Chicken Karam Podi : సోషల్ మీడియాలో ట్రెండ్ అవుతోన్న చికెన్ కారం పొడి రెసిపీ.. ఇంట్లోనే, సింపుల్గా ఇలా చేసుకోండి
Andhra Chicken Karam Podi : చికెన్ కారం పొడి తినాలనుకుంటున్నారా ? అయితే ఇంట్లోనే దీనిని ఎలా చేసుకోవచ్చో.. కావాల్సిన పదార్థాలు ఏంటో ఇప్పుడు తెలుసుకుందాం.
- ఈ కారం పొడిని అన్నంలో కలుపుకుని నెలరోజుల పాటు నిల్వ చేసుకోవచ్చు.
Chicken Karam Podi Social Media Recipe : చికెన్తో వివిధ రకాల వంటలు చేసుకుంటారు. దాదాపు అన్ని చాలా రుచిగా ఉంటాయి. అయితే ఈ మధ్య సోషల్ మీడియోలో చికెన్ కారం పొడి బాగా ఫేమస్ అయింది. రుచిగా చేసుకోవడానికి కాదేది అనర్హం అంటూ.. చికెన్తో కారం పొడి చేస్తున్నారు. ప్రస్తుతం ఈ వంటకం సోషల్ మీడియాలో బాగా వైరల్ అవుతుంది. మరి ఈ టేస్టీ, సింపుల్ రెసిపీని ఎలా చేసుకోవాలో.. కావాల్సిన పదార్థాలు ఏంటో ఇప్పుడు తెలుసుకుందాం.
కావాల్సిన పదార్థాలు
ఉల్లిపాయలు - 2 పెద్ద ఉల్లిపాయలు
కరివేపాకు - మీకు నచ్చినంత
వెల్లుల్లి - 15 రెబ్బలు
చికెన్ - 250 గ్రాములు (బోన్స్ లేనిది)
ఎండుమిర్చి - 10 నుంచి 15
ఘరం మసాలా - 1 టేబుల్ స్పూన్
మిరియాలు - చిటికెడు
ఉప్పు - రుచికి తగినంత
నూనె- డీప్ ఫ్రైకి సరిపడేంత
తయారీ విధానం
ముందుగా బోన్లెస్ చికెన్ తీసుకోవాలి. ఉల్లిపాయలు పొట్టు తీసి.. పెద్ద ముక్కలుగా కోసి పెట్టుకోవాలి. వెల్లుల్లి పొట్టు తీసి రెడీగా పెట్టుకోవాలి. ఇప్పుడు స్టౌవ్ వెలిగించి దానిపై కడాయి పెట్టాలి. డీప్ ఫ్రైకి సరిపడేంత నూనె వేసుకోవాలి. దానిలో చికెన్ ముక్కలు వేసుకుని పైన గోల్డెన్ కలర్ వచ్చి క్రిస్పీగా వేయించుకోవాలి. చికెన్ అన్ని వైపులా బాగా వేగిన తర్వాత తీసేసి పక్కన పెట్టుకోవాలి.
ఇప్పుడు మిగిలినవి డీప్ ఫ్రై చేసుకోవాలి. అలా అని అన్నీ ఒకేసారి కాకుండా విడిగా వేయించుకోవాలి. ఉల్లిపాయ ముక్కలు మంచిగా ఫ్రై అయిన తర్వాత తీసేసి.. వెల్లుల్లి వేయించుకోవాలి. తర్వాత ఎండుమిర్చి వేయించుకోవాలి. కరివేపాకు కూడా ఫ్రై చేసుకోవాలి. అన్నింటినీ బాగా చల్లార్చుకోవాలి.
వేయించిన పదార్థాలు చల్లారిన తర్వాత చికెన్ కాకుండా మిగిలిన పదార్థాలన్నీ మిక్సీ జార్లో వేసుకుని మిక్సీ చేసుకోవాలి. అవి బాగా గ్రైండ్ అయినా తర్వాత చికెన్ను చిన్న ముక్కలుగా కట్ చేసుకుని.. ఆ మిశ్రమంలో వేసి గ్రైండ్ చేసుకోవాలి. ఇప్పుడు దానిలో ఘరం మసాలా, రుచికి తగినంత ఉప్పు వేసుకుని మరోసారి గ్రైండ్ చేసుకోవాలి. అంతే టేస్టీ టేస్టీ చికెన్ కారం పొడి రెడీ.
దీనిని మీరు వేడి వేడి అన్నంలో వేసుకుని హాయిగా లాగించేయవచ్చు. అయితే దీనిని బయట కాకుండా ఎయిర్ టైట్ కంటైనర్లో వేసి.. ఫ్రిడ్జ్లో పెట్టుకోవాలి. ఇలా స్టోర్ చేసి పెట్టుకుంటే నెలరోజుల పాటు నిల్వ ఉంటుంది. మరి ఇంకెందుకు ఆలస్యం మీరు కూడా ఈ చికెన్ కారం పొడిని ట్రై చేసేయండి.
టాప్ హెడ్ లైన్స్
ట్రెండింగ్ వార్తలు
