iQOO Z6 5G Offer: రూ.13 వేలలోపే ఐకూ జెడ్6 5జీ - కానీ అది తీసేశారుగా!

ప్రముఖ స్మార్ట్ ఫోన్ బ్రాండ్ ఐకూ ఇటీవలే మనదేశంలో జెడ్6 5జీ స్మార్ట్ ఫోన్ లాంచ్ చేసిన సంగతి తెలిసిందే. దీన్ని ఇంకా తక్కువ ధరకు విక్రయిస్తున్నారు. కానీ అడాప్టర్ తీసేశారు.

ఐకూ జెడ్6 5జీ స్మార్ట్ ఫోన్‌ను అడాప్టర్ లేకుండా తక్కువ ధరకు విక్రయిస్తున్నారు. (Image Credits: iQoo)

ఐకూ జెడ్6 5జీ ఇటీవలే మనదేశంలో లాంచ్ అయిన సంగతి తెలిసిందే. ఈ స్మార్ట్ ఫోన్‌ను ఇప్పుడు అడాప్టర్ లేకుండా కూడా విక్రయిస్తున్నారు. అడాప్టర్ ఉన్న మోడల్‌కు, లేని మోడల్‌కు వేర్వేరు ధరలు నిర్ణయించారు. ఐకూ జెడ్6 5జీలో 120 హెర్ట్జ్ డిస్‌ప్లేను అందించారు. క్వాల్‌కాం స్నాప్‌డ్రాగన్ 695 5జీ ప్రాసెసర్‌పై ఈ స్మార్ట్ ఫోన్ పనిచేయనుంది. 8 జీబీ వరకు ర్యామ్ కూడా ఇందులో అందించారు. ఫోన్ వెనకవైపు మూడు కెమెరాలు ఉన్నాయి.

ఐకూ జెడ్6 5జీ ధర
ఇందులో మూడు వేరియంట్లు లాంచ్ అయ్యాయి. వీటిలో 4 జీబీ ర్యామ్ వేరియంట్‌ను మాత్రమే అడాప్టర్ లేకుండా విక్రయిస్తున్నారు. దీని ధర రూ.13,999గా ఉంది. ఇక అడాప్టర్ ఉన్న మోడల్‌లో 4 జీబీ ర్యామ్ వేరియంట్ ధర రూ.15,499 కాగా... 6 జీబీ ర్యామ్ వేరియంట్ ధర రూ.16,999గానూ, 8 జీబీ ర్యామ్ వేరియంట్ ధర రూ.17,999గానూ ఉంది. ఐసీఐసీఐ బ్యాంకు కార్డులు, ఈఎంఐ లావాదేవీల ద్వారా కొనుగోలు చేస్తే రూ.1,000 తగ్గింపును దీనిపై అందించనున్నారు. అంటే అడాప్టర్ లేని వేరియంట్‌ను రూ.12,999కే కొనేయచ్చన్న మాట.

ఐకూ జెడ్6 5జీ స్పెసిఫికేషన్లు
ఆండ్రాయిడ్ 12 ఆధారిత ఫన్‌టచ్ ఓఎస్ 12 ఆపరేటింగ్ సిస్టంపై ఐకూ జెడ్6 5జీ పనిచేయనుంది. ఈ స్మార్ట్ ఫోన్‌లో 6.58 అంగుళాల ఫుల్ హెచ్‌డీ+ డిస్‌ప్లేను అందించారు. దీని స్క్రీన్ రిఫ్రెష్ రేట్ 120 హెర్ట్జ్‌గానూ, టచ్ శాంప్లింగ్ రేట్ 240 హెర్ట్జ్‌గానూ ఉండనుంది. 8 జీబీ వరకు ర్యామ్, 128 జీబీ స్టోరేజ్ ఇందులో అందించారు. స్టోరేజ్‌ను మైక్రో ఎస్‌డీ కార్డు ద్వారా 128 జీబీ వరకు పెంచుకునే అవకాశం ఉంది. క్వాల్‌కాం స్నాప్‌డ్రాగన్ 695 5జీ ప్రాసెసర్‌పై ఐకూ జెడ్6 5జీ పనిచేయనుంది.

ఇక కెమెరాల విషయానికి వస్తే... ఈ స్మార్ట్ ఫోన్ వెనకవైపు మూడు కెమెరాలు అందించారు. వీటిలో ప్రధాన కెమెరా సామర్థ్యం 50 మెగాపిక్సెల్ కాగా... 2 మెగాపిక్సెల్ మాక్రో షూటర్, 2 మెగాపిక్సెల్ బొకే కెమెరా కూడా ఉన్నాయి. ముందువైపు సెల్ఫీలు, వీడియో కాల్స్ కోసం 16 మెగాపిక్సెల్ కెమెరాను అందించారు.

ఐకూ జెడ్6 5జీలో 5000 ఎంఏహెచ్ బ్యాటరీని అందించారు. 18W ఫాస్ట్ చార్జింగ్‌ను ఈ ఫోన్ సపోర్ట్ చేయనుంది. 5జీ, 4జీ ఎల్టీఈ, వైఫై, బ్లూటూత్ వీ5.1, జీపీఎస్/ఏ-జీపీఎస్, యూఎస్‌బీ టైప్-సీ పోర్టు, 3.5 ఎంఎం హెడ్ ఫోన్ జాక్ వంటి కనెక్టివిటీ ఫీచర్లు కూడా ఇందులో అందించారు. మొబైల్ పక్కభాగంలో ఫింగర్ ప్రింట్ సెన్సార్‌ను అందించారు. ఈ స్మార్ట్ ఫోన్ మందం 0.82 సెంటీమీటర్లు కాగా... బరువు 187 గ్రాములుగా ఉంది.