BJP Office: నాంపల్లిలోని బీజేపీ ఆఫీసు మెరుపు ముట్టడికి కాంగ్రెస్ నేతల యత్నం.. ఉద్రిక్తత

ఉత్తర్‌ప్రదేశ్‌లోని లఖింపుర్‌లో రైతులు నిరసన తెలుపుతుంటే మంత్రి వాహనం దూసుకెళ్లిన ఘటనలో 8 మంది చనిపోయారు. ఈ ఘటనపై బీజేపీ ప్రభుత్వాన్ని కాంగ్రెస్ నాయకురాలు ప్రియాంక గాంధీ నిలదీశారు.

కాంగ్రెస్ నాయకురాలు ప్రియాంక గాంధీ యూపీలోని లఖింపుర్ వెళ్లే ప్రయత్నం చేయగా పోలీసులు ఆమెను అరెస్ట్ చేశారు. బాధితులను కలుసుకుని పరామర్శించాలనే ప్రయత్నాన్ని అడ్డుకుని, ప్రియాంక గాంధీని అరెస్ట్ చేయడంపై తెలంగాణ కాంగ్రెస్ నేతలు మండిపడుతున్నారు.

యూపీలో సీఎం యోగి ఆదిత్యనాథ్ అరాచక పాలన సాగుతుందన్నారు టీపీసీసీ వర్కింగ్ ప్రసిడెంట్ మహేష్ కుమార్. ఈ క్రమంలో నాంపల్లిలోని బీజేపీ కార్యాలయం ముట్టడికి పిలుపునిచ్చారు.

బీజేపీ కార్యాలయంలోకి చొచ్చుకుపోయేందుకు కాంగ్రెస్ కార్యకర్తలు భారీ సంఖ్యలో అక్కడికి చేరుకున్నారు. దాంతో బీజేపీ కార్యాలయం వద్ద తీవ్ర ఉద్రిక్తత నెలకొంది. కాంగ్రెస్ పార్టీ కార్యకర్తలను పోలీసులు అడ్డుకుని అరెస్ట్ చేశారు. నేతలు, కార్యకర్తలను బేగంబజార్ పోలీస్ స్టేషన్ కు తరలించారు.