Engineer Sells Train Engine: ఏకంగా రైలు ఇంజిన్‌నే కొట్టేశారు..! అదెలా అంటారా? అదే అసలు ట్విస్ట్!

నగలు, డబ్బు, సామాన్లు ఇలా అన్నింటిని దొంగతనం చేసిన వార్తలు మనం వినే ఉంటాం. కానీ బిహార్‌లో ఏకంగా ఓ రైలు ఇంజిన్‌నే దొంగతనం చేశారు.

ఏకంగా రైలు ఇంజిన్‌నే కొట్టేశారు

కొంతమంది దొంగలు దొరికితే బాత్రూంలో పెనాయిల్ కూడా పట్టికెళ్లిపోతారు. కానీ ఓ వ్యక్తి ఏకంగా ఓ రైలు ఇంజిన్‌నే దొంగతనం చేశాడు. అదేలా సాధ్యం అనుకుంటున్నారా? మరదే ట్విస్ట్. ఇంతకీ ఆ వ్యక్తి పని చేసేది కూడా ర్వైల్వేశాఖలోనే. ప్రస్తుతం ఈ వార్త వైరల్ అవుతోంది.

అదెలా?

బిహార్​ పుర్ణియా కోర్ట్​ రైల్వే స్టేషన్​ పరిధిలో ఉన్న సమస్తిపుర్​ లోకో డీజిల్ షెడ్​లో రాజీవ్​ రంజన్​ ఝా అనే అతను ఇంజినీర్​గా పనిచేస్తున్నాడు. అతను పనిచేసే స్టేషన్​లో చిన్నరైల్వే ట్రాక్​పై తిరిగే ఓ పాత రైలు ఇంజిన్​ ఉంది. దానిపై కన్నేసిన రాజీవ్.. పై అధికారులు నుంచి వచ్చినట్లు నకిలీ ధ్రువపత్రాలను సృష్టించేశాడు. 

పాత సామాన్లకు..

నకిలీ ధ్రువపత్రాలను సృష్టించిన రాజీవ్ డిసెంబర్ 14న గ్యాస్ కట్టర్​తో రైలు ఇంజిన్​ను ముక్కలుగా చేసేశాడు. ఇందుకు ఓ హెల్పర్ కూడా అతనికి సాయం చేశాడు. కొంతమంది అధికారులు దాన్ని అడ్డుకునే సరికి నకిలీ ధ్రువపత్రాలను చూపించాడు. ఇంజిన్​ పాతదైపోయిందని, విడిభాగాలుగా చేసి డీజిల్​ షెడ్​కు తరలించాల్సిందిగా ఉన్నతాధికారులు అదేశించారని వారిని నమ్మించాడు.

ఆ పత్రాల ఆధారంతో ఏకంగా రైలు ఇంజిన్‌ను పాత సామాను కొనుగోలు చేసే వారికి అమ్మేశాడు రాజీవ్. ఇందు కోసం అతనికి స్థానిక పోలీస్​ ఇన్​స్పెక్టర్​, ఓ హెల్పర్ కూడా సహకరించారు.

ఎలా తెలిసింది?

రాజీవ్‌పై స్టేషన్ అధికారులకు అనుమానం రావడంతో డీజిల్​ షెడ్​కు వెళ్లి చూశారు. అక్కడ ఇంజిన్ పరికరాలు లేవు. ఇదే విషయంపై ఉన్నతాధికారులకు సమాచారం అందించారు. తమ నుంచి ఎలాంటి ఆదేశాలు రాలేదని వారు చెప్పారు. దీంతో స్టేషన్​ మాస్టర్, ఉద్యోగులు కలిసి ఆర్​పీఎఫ్ పోలీసులకు ఫిర్యాదు చేశారు. రంగంలోకి దిగిన పోలీసులు తమదైన స్టైల్‌లో విచారించేసరికి అసలు విషయం బయటకు వచ్చింది.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి