MLA Prem Sagar Rao: మంచిర్యాల అభివృద్ధిని చూసి ఓర్వలేక అవినీతి ఆరోపణలు, 2015లోనే లోన్ చెల్లించా: ఎమ్మెల్యే ప్రేమ్ సాగర్ రావు

Congress MLA Premsagar Rao | మంచిర్యాల ఎమ్మెల్యే ప్రేమ్ సాగర్ రావు ప్రతిపక్షాల ఆరోపణలను తీవ్రంగా ఖండించారు. బ్యాంకుల వద్ద తీసుకున్న లోన్లను 2015లోనే తిరిగి చెల్లించాలని స్పష్టం చేశారు.

మీడియాతో మాట్లాడుతున్న మంచిర్యాల ఎమ్మెల్యే ప్రేమ్ సాగర్ రావు

Source : Abp desam

Show Quick Read

Key points generated by AI, verified by newsroom

• ప్రేమ్ సాగర్ రావు ప్రతిపక్షాల అవినీతి ఆరోపణలను ఖండించారు.
• గూడెం ఆలయం, రూ.250 కోట్ల ఆసుపత్రి పనులు పురోగతిలో.
• ఎల్లంపల్లి నుండి గూడెం పర్యాటక అభివృద్ధికి ప్రణాళికలు.
• మంచిర్యాల గ్రేడ్-1 కార్పొరేషన్‌గా మారే ప్రతిపాదనలు సిద్ధం.

Mancherial Latest News | మంచిర్యాల: తన నియోజకవర్గంలో జరుగుతున్న అభివృద్ధినే సహించలేక ప్రతిపక్ష నేతలు తనపై అసత్యాలు ప్రచారం చేస్తున్నారని మంచిర్యాల ఎమ్మెల్యే కొక్కిరాల ప్రేమ్ సాగర్ రావు మండిపడ్డారు. మంచిర్యాల పట్టణంలోని ఒక హాలులో మేయర్ దర్ని మధుకర్, స్థానిక ప్రజాప్రతినిధులు, కాంగ్రెస్ పార్టీ నాయకులతో కలిసి నిర్వహించిన మీడియా సమావేశంలో కాంగ్రెస్ ఎమ్మెల్యే ప్రేమ్ సాగర్ రావు మాట్లాడారు. రూ. 98 కోట్లతో గూడెం సత్యనారాయణ స్వామి దేవస్థాన నిర్మాణం, రూ. 4.94 కోట్లతో విశ్వనాథ ఆలయాభివృద్ధి పనులు వేగంగా సాగుతున్నాయని వివరించారు. వచ్చే ఏడాది జరగనున్న గోదావరి పుష్కరాల లోపే గూడెం ఆలయ నిర్మాణాన్ని పూర్తి చేసి, ఎల్లంపల్లి నుండి గూడెం గోదావరి వరకు ఎకో టూరిజం, బోటింగ్, యానిమల్ సఫారీ కేంద్రాలను అందుబాటులోకి తెస్తామని తెలిపారు. 

ఐపీఎస్ వందసార్లు చెబితే అబద్ధం నిజం అయిపోతుందా..

ఇటీవల కురిసిన భారీ వర్షాలకు రాళ్ళవాగు వద్ద తాగునీటి పైప్‌లైన్ ధ్వంసమైందని, వాగు ఉధృతి ఎక్కువగా ఉండటంతో వెంటనే మరమ్మతులు చేయడం వీలుకాలేదని చెప్పారు. యుద్ధప్రాతిపదికన పనులు చేపట్టి, సాధ్యమైనంత త్వరగా మంచిర్యాల పట్టణ ప్రజలకు తాగునీటి సరఫరాను పునరుద్ధరిస్తామని హామీ ఇచ్చారు. అలాగే తాను రూ. 450 కోట్లు అప్పు తీసుకుని అవినీతికి పాల్పడ్డానంటూ బిఆర్ఎస్, బిజెపి నాయకులు తప్పుడు ప్రచారం చేస్తున్నారని మండిపడ్డారు. కానీ తాను వివిధ బ్యాంకుల నుంచి రూ. 109.11 కోట్లు మాత్రమే అప్పు తీసుకుని, 2015 ఏప్రిల్ 15 నాటికే వాటిని పూర్తిగా చెల్లించానని స్పష్టం చేశారు. ఐపీఎస్ పాస్ అయిన వ్యక్తి ఒక అబద్ధాన్ని వంద సార్లు చెప్పి నిజం అనిపించేలా ప్రయత్నిస్తున్నారని ప్రేమ్ సాగర్ రావు విమర్శించారు. తనకున్న ప్రజాదరణను చూసి ఓర్వలేక కాకి లెక్కలతో తప్పుడు ఆరోపణలు చేస్తున్నారని, ప్రజలు వీటిని నమ్మే పరిస్థితిలో లేరని పేర్కొన్నారు.

బీజేపీ, బీఆర్ఎస్ విమర్శలు, ఆరోపణలకు కౌంటర్
తాను ఎమ్మెల్యే అయ్యాక భారీ సంపాదించి బ్యాంకులకు లోన్లు తిరిగి చెల్లించానన్న ఆరోపణల్లో వాస్తవం లేదన్నారు. బీజేపీ, బీఆర్ఎస్ నేతలు ఉద్దేశపూర్వకంగా తనపై అవినీతి, అధికార దుర్వినయోగం ఆరోపణలు చేస్తున్నారని ఎమ్మెల్యే ప్రేమ్ సాగర్ రావు అన్నారు. వివిధ బ్యాంకుల నుండి భారీగా అప్పు తీసుకుని అవినీతికి పాల్పడ్డారంటూ ప్రతిపక్షాలు ఆరోపిస్తున్నాయి. కానీ తాను తీసుకున్నది రూ. 109.11 కోట్ల అప్పు అని, గతంలో తీసుకున్న ఆ బకాయిలను 2015 ఏప్రిల్ 15 నాటికే బ్యాంకులకు తిరిగి చెల్లించినట్లు తెలిపారు. నియోజకవర్గంలో జరుగుతున్న అభివృద్ధి చూసి ఓర్వలేక దుష్ప్రచారం చేస్తున్నారంటూ ప్రతిపక్షాలపై మండిపడ్డారు. తనపై ఆరోపణలు చేసినంత మాత్రాన నియోజవర్గంలో అభివృద్ధి అడ్డుకోలేరని, ప్రజలు అన్నీ గమనిస్తూరంటూ స్ట్రాంగ్ కౌంటర్ ఇచ్చారు.

మంచిర్యాల మున్సిపల్ కార్పొరేషన్ ప్రతిపాదన
మంచిర్యాల, నస్పూర్ మున్సిపాలిటీలతో పాటు హాజీపూర్ మండలంలోని ఆరు గ్రామ పంచాయతీలను విలీనం చేసి మంచిర్యాలను గ్రేడ్-1 మున్సిపల్ కార్పొరేషన్‌గా అభివృద్ధి చేసేందుకు మాస్టర్ ప్లాన్ రూపొందిస్తున్నారు. నియోజకవర్గ పరిధిలో రూ. 250 కోట్లతో సూపర్ స్పెషాలిటీ ఆసుపత్రి, మాతా శిశు సంరక్షణ కేంద్రం, యంగ్ ఇండియా ఇంటిగ్రేటెడ్ రెసిడెన్షియల్ పాఠశాల నిర్మాణం కూడా కొనసాగుతోంది.