Chilli Price: క్వింటా 80 వేలు- ఎనుమాముల మార్కెట్లో రికార్డు స్థాయిలో మిర్చి ధర

Chilli Price: వరంగల్ ఎనుమాముల మార్కెట్ లో మిర్చి ధర రికార్డు సృష్టించింది. క్వింటా మిర్చి 80 వేల రూపాయల 100 వంద పలికింది. దాదాపు గంటలోనే మొత్తం 3 వేల బస్తాలు అమ్ముడుపోయాయి. 

వరంగల్ మార్కెట్లో రికార్డు స్థాయిలో మిర్చి ధర, క్వింటాలుకు 80 వేల 100 రూపాయలు

Chilli Price: వరంగల్ ఎనుమాముల వ్యవసాయ మార్కెట్లో దేశీయ కొత్త మిర్చి రికార్డు సృష్టించింది. క్వింటాలుకు 80,100 రూపాయలు పలికింది. మార్కెట్ కార్యదర్శి రాహుల్ మాట్లాడుతూ... మార్కెట్ చరిత్రలోనే ఇప్పటి వరకు కొత్త మిర్చికి ఈ ధర పలకలేదని అన్నారు. రైతులు ఇంత వరకు కూడా మిర్చీని మార్కెట్ కు తక్కువ మోతాదులో తీసుకొని వస్తున్నారని.. ఆరబెట్టిన మిర్చిని మాత్రమే తీసుకొని రావాలని అని తెలిపారు. గంటన్నరలోపే 3 వేల రూపాయల బస్తాలను వ్యాపారులు కొనుగోలు చేస్తున్నట్లు తెలుస్తోంది. తద్వారా చరిత్రలోనే కాదు రికార్డు ధరతో, అమ్మకాలతో దేశీయంగా రికార్డు నెలకొల్పిందని వ్యాపారులు చెబుతున్నారు. ఖమ్మం జిల్లా రైతు నాలుగు బస్తాలు కొత్త దేశీ మిర్చి తీసుకొచ్చాడని దానికి 80,000 పై చిలుకు ధర పలికిందని పేర్కొన్నారు.  తేమ శాతం తక్కువ ఉన్న మిర్చీని రైతులు తీసుకొని వచ్చి అధిక ధర పొందగలరని ఆయన కోరారు.

సెప్టెంబర్ నెలలో 90 వేలతో రికార్డు..

హనుమకొండ జిల్లా పరకాల మండలానికి చెందిన ఓ  రైతు తన పంటను క్వింటాకు రూ.90 వేలకు చొప్పున అమ్మాడు. ఇదే ఇప్పటి వరకు రికార్డ్ ధర అని అధికారులు తెలిపారు. ఇంతటి ధర పలకడంతో రైతులు ఆనందం వ్యక్తం చేస్తున్నారు. దేశీ రకానికి డిమాండ్‌ పెరగడం, ఆఫ్ సీజన్ కావడంతో ఈ రేటు వచ్చిందని అధికారులు చెప్తున్నారు. లక్షకు చేరువలో మిర్చి ధర పలకడంతో మిర్చి రైతులు సంతోషంగా ఉన్నారు. రెండు వారాల క్రితం మిర్చి ధర క్వింటా రూ.65 వేలు పలికింది. దేశీ మిర్చికి అంతర్జాతీయంగా మంచి డిమాండ్ ఉండడంతో ధర అమాంతం పెరిగింది. ఈ మిర్చిని పచ్చళ్లలో అధికంగా వినియోగిస్తారు. గతేడాది అకాల వర్షాలతో ఎండు మిర్చి దిగుబడులు తగ్గాయి.  తెగుళ్లు కూడా మిర్చి పంటపై తీవ్ర ప్రభావం చూపాయి. ఏడాదికి 25, 30 క్వింటాళ్లు వచ్చే దిగుబడి కేవలం 10 నుంచి 15  క్వింటాళ్లు వచ్చాయి. దీంతో మార్కెట్లో మిర్చి సప్లై తగ్గిపోయింది. దీంతో రైతులు కాస్త మంచి ధరకే పంటను అమ్ముకున్నా దిగుబడి తగ్గిపోవడంతో నష్టాలు తప్పలేదు. మంచి ధరకోసం పంటను కోల్డ్ స్టోరేజీలలో దాచుకున్న రైతుల పంట పడింది. తాజాగా మంచి రేటు పలకడంతో రైతులు సంతోషం వ్యక్తం చేస్తున్నారు.  

ఉమ్మడి వరంగల్‌తో పాటు ఖమ్మం, సూర్యాపేట జిల్లాల్లో పండిస్తున్న ఎండు మిర్చి అంతర్జాతీయ మార్కెట్ లోకి అందుబాటులోకి రానుంది. ఈ ఏడాది కనీసం 20 వేల మెట్రిక్‌ టన్నుల ఎండు మిర్చిని సేకరించి రూ.10 కోట్ల లాభాన్ని ఆర్జించనున్నట్లు  మంత్రి ఎర్రబెల్లి దయాకర్‌రావు తెలిపారు. మహబూబాబాద్‌, వరంగల్‌, ములుగు, భూపాలపల్లి, హనుమకొండ సహా ఉమ్మడి ఖమ్మం జిల్లాలో ఎండుమిర్చి అధికంగా సాగుతోంది. ఈ మిర్చి నాణ్యతలో కూడా బాగుందని అధికారులు తెలిపారు. గతేడాది ఖమ్మం జిల్లాలో పొదుపు సంఘాల మహిళలు రూ.40 కోట్ల వ్యాపారం చేసి రూ.92 లక్షల లాభం పొందారు. రైతుల ఖాతాల్లో  విక్రయాలకు సంబంధించి 15 రోజుల్లో నగదు జయ అయింది. లాభంలో ప్రతి కిలోకు రూ.4 చొప్పున రైతులకు బోనస్‌ అందించారు. రైతుల కల్లాల వద్దే పంటను కొనుగోలు చేస్తున్నట్లు అధికారులు తెలిపారు. ఈ మిర్చి పంటకు భౌగోళిక గుర్తింపు కోసం ప్రయత్నాలు చేస్తున్నారు అధికారులు.