IND vs SA 3rd T20: సొంతగడ్డపై సఫారీలపై 12 ఏళ్లుగా సిరీస్‌ లేదు! విశాఖ తీరంలో గాలి మళ్లేనా!!
IND vs SA 3rd T20: విశాఖలో జరిగే మూడో టీ20 గెలిస్తే 3-0తో సఫారీలు సిరీస్‌ ఎగరేసుకుపోతారు. మరి వారి జోరును పంత్‌ సేన అడ్డుకోగలదా?
IND vs SA 3rd T20: అంతర్జాతీయ క్రికెట్లో భారత గడ్డపై ఏ జట్టు అడుగుపెట్టినా భయపడుతుంది! ఒక్క దక్షిణాఫ్రికా తప్ప! అవును, మీరు చదువుతున్న స్టేట్‌మెంట్‌ కరెక్టే! 12 ఏళ్లుగా సఫారీలకు టీమ్‌ఇండియాపై తిరుగేలేదు. తాజాగా మరో సిరీస్‌ను బుట్టలో వేసుకొనేందుకు వారు రెడీగా ఉన్నారు. విశాఖలో జరిగే మూడో టీ20 గెలిస్తే చాలు. 3-0తో సిరీస్‌ ఎగరేసుకుపోతారు. మరి సఫారీల జోరును పంత్‌ సేన అడ్డుకోగలదా? తిరిగి మూమెంటమ్‌ అందుకోగలదా?
విశాఖలో డేంజరే!
ఐదు టీ20ల సిరీసులో దక్షిణాఫ్రికా 2-0తో పైచేయి సాధించింది. ఇప్పుడు నిర్ణయాత్మకమైన మూడో మ్యాచుకు సిద్ధమైంది. విశాఖ తీరాన జరిగే ఈ మ్యాచ్‌ టీమ్‌ఇండియాకు అత్యంత కీలకం. పిచ్‌, వాతావరణ పరిస్థితులు మాత్రం పంత్‌ సేనకు అనుకూలంగా లేవు. ఇప్పటి వరకు ఇక్కడ రెండే టీ20ల జరిగితే రెండూ లో స్కోరింగ్‌ గేమ్సే! రెండింట్లోనూ ఛేదన జట్టే గెలిచింది. 2016లో లంకేయులను 82కే కట్టడి చేసిన భారత్‌ 14 ఓవర్లకే విజయం అందుకుంది. 2019లో టీమ్‌ఇండియాను 126/7కు నియంత్రించిన ఆసీస్‌ 3 వికెట్ల తేడాతో గెలుపు తలుపు తట్టింది. స్పిన్నర్లు, పేసర్లకు పిచ్‌ సహకరిస్తుంది. వర్షం పడే సూచనలు ఉన్నాయి. ఉక్కపోత ఎక్కువ కాబట్టి రెండో ఇన్నింగ్‌లో బంతిపై పట్టు చిక్కదు. అంటే టాస్‌ గెలిస్తే దాదాపుగా మ్యాచ్‌ గెలిచినట్టే!
దీపక్‌ హుడా ఎంట్రీ?
సీనియర్లకు విశ్రాంతినిచ్చిన ఈ సిరీసులో కుర్రాళ్లు అంచనాలను అందుకోవడం లేదు. కెప్టెన్‌ రిషభ్ పంత్‌కు పరీక్షలు ఎదురవుతున్నాయి. భువనేశ్వర్‌ కుమార్‌ చివరి మ్యాచులో 3 వికెట్లు తీసి లయ అందుకున్నాడు. విశాఖలోనూ ప్రమాదకరంగానే ఉంటాడు. అవేశ్‌ ఫర్వాలేదు. హర్షల్‌ పటేల్‌ వైవిధ్యం సరిపోవడం లేదు. వీరిద్దరూ వికెట్లు తీయడం అవసరం. ఈ మ్యాచులో అర్షదీప్‌ లేదా ఉమ్రాన్‌ మాలిక్‌కు ఎవరో ఒకరు చోటివ్వక తప్పదు. యూజీ, అక్షర్ పటేల్‌ స్పిన్‌లో పస కనిపించడం లేదు. ఇషాన్‌ ఓపెనింగ్‌ సూపర్‌. రుతురాజ్‌ అవకాశాలను సద్వినియోగం చేసుకోవడం లేదు. స్పిన్‌లో దుమ్మురేపుతున్న శ్రేయస్‌ పేస్‌కు ఇబ్బంది పడుతున్నాడు. బహుశా అతడి స్థానంలో దీపక్‌ హుడాను తీసుకోవచ్చు. హార్దిక్‌, డీకే, అక్షర్, పంత్‌ మెరుగ్గా బ్యాటింగ్‌ చేయాలి.
ఎవరో ఒకరు!
పర్యాటక సఫారీలు సరికొత్త ఉత్సాహంతో ఉన్నారు. ఎవరో ఒకరు మ్యాచులో దూకుడుగా ఆడి మూమెంటమ్‌ షిఫ్ట్‌ చేస్తున్నారు. తొలి మ్యాచులో వాండర్‌ డుసెన్‌, రెండో మ్యాచులో హెన్రిచ్‌ క్లాసెన్‌ అలాంటి ఇన్నింగ్సులు ఆడారు. డేవిడ్‌ మిల్లర్‌ మాత్రం అస్సలు ఔటవ్వకుండా యాంకర్‌ రోల్‌ ప్లే చేస్తున్నాడు. మణికట్టు గాయంతో ఉన్న డికాక్‌ కోలుకుంటే రెజా హెండ్రిక్స్‌ బయటకు వెళ్లక తప్పదు. తెంబా బవుమా నిలకడగా ఆడుతున్నా స్ట్రైక్‌రేట్ తక్కువగా ఉంది. డ్వేన్‌ ప్రిటోరియస్‌ ఫ్లోటర్‌గా ఆకట్టుకుంటున్నాడు. రబాడా, నోకియా, పర్నెల్‌ బౌలింగ్‌ బాగుంది. 12 ఏళ్లుగా భారత గడ్డపై సఫారీలు ఒక్క సిరీసైనా ఓడిపోలేదు. ఈ మ్యాచ్‌ గెలిస్తే మరోటి వారి ఖాతాలో చేరుతుంది.
IND vs SA 3rd T20 Probable Playing XI
భారత్‌: ఇషాన్‌ కిషన్‌, రుతురాజ్‌ గైక్వాడ్‌, దీపక్‌ హుడా / శ్రేయస్‌ అయ్యర్‌, రిషభ్ పంత్‌, హార్దిక్‌ పాండ్య, దినేశ్‌ కార్తీక్‌, అక్షర్ పటేల్‌, హర్షల్‌ పటేల్‌, అవేశ్‌ ఖాన్‌, భువనేశ్వర్‌ కుమార్‌, యుజ్వేంద్ర చాహల్‌
దక్షిణాఫ్రికా: రెజా హెండ్రిక్స్‌ తెంబా బవుమా, వాండర్‌ డుసెన్‌, డేవిడ్‌ మిల్లర్‌, హెన్రిచ్‌ క్లాసెన్‌, డ్వేన్‌ ప్రిటోరియస్‌, వేన్‌ పర్నెల్‌, రబాడా, లుంగి ఎంగిడి / కేశవ్‌ మహరాజ్‌, ఆన్రిచ్‌ నోకియా, తబ్రైజ్‌ శంషి
టాప్ హెడ్ లైన్స్
ట్రెండింగ్ వార్తలు
