Omicron Variant: ఒమిక్రాన్ వేరియంట్ లైఫ్.. చర్మంపై 21 గంటలు.. ప్లాస్టిక్‌పై అయితే..!

ఒమిక్రాన్.. ఇతర కరోనా వేరియంట్లతో పోలిస్తే మనుషుల చర్మంపై 21 గంటలకు పైగా, ప్లాస్టిక్ వస్తువులపై 8 రోజులకుపైగా జీవిస్తోందని తాజా అధ్యయనంలో తేలింది.

ఒమిక్రాన్ వేరియంట్

ఒమిక్రాన్ వేరియంట్‌ గురించి షాకింగ్ విషయాలు బయటపెట్టింది తాజా అధ్యయనం. ఈ కరోనా వేరియంట్ ఇంత వేగంగా వ్యాప్తి చెందటానికి ప్రధాన కారణాన్ని వెల్లడించింది. పలు ఉపరితలాలపై ఒమిక్రాన్ ఎక్కువ కాలం సజీవంగా ఉండటమే ఇందుకు కారణమని తెలిపింది. కరోనా వైరస్​ ఇతర రకాలతో పోల్చితే ఒమిక్రాన్​ వేరియంట్​.. మనుషుల చర్మంపై 21 గంటలకుపైగా, ప్లాస్టిక్​ వస్తువులపై 8 రోజులకుపైగా జీవిస్తోందని ఈ అధ్యయనంలో తేలింది.

జపాన్​లోని క్యోటో ప్రిఫెక్చురల్​ యూనివర్సిటీ ఆఫ్​ మెడిసిన్​కు చెందిన పరిశోధకులు వూహాన్​లో ఉద్భవించిన సార్స్​ కోవ్​-2 వైరస్​తో ఇతర అన్ని వేరియంట్లను పోల్చి చూశారు. అవి పర్యావరణంలో సజీవంగా ఉండే సామర్థ్యాన్ని పరిశీలించారు. ఇతర రకాల కన్నా.. ఒమిక్రాన్​ వేరియంట్​కు ఎక్కువ కాలం జీవించే సామర్థ్యం ఉందని తేల్చారు. ఈ అధ్యయనం బయోఆర్​షివ్​లో ఇటీవల ప్రచురితమైంది.

ఏది.. ఎక్కడ.. ఎన్ని గంటలు?

ప్లాస్టిక్​ ఉపరితలంపై వైరస్​ జీవించే సామర్థ్యం ఒరిజినల్​ వేరియంట్​ (56 గంటలు).

• ఆల్ఫా (191.3 గంటలు)
• బీటా (156.6 గంటలు)
• గామా (59.3 గంటలు)
• డెల్టా(114 గంటలు)
• ఒమిక్రాన్​ వేరియంట్​ అత్యధికంగా ప్లాస్టిక్​ వస్తువులపై 193.5 గంటలు సజీవంగా ఉంటుంది.

చర్మంపై..

చర్మంపై ఉన్న వివిధ వేరియంట్ శాంపిళ్లను కూడా స్టడీ చేశారు. ఒరిజినల్ వైరస్ చర్మంపై 8.6 గంటలు సజీవంగా ఉంటుంది.

• ఆల్ఫా (19.6 గంటలు)
• బీటా (19.1 గంటలు)
• గామా (11 గంటలు)
• డెల్టా (16.8 గంటలు)
• డెల్టా వేరియంట్ (21.1 గంటలు) 
• ఒమిక్రాన్ (21 గంటలు)

భారత్‌లో..

భారత్​లో రోజువారీ కరోనా కేసుల సంఖ్య ఈరోజు కాస్త పెరిగింది. తాజాగా 2,85,914 కేసులు నమోదయ్యాయి. వైరస్​తో మరో 665 మంది మరణించారు. 2,99,073 మంది మహమ్మారి నుంచి కోలుకున్నారు. దేశంలో రోజువారీ పాజిటివిటీ రేటు 16.16 శాతానికి చేరినట్లు కేంద్ర ఆరోగ్య శాఖ తెలిపింది. మొత్తం కేసులు 4 కోట్లు దాటాయి.