Covid-19 Vaccination: ఆదర్శంగా అండమాన్ నికోబార్ దీవులు.. సవాళ్లను దాటి 100% వ్యాక్సినేషన్

అండమాన్ నికోబార్ దీవుల్లో 100 శాతం కొవిడ్ వ్యాక్సినేషన్ పూర్తి చేసినట్లు అక్కడి పాలకవర్గం ప్రకటించింది.

ఆదర్శంగా నిలిచిన అండమాన్ నికోబార్ దీవులు

వ్యాక్సినేషన్‌లో అండమాన్ అండ్ నికోబార్ దీవులు అరుదైన మైలురాయిని చేరుకున్నాయి. అర్హులైన వారందరికీ రెండు డోసుల వ్యాక్సినేషన్ పూర్తి చేసి రికార్డ్ సృష్టించింది. ఈ మేరకు అక్కడి పాలకవర్గం ట్వీట్ చేసింది. కేవలం కొవిషీల్డ్ వ్యాక్సిన్‌తోనే ఈ ఘనత అందుకోవడం విశేషం.

#CoVIDVaccine #TheAndamanStory - 1 - A&N achieved 100% Covid vaccine coverage making it 1st State/UT to achieve the feat using only Covishield. UT Admin overcame Insurmountable odds for this extraordinary feat in one of the remotest part of world. @MediaRN_ANI @Jitendra_Narain

— Andaman and Nicobar Admn (@Andaman_Admin) December 18, 2021

" అండమాన్‌ నికోబార్‌ దీవుల్లో 100 శాతం వ్యాక్సినేషన్​ పూర్తి చేశాం. కేవలం కొవిషీల్డ్ వ్యాక్సిన్‌తో ఈ ఘనత అందుకున్న తొలి రాష్ట్రం/ కేంద్రపాలిత ప్రాంతం అండమాన్ నికోబార్.  ఈ ప్రాంతంలో టీకా పంపిణీ అత్యంత సవాల్‌తో కూడుకున్న వ్యవహారం. అయినప్పటికీ ఉత్తరం నుంచి దక్షిణం వరకు 800 కి.మీ విస్తీర్ణంలో ఉన్న 836 దీవులకు చేరుకొని వ్యాక్సిన్లు అందజేశాం. దట్టమైన అడవులు, కొండలను సైతం దాటుకొని ప్రతికూల వాతావరణంలోనూ టీకాలు పంపిణీ చేశాం.                                               "

-అండమాన్​ నికోబార్​ దీవుల పాలకవర్గం

తొలిరోజు నుంచే..

దేశవ్యాప్తంగా వ్యాక్సినేషన్‌ కార్యక్రమం ప్రారంభమైన జనవరి 16నే ఈ దీవుల్లోనూ టీకాలు ఇవ్వడం మొదలుపెట్టారు. కేంద్ర ప్రభుత్వ గణాంకాల ప్రకారం అండమాన్‌ నికోబార్‌ దీవుల్లో మొత్తం 2.87 లక్షల మంది అర్హులు రెండు డోసుల వ్యాక్సిన్‌ తీసుకున్నారు. ఈ దీవుల్లో మొత్తం జనాభాలో 74.67 శాతం మందికి టీకాలు అందాయి.

కేసులు..

అండమాన్ నికోబార్ దీవుల్లో ఆదివారం మరో కరోనా కేసు నమోదు కాగా.. మొత్తం కొవిడ్ బాధితుల సంఖ్య 7,701కి పెరిగింది. వీరిలో 129 మంది ప్రాణాలు కోల్పోయారు. ప్రస్తుతం రెండు యాక్టివ్​ కేసులు ఉన్నాయి.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి