BYD కొత్త టెక్నాలజీ.. బ్లేడ్ బ్యాటరీతో సంచలనం - 5 నిమిషాల్లోనూ ఛార్జింగ్ రికార్డు
ప్రపంచంలోనే అతిపెద్ద ఎలక్ట్రిక్ వాహన సంస్థ BYD 2వ తరం బ్లేడ్ బ్యాటరీని తీసుకొచ్చింది. ఈ బ్యాటరీని కేవలం 5 నిమిషాల్లో 10 నుండి 70 శాతం వరకు ఛార్జింగ్ చేయవచ్చని కంపెనీ పేర్కొంది.
ప్రపంచవ్యాప్తంగా ఎలక్ట్రిక్ వాహనాల (EV) డిమాండ్ రోజురోజుకూ పెరుగుతోంది. ప్రముఖ ఆటోమొబైల్ కంపెనీలు నిరంతరం కొత్త టెక్నాలజీపై పని చేస్తున్నాయి. ఈ దిశగా చైనాకు చెందిన ప్రముఖ ఎలక్ట్రిక్ వాహనాల సంస్థ BYD గొప్ప మైలురాయిని అధిగమించింది. కంపెనీ తన సెకండ్ జనరేషన్ 'బ్లేడ్ బ్యాటరీ' (Blade Battery), కొత్త ఫ్లాష్ ఛార్జింగ్ టెక్నాలజీని (Flash Charging Technology) పరిచయం చేసింది. ఈ కొత్త టెక్నాలజీ సహాయంతో ఎలక్ట్రిక్ కార్లు చాలా తక్కువ సమయంలో ఛార్జ్ అవుతాయి. కేవలం 5 నిమిషాల్లోనే బ్యాటరీ 10 శాతం నుండి 70 శాతం వరకు ఛార్జింగ్ అవుతుందని కంపెనీ పేర్కొంది. అదేవిధంగా 9 నిమిషాల పాటు ఛార్జ్ చేస్తే బ్యాటరీ 97 శాతం వరకు ఛార్జింగ్ పూర్తవుతుందని తెలిపింది.
ప్రపంచాన్ని ఆశ్చర్యపరిచిన BYD కొత్త టెక్నాలజీ
BYD కంపెనీ తీసుకొచ్చిన ఈ కొత్త బ్యాటరీ, ఛార్జింగ్ టెక్నాలజీ ప్రపంచ స్థాయిలో అందరి దృష్టిని ఆకర్షించింది. నివేదికల ప్రకారం, ఇప్పటివరకు టెస్లా వంటి పెద్ద కంపెనీలు కూడా చేయలేనిది BYD చేసి చూపించింది. సాధారణంగా పెట్రోల్ లేదా డీజిల్ కార్లలో ట్యాంక్ నింపడానికి ఎంత సమయం పడుతుందో, ఇప్పుడు దానికి రెట్టింపు సమయంలో BYD ఎలక్ట్రిక్ కారు దాదాపు 70 శాతం వరకు బ్యాటరీ ఛార్జింగ్ అవుతుంది. ఈ టెక్నాలజీ ఎలక్ట్రిక్ వాహనాలను మరింత సౌకర్యవంతంగా మార్చగలదు.
కేవలం 5 నిమిషాల్లో ఛార్జింగ్.. కొత్త రికార్డు
BYD కొత్త ఫ్లాష్ ఛార్జింగ్ టెక్నాలజీ ఛార్జింగ్ వేగంలో కొత్త రికార్డును సృష్టించనుంది. బీవైడీ కంపెనీ సమాచారం ప్రకారం, సెకండ్ జనరేషన్ బ్లేడ్ బ్యాటరీ కలిగిన కార్లు కేవలం 5 నిమిషాల్లో 10 శాతం నుండి 70% వరకు ఛార్జ్ అవుతాయి. ఒకవేళ మరికొంత సమయం అంటే సుమారు 9 నిమిషాలు ఛార్జింగ్ కేటాయిస్తే, బ్యాటరీ 97 శాతం వరకు ఛార్జ్ అవుతుంది. ఈ సాంకేతికత ఎలక్ట్రిక్ కార్లను పెట్రోల్, డీజిల్ కార్లకు ధీటుగా మార్కెట్లో పోటీనిస్తుంది. దీనివల్ల ప్రజలు ఎక్కువసేపు ఛార్జింగ్ కోసం వెయింట్ చేయాల్సిన అవసరం ఉండదు. ఈవీ వాహనదారుల జర్నీ మరింత సులభం అవుతుంది. కంపెనీ ఛైర్మన్ వాంగ్ చువాన్ఫు ప్రకారం, కొత్త బ్లేడ్ బ్యాటరీ అత్యంత చల్లని వాతావరణంలో కూడా అద్భుతంగా పని చేస్తుందన్నారు. ఈ బ్యాటరీ -30°C వంటి గడ్డకట్టే చలిలో కూడా కేవలం 12 నిమిషాల్లో 10 శాతం నుంచి 97 శాతం వరకు ఛార్జింగ్ అవుతుంది.
1000 కిలోమీటర్ల కంటే ఎక్కువ రేంజ్ ఇస్తుందన్న కంపెనీ
కొత్త బ్లేడ్ బ్యాటరీ 'ఎనర్జీ ఎఫిషియెన్సీ'ని (Energy Efficiency) గతంతో పోలిస్తే మరింత మెరుగుపరిచారు. బీవైడీ కంపెనీ ప్రకారం, దీని ఎనర్జీ డెన్సిటీ మొదటి జనరేషన్ బ్యాటరీ కంటే సుమారు 5 శాతం ఎక్కువగా ఉంది. దీనివల్ల కారు రేంజ్ కూడా పెరుగుతుంది. ఉదాహరణకు, DENZA Z9GT మోడల్ ఈ కొత్త బ్యాటరీతో సుమారు 1036 కిలోమీటర్ల వరకు నాన్ స్టాప్ జర్నీ ఇవ్వగలదు. దీనితో పాటు BYD 1500 kW అవుట్పుట్ కలిగిన ప్రపంచంలోనే అత్యంత శక్తివంతమైన ఫ్లాష్ ఛార్జర్ను కూడా మార్కెట్లోకి తీసుకొచ్చింది. దీనిపై ప్రపంచ వ్యాప్తంగా చర్చ జరుగుతోంది.
టాప్ హెడ్ లైన్స్
ట్రెండింగ్ వార్తలు
