Samsung Galaxy S24 Ultra: శాంసంగ్ ఎస్24 అల్ట్రా కెమెరా ఫీచర్లు లీక్ - ఈసారి కెమెరా మామూలుగా లేదుగా!

Samsung Galaxy S24 Ultra: ప్రముఖ స్మార్ట్ ఫోన్ బ్రాండ్ శాంసంగ్ త్వరలో లాంచ్ చేయనున్న గెలాక్సీ ఎస్24 అల్ట్రా గురించి వివరాలు ఆన్‌లైన్‌లో లీకయ్యాయి.

శాంసంగ్ గెలాక్సీ ఎస్24 అల్ట్రా కెమెరా ఫీచర్లు లీకయ్యాయి.

Source : Samsung

 శాంసంగ్ గెలాక్సీ ఎస్24 అల్ట్రా గురించి కొన్ని వివరాలు ఆన్‌లైన్‌లో లీకయ్యాయి. ఈ సంవత్సరం ఫిబ్రవరిలో లాంచ్ అయిన శాంసంగ్ గెలాక్సీ ఎస్23 అల్ట్రాకు తర్వాతి వెర్షన్‌గా ఈ ఫోన్ మార్కెట్లోకి రానుంది. దీంతో పాటు శాంసంగ్ గెలాక్సీ ఎస్24, శాంసంగ్ గెలాక్సీ ఎస్24 ప్లస్ మోడల్స్ కూడా మార్కెట్లోకి రానున్నాయి. 2024 వరకు ఇవి మార్కెట్లో లాంచ్ కావు. కానీ లీకులు మాత్రం వినిపిస్తూనే ఉంటాయి. ఇప్పుడు ఈ స్మార్ట్ ఫోన్ సిరీస్ కెమెరాల వివరాలు ఆన్‌లైన్‌లో లీకయ్యాయి.

శాంసంగ్ గెలాక్సీ ఎస్24 అల్ట్రా స్మార్ట్ ఫోన్‌లో 5x జూమ్ ఉన్న 48 మెగాపిక్సెల్ కెమెరా ఉండనుందని గిజ్మోచైనా తన కథనంలో పేర్కొంది. ప్రారంభంలో 10x జూమ్ ఫీచర్ ఉన్న 50 మెగాపిక్సెల్ కెమెరా అందించాలని అనుకున్నప్పటికీ అవుట్ పుట్ క్వాలిటీ కారణంగా ఆ ప్లాన్‌ను నిలిపివేస్తున్నట్లు తెలుస్తోంది. 

దీంతోపాటు ఈ ఫోన్‌లో 200 మెగాపిక్సెల్ శాంసంగ్ ఐసోసెల్ హెచ్‌పీ2ఎస్ఎక్స్ సెన్సార్ కూడా ఉండనుంది. శాంసంగ్ గెలాక్సీ ఎస్23 అల్ట్రాలో అందించిన ఐసోసెల్ హెచ్‌పీ2 సెన్సార్‌కు ఇది అప్‌గ్రేడెడ్ వెర్షన్ అని తెలుస్తోంది. లేటెస్ట్ ఐసోసెల్ హెచ్‌పీ2ఎస్ఎక్స్ సెన్సార్‌లో 1/1.3 ఆప్టికల్ ఫార్మాట్‌లో 200 మిలియన్ పిక్సెల్స్ అందించనున్నారని,  అలాగే ఇది 0.6 మైక్రాన్ పిక్సెల్స్‌ను కలిగి ఉండనుందని తెలుస్తోంది.

వినిపిస్తున్న లీకుల ప్రకారం... ఆండ్రాయిడ్ 14 ఆధారిత వన్ యూఐ 6 ఆపరేటింగ్ సిస్టంపై ఈ ఫోన్ పని చేయనుంది. శాంసంగ్ గెలాక్సీ ఎస్24 అల్ట్రాలో 6.8 అంగుళాల క్యూహెచ్‌డీ+ డైనమిక్ అమోఎల్ఈడీ ఎల్టీపీవో డిస్‌ప్లే అందించనున్నారు. దీని ముందు మోడల్స్ తరహాలో కాకుండా టైటానియం ఫ్రేమ్స్‌తో ఈ ఫోన్ రానుంది. దీని బ్యాటరీ సామర్థ్యం 5000 ఎంఏహెచ్‌గా ఉండనుంది. శాంసంగ్ ఎక్సినోస్ 2400 ప్రాసెసర్ లేదా క్వాల్‌కాం స్నాప్‌డ్రాగన్ 8 జెన్ 3 ప్రాసెసర్లపై ఈ ఫోన్ పని చేయనుంది.

శాంసంగ్ గెలాక్సీ ఎస్23 అల్ట్రా స్పెసిఫికేషన్లు, ఫీచర్లు
శాంసంగ్ గెలాక్సీ ఎస్23 అల్ట్రాలో 6.8 అంగుళాల డిస్‌ప్లేను అందించారు. దీని స్క్రీన్ రిజల్యూషన్ 1440 x 3088 పిక్సెల్స్‌గా ఉంది. సెక్యూరిటీ కోసం ఫోన్ ఇన్-డిస్‌ప్లే ఫింగర్ ప్రింట్ సెన్సార్ అందుబాటులో ఉంది. ప్రాసెసర్ గురించి చెప్పాలంటే శాంసంగ్ గెలాక్సీ ఎస్23 అల్ట్రా ఆక్టా-కోర్ ప్రాసెసర్, క్వాల్‌కాం స్నాప్‌డ్రాగన్ 8 జెన్ 2 చిప్‌సెట్‌పై పని చేయనుంది.

శాంసంగ్ గెలాక్సీ ఎస్23 అల్ట్రా స్మార్ట్ ఫోన్‌లో మూడు కెమెరాలు ఉన్నాయి. వీటిలో ప్రధాన కెమెరాగా 200 మెగాపిక్సెల్ సెన్సార్‌ను అందించారు. దీంతోపాటు 12 మెగాపిక్సెల్, 10 మెగాపిక్సెల్ కెమెరాలు కూడా ఈ ఫోన్‌లో అందుబాటులో ఉన్నాయి. సెల్ఫీ కెమెరా గురించి చెప్పాలంటే ఇందులో మీకు 12 మెగాపిక్సెల్ సెల్ఫీ కెమెరా అందించారు. దీని బ్యాటరీ సామర్థ్యం 5000 ఎంఏహెచ్‌గా ఉంది.

ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial