Parthiban: బాధపెట్టి ఉంటే క్షమించండి - తమన్నా వివాదంపై స్పందించిన పార్తిబన్

తమన్నా డ్యాన్స్ గురించి సీనియర్ నటుడు పార్తిబన్ చేసిన వ్యాఖ్యలు తీవ్ర దుమారం రేపాయి. ఈ నేపథ్యంలో ఆయన క్షమాపణలు చెప్పారు.

తమన్నాకు పార్తిబన్ క్షమాపణలు

Source : Radhakrishnan Parthiban/Intagram

Parthiban Apologizes Tamannaah: తమిళ సీనియన్ నటుడు, దర్శకుడు పార్తిబన్ వివాదంలో చిక్కుకున్నారు. తమన్నా గురించి ఆయన చేసిన వ్యాఖ్యలు ఇండస్ట్రీలో హాట్ టాపిక్ గా మారాయి. పలువురు సినీ ప్రముఖులు ఆయనపై విమర్శలు చేశారు. ఈ నేపథ్యంలో ఆయన వెనక్కి తగ్గారు. తన మాటలతో ఎవరైనా ఇబ్బంది పడి ఉంటే క్షమించాలని కోరారు. ఇంతకీ అసలు ఏం జరిగిందంటే..

తమన్నాపై పార్తిబన్ వివాదాస్పద వ్యాఖ్యలు

తాజాగా పార్తిబన్ ఓ సినిమా వేడుకలో పాల్గొన్నారు. ఈ సందర్భంగా తమన్నా డ్యాన్స్ గురించి కామెంట్స్ చేశారు. ప్రస్తుత పరిస్థితుల్లో సినిమాలో కథ ఉందా? లేదా? అనేది ఆడియెన్స్ చూడట్లేదని, తమన్నాడ్యాన్స్‌ చేస్తే హిట్ అయిపోతుందన్నారు. సినిమాలో కథ లేకపోయినా ఫర్వాలేదన్నట్లుగా పరిస్థితులు మారిపోయాయన్నారు. ఆయన వ్యాఖ్యలు సోషల్ మీడియాలో తెగ వైరల్ అయ్యాయి. ఆయన మాటలను పలువురు తప్పుబట్టారు. కళాకారులను అవమానించేలా ఉన్నాయని, ముఖ్యంగా తమన్నాను టార్గెట్ చేసినట్లు ఉన్నాయని పలువురు ఆగ్రహం వ్యక్తం చేశారు.  

క్షమాపణలు చెప్పిన పార్తిబన్

సినిమా పరిశ్రమ నుంచి తీవ్ర వ్యతిరేకత వచ్చిన నేపథ్యంలో పార్తిబన్‌ క్షమాపణలు చెప్పారు. ఇండస్ట్రీలో పని చేస్తున్న అందరి పైనా తనకు గౌరవం ఉందన్నారు. ఏ ఒక్కరినీ కించపరిచే ఉద్దేశం తనకు లేదని వెల్లడించారు. తన మాటలు ఎవరినైనా ఇబ్బంది పెట్టి క్షమించాలని కోరారు. ‘‘సినిమా ఇండస్ట్రీలో ఉన్న వారిపై నాకు చాలా గౌరవం ఉంది. నటీనటులను తక్కువ చేసే ఉద్దేశం నాకు లేదు. నా మాటలు ఎవరినైనా బాధపెట్టి ఉంటే క్షమించండి’’ అంటూ వివరణ ఇచ్చారు.

‘టిన్జ్’ సక్సెస్ మీట్ లో పార్తిబన్ వ్యాఖ్యలు

నటుడు పార్తిబన్ తమిళంతో పాటు తెలుగు సినిమాల్లోనూ సందడి చేశారు. మెగా హీరో రామ్ చరణ్ నటించిన ‘రచ్చ’ సినిమాలో ఆయన కీలక పాత్ర పోషించారు. ఆయన యాక్టింగ్ పై పలువురు ప్రశంసలు కురిపించారు. రీసెంట్ గా ఆయన ‘టిన్జ్’ అనే సినిమాకు దర్శకత్వం వహించారు. అడ్వెంచరస్ థ్రిల్లర్ గా ఈ సినిమా తెరకెక్కింది. జులై 12న ప్రేక్షకుల ముందుకు వచ్చిన ఈ సినిమా చక్కటి విజయాన్ని అందుకుంది. ఆ సినిమా సక్సెస్ మీట్ ను తాజాగా నిర్వహించారు. ఈ వేడుకలోనే ఆయన వివాదాస్పద వ్యాఖ్యలు చేశారు. తమన్నా పేరును ప్రత్యేకంగా ప్రస్తావించారు. ‘‘ప్రస్తుత రోజుల్లో ప్రేక్షకులు సినిమాలో కథ ఉందా? లేదా? అనే విషయాన్ని పెద్దగా పట్టించుకోవడం లేదు. హీరోయిన్ డ్యాన్స్ కోసమే చూస్తున్నారు. తమన్నా సినిమాలో ఉందంటే చాలా ఆ సినిమా కచ్చితంగా హిట్ అవుతుంది” అన్నారు. ఆయన వ్యాఖ్యలు ‘జైలర్’, ‘బాక్’ సినిమాల గురించేనని సోషల్ మీడియాలో పెద్ద ఎత్తున చర్చ జరుగుతోంది. ఈ నేపథ్యంలో ఆయన క్షమాపణలు చెప్పి, వివాదానికి ఫుల్ స్టాఫ్ పెట్టే ప్రయత్నం చేశారు.