Ahmedabad Franchise: అహ్మదాబాద్.. ఇలా అయితే ఎలా.. ఐపీఎల్ 2022లో కష్టమే!

ఐపీఎల్ 2022లో అహ్మదాబాద్ ఆడుతుందో, లేదో అన్న విషయంపై ఇంకా క్లారిటీ కాలేదు. కారణం ఏంటంటే?

వచ్చే సంవత్సరం ఐపీఎల్‌లో అహ్మదాబాద్ ఫ్రాంచైజీ పాల్గొంటుందా లేదా అనే విషయంపై సందిగ్థం నెలకొంది.

హార్దిక్ పాండ్యా, కృనాల్ పాండ్యా, శ్రేయస్ అయ్యర్, శిఖర్ ధావన్‌లను అహ్మదాబాద్ ఫ్రాంచైజీ తీసుకోనుందని వార్తలు వస్తున్న సంగతి తెలిసిందే. అయితే తాజాగా వస్తున్న కథనాల ప్రకారం.. అహ్మదాబాద్ ఫ్రాంచైజీ వచ్చే ఐపీఎల్ ఆడేది లేనిది అనుమానమే అని తెలుస్తోంది. 2022 సీజన్‌కు ఐపీఎల్ మెగా వేలానికి కొన్ని రోజుల ముందు పరిస్థితి ఇది.

కొన్నిరోజుల క్రితం బీసీసీఐ అహ్మదాబాద్, లక్నో ఫ్రాంచైజీలు ఐపీఎల్ 2022 సీజన్‌లో పాల్గొంటాయని ప్రకటించిన సంగతి తెలిసిందే. ఇప్పుడు వస్తున్న కథనాల ప్రకారం ఐరీలియా కంపెనీ ప్రైవేట్ లిమిటెడ్(సీవీసీ క్యాపిటల్ భాగస్వాములు) ఐపీఎల్ టీమ్ నిర్వహించేందుకు బీసీసీఐ ఇంకా అనుమతులు ఇవ్వాల్సి ఉంది.

అక్టోబర్ 25వ తేదీన రూ.5,625 కోట్ల బిడ్‌తో అహ్మదాబాద్ ఫ్రాంచైజీని సీవీసీ క్యాపిటల్ పొందింది. అయితే ఈ సంస్థ ఒక బెట్టింగ్ కంపెనీలో పెట్టుబడులు పెట్టినట్లు వార్తలు వస్తున్నాయి. దీంతో ఈ కంపెనీ ఐపీఎల్‌లో పాల్గొనేందుకు బీసీసీఐ అనుమతులు ఇస్తుందో లేదో చూడాలి.

అయితే దీనిపై బీసీసీఐ ఇంతవరకు ఎటువంటి అధికారిక ప్రకటనా చేయలేదు. మెగా ఆక్షన్‌లోపు దీనిపై ఏమైనా ప్రకటన వస్తుందేమో చూడాలి.

ఐపీఎల్ 2022 ఆటగాళ్ల రిటెన్షన్ గడువు నవంబర్ 30వ తేదీతో ముగియనుంది. తాము రిటైన్ చేసుకోవాలనుకుంటున్న ఆటగాళ్ల జాబితాను గడువు లోపే సమర్పించాలని బీసీసీఐ అన్ని ఫ్రాంచైజీలను కోరింది. అహ్మదాబాద్, లక్నో ఫ్రాంచైజీలకు డిసెంబర్ 25వ తేదీ వరకు ముగ్గురు ఆటగాళ్లను ఎంచుకునేందుకు సమయం ఉంటుంది. ఆ తర్వాత మెగా ఆక్షన్ జరగనుంది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి