Nagarjun Sagar: సాగర్ గేట్లు ఓపెన్.. పోటెత్తుతున్న పర్యటకులు, ఆ సోయగాలు మీరూ చూసేయండి

విద్యుత్ కాంతుల్లో నాగార్జున సాగర్ ప్రాజెక్టు

నాగార్జున సాగర్ జలాశయం 590 అడుగుల గరిష్ఠ నీటి మట్టానికి చేరుకోవడంతో డ్యామ్ అధికారులు ప్రాజెక్టు గేట్లను ఎత్తి దిగువకు నీటిని విడుదల చేస్తున్నారు. ఎగువ నుంచి 5 లక్షల 14 వేల క్యూసెక్కుల నీరు ఇన్ ఫ్లో వస్తుంది.

1 లక్షా 30 వేల క్యూసెక్కుల నీటిని దిగువకు వదులుతున్నారు. గేట్లు తెరుచుకోవడంతో నాగార్జున సాగర్‌కు పర్యటకులు పోటెత్తుతున్నారు.

దీంతో ఆ ప్రాంతం అంతా సందడిగా మారింది. పెద్ద సంఖ్యలో ప్రాజెక్టు వద్దకు చేరుకొని కృష్ణమ్మ సోయగాలను జనం ఆస్వాదిస్తున్నారు.

ముఖ్యంగా రాత్రి వేళ విద్యుత్ కాంతుల్లో ప్రాజెక్టు మరింత శోభను సంతరించుకుంది.

నాగార్జున సాగర్ జలాశయం పూర్తి స్థాయి నీటి మట్టం 590 అడుగులు. అయితే, ప్రస్తుతం 584 అడుగులకు నీరు చేరింది. ఇంకా ఇన్ ఫ్లో అధికం అవుతుండడంతో గేట్లు తెరిచారు.

నాగార్జున సాగర్ మొత్తం 26 గేట్లకు 22 గేట్లు ఎత్తి నీటికి దిగువకు విడుదల చేస్తున్నారు. పర్యటకులతో సాగర్ ప్రాంత పరిసరాలు కోలాహలంగా మారాయి.

కనుచూపు మేర నీళ్లే కనిపిస్తూ జలాశయం మొత్తం నిండుకుండను తలపిస్తోంది.

శ్రీశైలం ప్రాజెక్టుకు కూడా అన్ని గేట్లూ ఎత్తేయడంతో ప్రాజెక్టుకు పర్యటకుల తాకిడి పెరిగింది. అందులోనూ ఆదివారం కావడంతో జనం బాగా వచ్చారు. దీంతో భారీగా ట్రాఫిక్ జామ్ ఏర్పడింది.

సున్నిపెంట నుంచి దోమలపెంట వరకు ఘాట్ రోడ్డులో సుమారు 5 కిలో మీటర్ల మేర ట్రాఫిక్ జామ్ అయింది. దీంతో వాహనదారులు ఇబ్బంది పడ్డారు. రోడ్డుకు ఇరువైపులా వాహనాలు నిలిచిపోయాయి.

ఎగువన కురిసిన భారీ వర్షాల వల్ల శ్రీశైలం ప్రాజెక్టుకు వరద వచ్చి చేరుతోంది. దీంతో ప్రాజెక్టు గేట్లను ఎత్తి నాగార్జున సాగర్‌కు నీటిని విడుదల చేస్తున్నారు.

స్వల్ప వ్యవధిలోనే శ్రీశైలం ప్రాజెక్టు నిండింది. 2007 తర్వాత జూలైలో ప్రాజెక్టు గేట్లు ఎత్తడం ఇదే తొలిసారి.

గత వారంలో ఒక్క రోజులోనే 28 టీఎంసీల నీరు శ్రీశైలం ప్రాజెక్టులోకి వచ్చింది. దీంతో ప్రాజెక్టు గేట్లను ఈసారి త్వరగా ఎత్తారు.