Iran Nuclear Enrichment: యుద్ధం ముంచుకొచ్చినా సరే, న్యూక్లియర్ మిషన్ కొనసాగుతుంది... ఇరాన్ మంత్రి ప్రకటన
Iran talks with US | ఇరాన్ విదేశాంగ మంత్రి అమెరికాతో చర్చలపై స్పందించారు. న్యూక్లియర్ మిషన్, యురేనియం సమృద్ధిపై వెనక్కి తగ్గేది లేదని స్పష్టం చేశారు.
టెహ్రాన్: యుద్ధం ముంచుకొచ్చినా సరే యురేనియం సమృద్ధిని (Uranium Enrichment) ఎప్పటికీ వదులుకోబోమని ఇరాన్ స్పష్టం చేసింది. ఇరాన్ విదేశాంగ మంత్రి ఆదివారం నాడు కీలక ప్రకటన చేశారు. టెహ్రాన్ లో జరిగిన ఒక కార్యక్రమంలో పాల్గొన్న సందర్భంగా అబ్బాస్ అరాఘ్చి మాట్లాడుతూ, ఇరాన్ తన శాంతియుత అణు కార్యక్రమం కోసం చాలా ఖర్చు చేసిందని గుర్తుచేశారు.
"మేము యురేనియం నిల్వలపై విజయం సాధించి తీరుతాం. ఈ విషయంలో ఒకవేళ యుద్ధం జరిగితే కూడా మా చర్యలను ఆపాలని భావించడం లేదు. ఎందుకంటే ఇరాన్ నిర్ణయాలను ప్రశ్నించే హక్కు ఎవరికీ లేదు" అని అన్నారు. అమెరికా ప్రతినిధి స్టీవ్ విట్కాఫ్ ను కలిసిన రెండు రోజుల తర్వాత ఇరాన్ విదేశాంగ మంత్రి ఈ ప్రకటన చేశారు.
ఇది టెహ్రాన్ హక్కు.. ఇరాన్ విదేశాంగ మంత్రి
అబ్బాస్ అరాఘ్చి మాట్లాడుతూ.. యురేనియం సమృద్ధి అనేది ఇరాన్ హక్కు. ఈ ప్రక్రియ కొనసాగుతుంది. ఈ అంశంపై ఒక ఒప్పందానికి రావడానికి ఇరాన్ సిద్ధంగా ఉందన్నారు. మస్కట్ లో జరిగిన చర్చలు గుడ్ బిగినింగ్ అని అన్నారు. అమెరికా ప్రతినిధి బృందంతో కలిసి పనిచేసే అవకాశం వచ్చిందని వెల్లడించారు. అయితే, నమ్మకం పెంచుకోవడానికి ఇంకా చాలా దూరం వెళ్లాల్సి ఉందని అభిప్రాయపడ్డారు. అమెరికాతో చర్చలను త్వరలో తిరిగి ప్రారంభించాల్సి ఉంటుందని తెలిపారు.
ఇరాన్ తో చర్చలను ప్రశంసించిన డొనాల్డ్ ట్రంప్
అమెరికా, ఇరాన్ మధ్య కొన్నేళ్ల నుంచి ఘర్షణ వాతావరణం నెలకొంది. ఇటీవల పరిస్థితులు మరింత దిగజారుతున్నాయి. ఇరాన్ తో జరిగిన చర్చలపై అమెరికా అధ్యక్షుడు డొనాల్డ్ ట్రంప్ పాజిటివ్ గా స్పందించారు. వచ్చే వారం మరో రౌండ్ మీటింగ్ జరిగే అవకాశం ఉందన్నారు. ఇందుకోసం అమెరికా ఒత్తిడిని కొనసాగిస్తోందని స్పష్టం చేశారు. ఇరాన్ తో వ్యాపారం చేసే దేశాలపై సుంకాలు విధించే కొత్త కార్యనిర్వాహక ఉత్తర్వులపై ట్రంప్ సంతకం చేశారు. ఇరాన్ చమురు ఎగుమతులకు సంబంధించిన షిప్పింగ్ సంస్థలు, నౌకలను లక్ష్యంగా చేసుకుని ట్రంప్ కొత్త ఆంక్షలు విధించారు.
వీటితోపాటు విట్కాఫ్, జారెడ్ కుష్నర్ అరేబియా సముద్రంలో మోహరించిన యుఎస్ఎస్ అబ్రహం లింకన్ యుద్ధనౌకను సందర్శించారు. అమెరికా సెంట్రల్ కమాండ్ ఈ విషయాన్ని ప్రజలకు తెలిపింది. ఇరాన్ విదేశాంగ మంత్రి మాట్లాడుతూ, అమెరికా దాడికి ప్రయత్నిస్తే కనుక తాము సైతం అమెరికా స్థావరాలపై దాడికి సిద్ధమని పేర్కొన్నారు. ఇరాన్ ప్రయోజనాలపై తగ్గేది లేదన్నారు. మిస్సైల్ ప్రయోగం కార్యక్రమంపై చర్చించే అవకాశమే లేదన్నారు. ఇది తమ దేశ జాతీయ భద్రతకు సంబంధించిన విషయంగా పేర్కొన్నారు.
టాప్ హెడ్ లైన్స్
ట్రెండింగ్ వార్తలు
