Viral News: వీడు వరుడేనా ? రోటీలు ఆలస్యంగా పెట్టారని పెళ్లి రద్దు చేసుకున్నాడు - జైలుకెళ్తున్నాడు !

UP groom: పెళ్లికి అంతా రెడీ అయింది కానీ చపాతీలు పెట్టడం ఆలస్యం అయిందని పెళ్లికొడుకు వెళ్లిపోయాడు. దీంతో వధువు కుటుంబం పోలీసులకు ఫిర్యాదు చేసింది.

చపాతీలు ఆలస్యంగా పెట్టాలని పెళ్లి మండపం నుంచి వెళ్లిపోయిన వరుడు

Source : x

UP groom calls off wedding over delay in serving rotis: కట్నం సమయానికి ఇవ్వలేదని పెళ్లి రద్దు చేసుకునేవాళ్లను చూసి ఉంటాం కానీ రోటీలు ఆలస్యంగా పెట్టారని అలిగి వెళ్లిపోయే వరుళ్లు అరుదుగా ఉంటారు. యూపీలోని చందౌలీలో ఇలాంటి పెళ్లికొడుకు ఉన్నాడు. పెళ్లి ముహుర్తానికి మండపానికి చేరుకోవాల్సిన వ్యక్తి  చపాతీలు తినేసి.. ఆ తర్వాత ఆ చపాతీల్ని ఆలస్యంగా ఇచ్చారని అలిగి వెళ్లిపోయాడు. అతన్ని బుజ్జగించడానికి చేసిన ప్రయత్నాలు విఫలమయ్యాయి. 

అయితే అతను ఇలా పెళ్లి మండపం నుంచి తాళి కట్టే సమయంలో పారిపోవడానికి చపాతీలు ఆలస్యం కాదని కుట్ర ఏదోఉందని వధువు తరపు తల్లిదండ్రులు అనుమానించారు. ఎందుకంటే అప్పటికే ఆ వరుడికి లక్షన్నర డబ్బులు ఇచ్చారు. పెళ్లి పనులు, ఇతర ఖర్చుల కోసం మొత్తంగా ఏడు లక్షల రూపాయలు ఖర్చు పెట్టారు. ఇంత చేసిన తర్వాత చపాతీలు ఆలస్యం అయ్యాయని అలిగి వెళ్లిపోవడం నమ్మశక్యంగా లేదని చర్చించుకున్నారు. అందుకే ఇంటికి వెళ్లి మాట్లాడాలనుకున్నారు.                       

తర్వాత రోజు పెళ్లి పెద్దలంతా కలిసి వరుడు ఇంటికి వెళ్లే సరికి సందడిగా ఉంది. ఏంటా అని ఆరా తీస్తే వరుడికి మరో పెళ్లి చేసేశారు. తమ బంధువుల అమ్మాయిని అప్పటికే పెళ్లి చేసేసుకున్నాడు. అంటే కావాలని కుట్ర పూరితంగా డబ్బులు తీసుకుని ఏదో ఓ కారణంగా చెప్పి పెళ్లి ఎగ్గొట్టి ఇంటికి వచ్చేది తర్వాత రోజే తన బంధువు అయిన అమ్మాయిని పెళ్లి చేసుకోవడానికి ఆ కంత్రీ పెళ్లి కొడుకు ప్లాన్ చేసుకున్నాడని సులువుగా అర్థమైపోతుంది. అందుకే వధువు తల్లిదండ్రులు వెంటనే పోలీసుల్ని ఆశ్రయించారు. 

వరుడికి అతని బంధువు అయిన అమ్మాయితో ముందు నుంచీ సంబంధం ఉందని.. కట్నం కోసం మోసం చేయాలన్న ఉద్దేశంతోనే వేరే ఊరి సంబంధాన్ని మాట్లాడుకున్నారని అనుమానిస్తున్నారు. అందుకే ఏదో ఓ కారణంతో గొడవ పెట్టుకోవడానికి ప్రయత్నించి ఏదీ దొరక్క చివరికి చపాతీలు ఆలస్యమయ్యాని చెప్పిన తన స్నేహితులతో కకలి రచ్చ చేసి వెళ్లిపోయాడని భావిస్తున్నారు.                          

ఇక్కడ విషయం ఏమిటంటే ఆ వరుడు పెళ్లికి తనతో పాటు రెండు వందల మందిని తీసుకు వచ్చాడు. వారంతా విందు వినోదాల్లో వధువు తరపు వారి ఖర్చులతోనే మునిగితేలారు.  వివాహ వేడుక రద్దు చేసుకోవడం వల్ల  తమ కుటుంబానికి రూ.7 లక్షల నష్టం వాటిల్లిందని వరుడు వేరొకరితో పెళ్లి చేసుకున్నాడని తెలుసుకున్న వధువు కుటుంబ సభ్యులు పోలీసులకు ఫిర్యాదు చేశారు.