Janwada Farm House Case: జన్వాడ ఫాం హౌస్ కేసులో కీలక పరిణామం, విజయ్ మద్దూరికి లుకౌట్ నోటీసులు జారీ

Telangana News | తెలంగాణలో జన్వాడ ఫాం హౌస్ కేసు దుమారం రేపుతోంది. దర్యాప్తులో భాగంగా విదేశాలకు పారిపోకుండా ఉండేందుకు విజయ్ మద్దూరికి లుక్ ఔట్ నోటీసులు జారీ చేశారు.

జన్వాడ ఫాం హౌస్ కేసులో కీలక పరిణామం, విజయ్ మద్దూరికి లుకౌట్ నోటీసులు జారీ

Source : ABP Desam

Janwada Farm House News: హైదరాబాద్: జన్వాడ ఫామ్ హౌస్‌లో జరిగిన పార్టీపై పోలీసుల దర్యాప్తు ముమ్మరం చేశారు. పార్టీలో పాల్గొన్న వారికి టెస్టులు చేయగా విజయ్ మద్దూరికి డ్రగ్స్ పాజిటివ్ గా తేలిన విజయ్ మద్దూరికి పోలీసులు లుకౌట్ నోటీసులు జారీ చేశారు. దేశం విడిచి పారిపోకుండా ఉండేందుకు విజయ్ మద్దూరికి లుకౌట్ నోటీసులు జారీ చేసినట్లు తెలుస్తోంది. జన్వాడ ఫాం హౌస్ పార్టీలో పాల్గొన్న వారికి కొకైన్ డ్రగ్ పాజిటివ్ రావటంతో మోకిల పోలీసులు NDPC సెక్షన్ కింద కేసు నమోదు చేసి దర్యాప్తు కొనసాగిస్తున్నారు.

తెలంగాణలో హాట్ టాపిక్‌గా జన్వాడ ఫాం హౌస్ కేసు 
కేటీఆర్ బావమరిది రాజ్ పాకాలకు చెందిన జన్వాడ ఫాం హౌస్ పై పోలీసులు కొన్ని రోజుల కిందట (దీపావళి పండుగ సమయంలో) ఆకస్మిక తనిఖీలు చేపట్టారు. అక్కడ పెద్ద శబ్దాలు పెట్టి పార్టీ చేసుకుంటున్నట్లు పోలీసులు గుర్తించారు. విదేశీ మద్యం బాటిల్స్, కొన్ని మత్తు పదార్థాలను స్వాధీనం చేసుకున్నారు. పోలీసుల తనిఖీ సమయంలో అక్కడ కనిపించిన లిక్కర్ బాటిల్స్ వీడియో, ఫొటోలు వైరల్ కావడం తెలిసిందే. ఆ పార్టీలో పాల్గొన్న వారికి టెస్టులు నిర్వహించగా విజయ్ మద్దూరికి కొకైన్ పాజిటివ్ గా వచ్చినట్లు ఎఫ్ఐఆర్ లో పేర్కొన్నారు. దాంతో తెలంగాణ ప్రభుత్వం అలర్ట్ అయింది.

ఫ్యామిలీ పార్టీలో డ్రగ్స్ అంటూ కాంగ్రెస్ విమర్శలు

ఫ్యామిలీ పార్టీ, ఫ్యామిలీ గెట్ టుగేదర్ పేరుతో డ్రగ్స్, మత్తు పదార్థాలు తీసుకోవడం ఏంటని కాంగ్రెస్ నేతలు విమర్శలు గుప్పించారు. పోలీసుల తనిఖీకి కొన్ని నిమిషాల ముందు కేటీఆర్ కుటుంబసభ్యులు సైతం అక్కడి నుంచి వెళ్లిపోయారని సైతం కొన్ని సోషల్ మీడియా ఖాతాల్లో విపరీతంగా ప్రచారం జరిగింది. రేవంత్ ప్రభుత్వం మాత్రం డ్రగ్స్, గంజాయి లాంటి మత్తు పదార్థాలపై ఉక్కుపాదం మోపుతామని చెబుతోంది. ఇందులో ఎంత పెద్ద వాళ్లు ఉన్న వదిలిపెట్టేది లేదని, యువత జీవితాలు నాశనం అవుతాయని కాంగ్రెస్ ప్రభుత్వం విషయాన్ని సీరియస్ గా తీసుకుంది. ఈ క్రమంలో రాజ్ పాకాలకు చెందిన ఫాంహౌస్ లో జరిగిన పార్టీ రాజకీయాలకు కేంద్ర బిందువు అయింది.

 

రాజ్ పాకాలకు మొదట విచారణకు హాజరు కావాలని పోలీసులు నోటీసులు ఇచ్చారు. రెండు రోజులు కనిపించకుండా పోయిన రాజ్ పాకాల నిర్ణీత గడువు సమయానికి మోకిల పోలీస్ స్టేషన్ లో విచారణకు హాజరయ్యారు. తన అడ్వకేట్ తో కలిసి పీఎస్ కు వెళ్లిన రాజ్ పాకాల పోలీసులు అడిగిన ప్రశ్నలకు పొంతనలేని సమాధానం చెప్పినట్లు తెలుస్తోంది. 

ఇటీవల విచారణకు హాజరైన విజయ్ మద్దూరి

మరోవైపు జన్వాడ ఫాం హౌస్ కేసులో ఏ2గా ఉన్న విజయ్ మద్దూరి సైతం ఇటీవల విచారణకు హాజరయ్యారు. వారికి డ్రగ్స్ ఎక్కడి నుంచి వచ్చాయని, తెప్పించింది ఎవరు అనే కోణాల్లొ పోలీసులు విచారణ చేపట్టారు. రాజ్ పాకాల వాంగ్మూలం ఆధారంగానే ఆ తరువాత విచారణకు హాజరైన విజయ్ మద్దూరిని పోలీసులు విచారించారు. తనపై ఉద్దేశపూర్వకంగా దుష్ప్రచారం చేస్తున్నారని, తాను చెప్పని విషయాలను సైతం ఎఫ్ఐఆర్ లో పొందుపరిచారని విచారణ అనంతరం విజయ్ మద్దూరి మీడియాకు తెలిపారు. దేశం విడిచి వెళ్లిపోకుండా ఉండేందుకు దర్యాప్తులో భాగంగా విజయ్ మద్దూరికి లుకౌట్ నోటీసులు సైతం జారీ చేశారు.