Mothers Day Gifts: అమ్మకో అందమైన బహుమతి, తక్కువ బడ్జెట్‌లోనే ఇవి దొరుకుతాయి

అమ్మ కోసం ఏం బహుమతి కొనాలా అని ఆలోచిస్తున్నారా? వీటిని ప్రయత్నించండి.

(Image credit: Pixabay)

తల్లి ప్రేమకు ప్రపంచంలోని ఏ ప్రేమ సాటిరాదు. అమ్మ ప్రేమ ముందు ఏదైనా తలవంచాల్సిందే. మనిషి స్వచ్ఛమైన ప్రేమ అందేది అమ్మ నుంచే. అమ్మకు బిడ్డ పట్ల ఆపేక్ష, ప్రేమ తప్ప... ఇంకే ఆశ ఉండదు. మన ఎంత ఎదిగినా ఆ తల్లి బిడ్డలమే అని మరిచిపోకూడదు. ఉద్యోగాల కోసం ఎంతో మంది అమ్మను ఊర్లోనే విడిచి దూర తీరాలకు వెళుతున్నారు. ఆధునిక కాలంలో ఎంత దూరంలో ఉన్నా దగ్గరలో ఉన్న ఫీలింగ్ అందించే  ఆధునిక పరికరాలు వచ్చాయి. రోజూ అమ్మతో మాట్లాడడం, అమ్మ బాగోగులు తెలుసుకోవడం, ఆమెకు కావాల్సినవి ఆర్డర్ పెట్టి పంపించడం వంటివి చేయాలి. వీలైతే మీరున్న చోటికే తల్లిదండ్రులను తీసుకెళ్లి చూసుకుంటే మరీ మంచిది. తల్లి కోసం మనం ఎంత చేసినా అది తక్కువే. ఆమె  తన ప్రాణాన్ని పణంగా పెట్టి మీకు ప్రాణం పోసింది. ప్రేమగా సాకి పెద్దవారిని చేసింది. ఆ త్యాగాలను స్మరించుకునేందుకే ప్రతి ఏటా వస్తుంది ‘అంతర్జాతీయ మాతృ దినోత్సవం’. ఆ రోజున ఆమెకు చిన్న బహుమతిని కొని పెట్టండి. ఎంతో సంతోషిస్తుంది. దీని కోసం వేలు, లక్షలు ఖర్చుపెట్టక్కర్లేదు. ఉద్యోగులైనా, విద్యార్థులైనా తక్కువ బడ్జెట్ లోనే అమ్మను సంతోషపెట్టే బహుమతులు కొనవచ్చు. ఎక్కువ ఖర్చుపెడితే అమ్మ మళ్లీ బడితే దెబ్బలు వేయచ్చు. దుబారాగా ఖర్చు పెట్టడం ఏ తల్లికీ ఇష్టం ఉండదు. ఇక ఏం కొనాలో చూద్దాం. 

1. ఏ మహిళకైనా కొత్త చీరంటే ప్రాణం. ఎన్ని చీరలున్నా ఇంకా చీరలు కావాలనిపిస్తుంది. మీ తల్లికి ఇష్టమైన రంగు చీరను తీసుకెళ్లి బహుమతిగా ఇవ్వండి. ఇది చిన్న బహుమతే అయినా ఆమె ఆనందం మాత్రం అధికంగా ఉంటుంది. 

2. మీ తల్లి దైవ భక్తురాలైతే రోజులో కనీసం అరగంటైనా ఆమె పూజగదిలో ఉంటుంది. మీరు ఆమె లేచే సరికే ఆ గదిని అందమైన పూలతో అలంకరించండి. పూలు కొనేందుకు అయ్యే ఖర్చు కూడా తక్కువే. ఆమె తలలో పెట్టుకునేందుకు కూడా పూలను కొని రెడీ ఉంచండి. ఆమెతో కలిసి పూజ చేయండి. ఇది చిన్న పనే అయితే మీ తల్లి సంతోషం మాత్రం హద్దులు దాటుతుంది. 

3. అమ్మ చిన్నప్పటి ఫోటోలు, పెళ్లి  ఫోటోలు, మీతో ఉన్న ఫోటోలను సేకరించి ఒక ఆల్బమ్ తయారు చేయండి. స్క్రాప్ బుక్ లా చేస్తే ఇంకా బావుంటుంది. దాన్ని ఆమెకు బహుమతిగా అందిస్తే వాటిని చూసి మురిసిపోవడం ఖాయం. ఆమె ముఖంలో ఆనందం మీకు స్పష్టంగా కనిపిస్తుంది. 

4. రోజూ అమ్మ వండితే మీరు తింటున్నారు కదా, ఈ ఒక్క రోజు ఆమెను కూర్చోబెట్టి  మీరూ వండండి. అమ్మకు ఏవి ఇష్టమో తెలుసుకుని మరీ వండాలి. ఆమెతో కలిసి భోజనం చేయండి. కులాసాగా కబుర్లు చెప్పండి. ఆమె ఎంతో సంతోషిస్తుంది. 

5. విద్యార్థులు ఎక్కువ డబ్బులు బహుమతుల కోసం ఖర్చుపెట్టలేరు. కానీ ఉద్యోగులైన పిల్లలు తల్లికి ఏమైనా కొనగలరు. ఒక అందమైన ఉంగరాన్ని కొని ఆమె ఇవ్వండి. అంతకన్నా ఎక్కువ ఖర్చుపెడితే ‘డబ్బులు ఎందుకు వేస్టు చేస్తున్నావ్’ అంటూ అమ్మ తిట్టే అవకాశం ఉంది. 

6. స్నేహితులతో బయటకు వెళ్లి హ్యాంగవుట్స్ చేస్తారుగా. అలా మదర్స్ డే రోజు అమ్మతో బయటికి వెళ్లండి. ఒక సినిమా చూసి, బయటే ఆమెకు నచ్చిన రెస్టారెంట్లో లంచ్ లేదా డిన్నర్ చేసి ఇంటికి రండి. ఆ రోజంతా ఆమెతోనే ఉండండి. ఆమెతోనే మాట్లాడండి.ఓ తల్లి ఇంతకన్నా కోరుకునేది ఏమీ లేదు.