రిషి సునక్‌కు సవాళ్ల స్వాగతం- ద్రవ్యోల్బణం, ఆరోగ్య సంక్షోభంతోపాటు ఐదు పెద్ద సవాళ్లు ఇవే!

రిషి సునక్ ముందు ఆర్థిక సంక్షోభాన్ని పరిష్కరించాలి. ద్రవ్యోల్బణం 10 శాతానికిపైగా ఉంది.

రిషి సునక్‌

భారత సంతతికి చెందిన రిషి సునక్ బ్రిటన్ ప్రధానిగా ప్రమాణం చేయనున్నారు. బ్రిటన్ ప్రధానిగా ప్రమాణ స్వీకారం చేసిన వెంటనే ఆయనకు చాలా సవాళ్లు స్వాగతం పలుకుతున్నాయి. పెరుగుతున్న ద్రవ్యోల్బణం, కొనసాగుతున్న సమ్మెలు, ఆరోగ్య సంక్షోభం, ఐరోపాలో యుద్ధం వంటి అనేక సవాళ్లను ఆయన ఎదుర్కోవలసి ఉంటుంది. ఇది మాత్రమే కాదు, కన్జర్వేటివ్ పార్టీలోని చీలిక సమస్యను కూడా పరిష్కరించాలి. సునక్ మహర్షి పరిష్కారాన్ని కనుగొనవలసిన సమస్యలు ఏమిటో వివరంగా తెలుసుకుందాం.

ఆర్థిక, సామాజిక సంక్షోభం
రిషి సునక్ ముందు ఆర్థిక సంక్షోభాన్ని పరిష్కరించడానికి తగిన ప్రణాళిక సిద్ధం చేసుకోవాలి. ద్రవ్యోల్బణం 10 శాతానికిపైగా ఉంది. ఇది జి7 దేశల్లోనే అత్యధికం. రిషి సునక్‌కు మాంద్యం ప్రమాదం గురించి బాగా తెలుసు. అందుకే లిజ్ ట్రస్ ప్రభుత్వం పన్ను తగ్గింపు ప్రకటనపై ఆశ్చర్యం వ్యక్తం చేశారు.

వచ్చే కాలంలో పేదరికం, ఆర్థిక అనిశ్చితి ఉండదని బ్రిటన్ ప్రజలకు భరోసా ఇవ్వాల్సిన అవసరం సునక్ ఉంది. ఎందుకంటే రైలు డ్రైవర్లు, ఇతర రంగాలు ఇప్పటికే సమ్మెకు దిగాయి. నేషనల్ హెల్త్ సర్వీస్ పరిస్థితి కూడా దారుణంగా ఉంది. దీన్ని కూడా తక్షణే అడ్రెస్ చేయాల్సిన ప్రధాన సమస్యల్లో ఒకటి. 

12 సంవత్సరాలు అధికారంలో ఉన్న తరువాత, కన్జర్వేటివ్ పార్టీ మునుపెన్నడూ లేనంతగా చీలకలకు గురైంది. పరస్పర విభేదాలతో తలో దారిలో ఉన్నారు నాయకులు. సుమారు 60మంది మంత్రుల విశ్వాసాన్ని కోల్పోయిన తరువాత బోరిస్ జాన్సన్ జూలైలో రాజీనామా చేశారు. 2016 నుంచి డేవిడ్ కామెరాన్, థెరిసా మే, జాన్సన్, ట్రస్ తర్వాత ఐదో ప్రధానిగా సునక్‌ బాధ్యతలు చేపట్టనున్నారు.

చాలా మంది చట్టసభ్యులు సునక్‌కు మద్దతు ఇచ్చారు. కానీ ఇప్పుడు పార్టీని ఐక్యంగా ఉంచే సవాలును ఆయన ఎదుర్కోనున్నారు. పార్టీలో బోరిస్ అభిమానుల్లో ఇప్పటికీ ఒక వర్గం ఉంది. జాన్సన్ ప్రభుత్వ పతనంలో ప్రత్యర్థుల పాత్రపై వాళ్లు అనుమానం వ్యక్తం చేస్తున్నారు. వారందర్నీ అడ్రెస్ చేయాలి. 

ఉత్తర ఐర్లాండ్ సమస్య

2016లో యూరోపియన్ యూనియన్ నుంచి వైదొలగడానికి మద్దతు ఇచ్చిన సునక్ ఇప్పుడు ఉత్తర ఐర్లాండ్లో వాణిజ్య సమస్యల్ని ఎదుర్కోవాల్సి ఉంటుంది. ప్రస్తుతం పార్లమెంటు ద్వారా నడుస్తున్న ముసాయిదా బిల్లు ఒప్పందంలోని కొన్నింటి రద్దుకు ఆ దేశం పట్టుబడుతోంది. ఇది మంచిది కాదని ఇయు హెచ్చరించింది. అటువంటి పరిస్థితిలో ఉత్తర ఐర్లాండ్‌తో వాణిజ్యానికి సంబంధించి ఎలాంటి ఆలోచనలు చేస్తారనేది ప్రపంచమంతా ఆసక్తిగా చూస్తోంది. 

వలసల సమస్య 

బ్రెగ్జిట్ ప్రభుత్వం నుంచి వైదొలగిన తర్వాత వలసల సమస్య పెరిగింది. ఈ ఏడాది రికార్డు స్థాయిలో 37,570 మంది ఇంగ్లాండ్ చేరుకున్నారు. యుకెలో అక్రమంగా వచ్చే శరణార్థులను రువాండాకు పంపాలనే ప్రభుత్వ ప్రణాళికకు సునక్ మద్దతు ఇచ్చాడు, కానీ చట్టపరమైన ఇబ్బందులతో ఈ ప్రాజెక్టు నెలల తరబడి నిలిచిపోయింది. ఇప్పుడు వలసదారుల గురించి, బ్రిటన్ భవిష్యత్‌ కోసం ఒక నిర్ణయం తీసుకోవాల్సి ఉంటుంది.

విదేశాంగ విధానం

ఏ దేశ నాయకుడికైనా అతిపెద్ద సవాలు విదేశాంగ విధానం. సునక్ ప్రభుత్వంలో బ్రిటన్ ఎటువంటి విదేశాంగ విధానాన్ని ఎదుర్కొంటుందనేది ఆసక్తికరంగా మారింది. ఉక్రెయిన్-రష్యా యుద్ధంలో బ్రిటన్ పాత్ర ముఖ్యమైనది. ఉక్రెయిన్‌కు బ్రిటన్ ఆర్థిక సహాయం ఇవ్వడం కొనసాగిస్తుందా అనేది అతిపెద్ద ప్రశ్న.

యునైటెడ్ స్టేట్స్ మినహా మరే ఇతర దేశం చేయని సాయాన్ని ఉక్రెయిన్‌కు బ్రిటన్ చేస్తోంది. యుకె ఈ సంవత్సరం ఉక్రెయిన్ కు 2.3 బిలియన్ పౌండ్లు (2.6 బిలియన్ డాలర్లు) సైనిక సహాయం అందించింది.

చైనాపై సునక్ వైఖరి ఇప్పటికే స్పష్టమైంది. దేశీయ, ప్రపంచ భద్రతకు చైనా ముప్పు అని ఆయన అనేక సందర్భాల్లో ఆరోపించారు. భారతదేశంతో సత్సంబంధాలకు అనుకూలంగా ఉన్నారు. ఇటువంటి పరిస్థితిలో సునక్ విదేశాంగ విధానం ఇతర దేశాల గురించి ఎలా ఉంటుందనేది పెద్ద ప్రశ్న.