంలో సీఐడీకి హైకోర్టు ప్రశ్న... ఘంటా సుబ్బారావుకు షరతుల బెయిల్ !

స్కిల్ స్కాంలో అవినీతికి పాల్పడినట్లుగా ఆధారాలు ఉన్నాయా అని సీఐడీని హైకోర్టు ప్రశ్నించింది. రెండు వారాల్లో అఫిడవిట్ దాఖలు చేయాలని ఆదేశించింది. ఘంటా సుబ్బారావుకు షరతులతో కూడిన బెయిల్ మంజూరు చేసింది.

స్కిల్ స్కాంలో ఘంటా సుబ్బారావుకు షరతుల బెయిల్

 

స్కిల్ డెవలప్‌మెంట్ కార్పొరేషన్‌లో భారీ స్కాం జరిగిందని సీఐడీ నమోదు చేసిన కేసులో ఏ -1గా ఉన్న ఘంటా సుబ్బారావుకు హైకోర్టు షరతులతోకూడిన బెయిల్ మంజూరు చేసింది. సోమవారం గంటా సుబ్బారావు బెయిల్ పిటిషన్‌పై హైకోర్టులో విచారణ జరిగింది. ప్రతి శనివారం ఉదయం 10 గంటల నుంచి మధ్యాహ్నం 1:00 గంటలోపు మంగళగిరి సీఐడీ పోలీస్ స్టేషన్లో హాజరుకావాలని ఆదేశించింది. సీఐడీ విచారణకు హాజరు కావాలంటే 24 గంటల ముందు నోటీసులు ఇవ్వాలని తెలిపింది. 

ఈ సందర్భంగా దర్యాప్తు అధికారికి హైకోర్టు కీలక ఆదేశాలు జారీ చేసింది.  రెండు వారాల్లో అఫిడవిట్ దాఖలు చేయాలని స్పష్టం చేసింది.  అవినీతి జరుగుతుందని చెబుతున్నందున.. నిధుల విడుదల, నిర్ణయాలు తీసుకున్న కమిటీలో ఉన్న వారందరినీ కేసులో ఎందుకు చేర్చలేదని ధర్మాసనం సీఐీజని ప్రశ్నించింది.   సుబ్బారావు నిధులు దుర్వినియోగం చేశారని ఏదైనా ఆధారాలు ఉన్నాయా అని అడిగింది. వీటిపై సీఐడీ తరపు న్యాయవాది స్పష్టమైన సమాధానాన్ని హైకోర్టుకు చెప్పలేదు. 

అలాగే నిధుల విడుదల సహా మొత్తం కార్పొరేషన్‌కు సంబంధించిన నిర్ణయాలు తీసుకునేంది మేనేజింగ్ డైరక్టరని.. ఆయన కాకుండా.. ఓ డైరక్టర్‌గా ఉన్న ఘంటా సుబ్బారావు పేరను ఎలా ఏ- 1 చేరుస్తారని హైకోర్టు ప్రశ్నించింది.  కొంతమందిని కేసులో నిందితులుగా పేర్కొనడం పట్ల సుబ్బారావు తరపు న్యాయవాది ఆదినారాయణ రావు అభ్యంతరం వ్యక్తం చేశారు. కొంతమందిని కావాలని కేసులో ఇరికించారని సుబ్బారావు హైకోర్టు దృష్టికి తీసుకువెళ్లారు. 

స్కిల్ డెలవప్‌మెంట్ కార్పొరేషన్‌లో భారీ స్కాం జరిగిందని సీఐడీ కేసులు పెట్టింది. ఘంటా సుబ్బారావుతోపాటు మాజీ ఐఏఎస్ లక్ష్మినారాయణతో సహా పలువుర్ని నిందితులుగా చేర్చారు. అయితే నిధులు విడుదల చేసింది అప్పటి ఎండీ మాజీ ఐఏఎస్ ప్రేమచంద్రారెడ్డి అని అలాగే నిర్ణయాలు తీసుకుంది ఇప్పుడు సీఎంవోలో కీలకంగా ఉన్న షంషేర్ సింగ్ రావత్, అజయ్ జైన్‌లు అని వారిని కాకుండా కేవలం సలహాలకు మాత్రమే పరిమితయ్యేవారిపై కేసులు  పెట్టడం ఏమిటని తెలుగుదేశం పార్టీ నేతలు ప్రశ్నిస్తున్నారు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి