Kheer Recipes: పండుగలు ఏవైనా సరే, ఈ నాలుగు రకాల పాయసాలతో నోరు తీపి చేసుకోండి

పండుగ అంటే గుర్తొచ్చేది పాయసం. ఎందుకంటే నైవేద్యంగా ఎక్కువమంది ఆ దేవునికి సమర్పించేది పాయసాన్నే.

(Image credit: Youtube)

తెలుగింటిలో పండుగ వచ్చిందంటే చాలు.. తీపి పదార్థాలు వంటింట్లో రెడీ అయిపోతూ ఉంటాయి. ముఖ్యంగా పాయసం ప్రతి ఇంటిలో కనిపిస్తుంది. పాయసం అనగానే అందరూ సేమ్యాతో వండేదే అనుకుంటారు. కానీ సేమ్యాతోనే కాదు నాలుగు రకాలుగా ఈ పాయసాన్ని చేసుకోవచ్చు. ఇవి చాలా టేస్టీగా ఉంటాయి. వీటిని వండడం కూడా చాలా సులువు.

బియ్యం పాయసం 
దేవునికి సమర్పించేందుకు పరమాన్నాన్ని మించిన పవిత్ర నైవేద్యం లేదు. దీన్నే కాస్త మందంగా కాకుండా నీళ్లలా చేసుకుంటే టేస్టీ బియ్యం పాయసం రెడీ అయిపోతుంది.

ఈ పాయసం చేసేందుకు ఒక కప్పు బియ్యాన్ని శుభ్రంగా కడిగి 30 నిమిషాలు నీళ్లలో నానబెట్టాలి. స్టవ్ పై పాన్ పెట్టి నెయ్యి వేసి, డ్రై ఫ్రూట్స్, నట్స్ వేయించి తీసి పక్కన పెట్టుకోవాలి. అదే కళాయిలో ఒకటిన్నర లీటర్ పాలను వేసి వేడి చేయాలి. అవి మరుగుతున్నప్పుడు ఒక కప్పు బియ్యాన్ని, చక్కెరను, యాలకుల పొడిని జోడించాలి. చిన్న మంట మీద ఉడికిస్తే పాయసం చక్కగా తయారవుతుంది. చివర్లో ముందుగా వేయించిన డ్రై ఫ్రూట్స్ చల్లు కోవాలి.

డ్రై ఫ్రూట్స్ పాయసం
స్టవ్ మీద కళాయి పెట్టి నెయ్యి వేయాలి, ఆ నెయ్యిలో  పావుకప్పు బాదం పప్పులు, పావుకప్పు జీడిపప్పులు, నాలుగైదు ఎండు ద్రాక్షలు, అరకప్పు అంజీరు వేసి వేయించాలి. వాటిని చల్లార్చి మిక్సీలో వేసి పొడిగా చేసుకోవాలి. ఇప్పుడు స్టవ్ మీద కళాయి పెట్టి ఒక లీటరు పాలు వేసి మరిగించాలి. ఆ పాలలో క్రీం కూడా వేయాలి. తర్వాత అరకప్పు పంచదార వేసి కలపాలి. చిన్న మంట మీద మరిగిస్తే బాగా ఉడుకుతాయి.  పాలు సగం వరకు తగ్గేదాకా మరిగిస్తూ ఉండాలి. తర్వాత ముందుగా చేసుకున్న డ్రై ఫ్రూట్స్ పొడిని, యాలకుపొడిని వేసి మళ్లీ ఉడికించాలి. ఒక పావుగంటసేపు ఉడికిస్తే డ్రై ఫ్రూట్స్ పాయసం రెడీ అయిపోతుంది.

సగ్గుబియ్యం పాయసం
ముందుగా ఒక కప్పు సగ్గుబియ్యాన్ని గంట పాటు నీటిలో నానబెట్టాలి. స్టవ్ మీద కళాయి పెట్టి అందులో నెయ్యి వేసి డ్రై ఫ్రూట్స్, నట్స్ వేసి వేయించి పక్కన పెట్టుకోవాలి. ఆ కళాయిలో ఒకటిన్నర పాలను వేసి మరగనివ్వాలి. పాలు మరుగుతున్నప్పుడే యాలకుల పొడి, అరకప్పు పంచదార, నాలుగు కుంకుమపువ్వు రేకులు వేసి మరిగించాలి. ముందుగా నానబెట్టుకున్న సగ్గుబియ్యాన్ని పాలల్లో వేయాలి. చిన్న మంట మీద ఉడికించాలి. 20 నిమిషాలు ఉడికితే సగ్గుబియ్యం బాగా ఉడికిపోతాయి. మూడు టేబుల్ స్పూన్ల కండెన్స్‌డ్ మిల్క్ కూడా వేసి, మరి కాసేపు మరిగిస్తే ఘుమఘుమలాడిపోతుంది.

మఖానా కీర్
మార్కెట్లో దొరికే పూల్ మఖానాతో చక్కటి పాయసాలు చేసుకోవచ్చు. ఒక కప్పు పూల్ మఖానాను అరకప్పు నట్స్ తో కలిపి మిక్సీలో పొడి కొట్టుకోవాలి. నట్స్‌లో భాగంగా జీడిపప్పు, పిస్తా, బాదం ఇలా మీకు నచ్చినవి ఏవైనా తీసుకోవచ్చు. తర్వాత స్టవ్ మీద కళాయి పెట్టి ఒక లీటరు పాలు, ఒక కప్పు క్రీము, అరకప్పు పంచదార, రెండు మూడు కుంకుమపువ్వు రేకులు వేసి ఉడికించాలి. పాలు బాగా మరిగి పరిమాణం తగ్గడం మొదలవుతాయి. ఆ సమయంలో ముందుగా చేసి పెట్టుకున్న మఖానా పొడిని వేసి బాగా కలపాలి. చిన్న మంట మీద ఒక పావుగంట సేపు ఉడికిస్తే మఖానా పాయసం నైవేద్యానికి సిద్ధమైనట్టే.