ఫేమస్ ఫుడ్ వ్లాగర్‌ ఆత్మహత్య, బెడ్‌రూమ్‌లోనే ఉరి వేసుకుని బలవన్మరణం

Kerala Crime News: కేరళకు చెందిన ఫుడ్ వ్లాగర్ రాహుల్‌ ఉరి వేసుకుని ఆత్మహత్య చేసుకున్నాడు.

కేరళకు చెందిన ఫుడ్ వ్లాగర్ రాహుల్‌ ఉరి వేసుకుని ఆత్మహత్య చేసుకున్నాడు. (Image Credits: Facebook)

Kerala Vlogger Suicide: 

కొచ్చిలో ఫుడ్‌వ్లాగర్‌ ఆత్మహత్య

కేరళలోని కొచ్చిలో ఓ ఫుడ్‌ వ్లాగర్‌ ఇంట్లోనే ఆత్మహత్య (Food Vlogger Suicide) చేసుకున్న ఘటన కలకలం రేపింది. 33 ఏళ్ల రాహుల్ ఎన్‌ కుట్టి (Rahul N Kutty) బలవన్మరణానికి పాల్పడినట్టు పోలీసులు వెల్లడించారు. తన బెడ్‌రూమ్‌లో ఉరి వేసుకున్నాడు. ఎంత సేపటికీ తలుపు తీయకపోవడం వల్ల తల్లిదండ్రులు కంగారు పడ్డారు. ఆ తరవాత స్నేహితులూ ఇంటికి వచ్చారు. ఎలాగోలా రూమ్‌లోకి వెళ్లి చూడగా వేలాడుతూ కనిపించాడు. వెంటన స్థానిక ఆసుపత్రికి తరలించారు. కానీ అప్పటికే మృతి చెందినట్టు వైద్యులు వెల్లడించారు. హాస్పిటల్ నుంచే పోలీసులకు సమాచారం అందించారు కుటుంబ సభ్యులు. 'Eat Kochi Eat' ఆన్‌లైన్ ఫుడ్‌ ప్లాట్‌ఫామ్‌ కొచ్చిలో చాలా ఫేమస్. అందులోనే వ్లాగర్‌గా పని చేస్తున్నాడు రాహుల్. చాలా అరుదైన వంటకాలను పరిచయం చేయడమే ఈ ప్లాట్‌ఫామ్‌ స్పెషాల్టీ. కొద్ది రోజుల్లోనే ఫేమస్ అయ్యాడు రాహుల్. కానీ...ఉన్నట్టుండి ఇలా ఆత్మహత్యకు పాల్పడడం సంచలనం సృష్టించింది. ఇన్‌స్టాగ్రామ్‌లో రాహుల్‌ మృతిపై పోస్ట్ చేసింది ఈట్ కొచ్చి ఈట్‌ ప్లాట్‌ఫామ్. అసహజ మరణంగా కేసు నమోదు చేసుకున్న పోలీసులు విచారణ చేపడతామని వెల్లడించారు. 

"రాహుల్ ఎన్ కుట్టి ఆత్మహత్య చేసుకుని చనిపోయాడు. ఇది చాలా బాధాకరమైన ఘటన. ఆయన ఆత్మకు శాంతి చేకూరాలని అందరూ ప్రార్థించాలని కోరుకుంటున్నాం. రాహుల్ కుటుంబ సభ్యులు ఈ బాధను తట్టుకునే ఆత్మస్థైర్యాన్ని ఆ భగవంతుడే ఇవ్వాలి"

- ఈట్ కొచ్చి ఈట్ 

యూపీలోనూ ఓ వ్యక్తి ఆత్మహత్య

పుట్టింటికి వెళ్లిన భార్య తిరిగి ఇంటికి రాలేదన్న మనస్తాపంతో ఓ వ్యక్తి ఆత్మహత్య చేసుకున్నాడు. యూపీలో జరిగిందీ ఘటన. భార్య రాలేదని అసహనానికి గురైన వ్యక్తి ఇంట్లోనే ఉరి వేసుకుని చనిపోయాడు. మృతుడి పేరు ప్రమోద్ కుమార్‌ అని పోలీసులు వెల్లడించారు. గుగా గ్రామానికి చెందిన ప్రమోద్ కుమార్ తన గదిలో ఉరి వేసుకుని బలవన్మరణానికి పాల్పడినట్టు తెలిపారు. మృతదేహాన్ని స్వాధీనం చేసుకున్న పోలీసులు పోస్ట్‌మార్టం జరిపించారు. ప్రమోద్ భార్య ప్రీతి రెండు నెలల క్రితం పుట్టింటికి వెళ్లింది. ఇంకా ఇంటికి రాలేదని ప్రమోద్ భార్యకు కాల్ చేశాడు. ఆ సమయంలో ప్రీతి తల్లి ఫోన్‌లో గొడవ పడింది. ఇద్దరి మధ్య వాగ్వాదం జరిగింది. ఇది తట్టుకోలేక రాత్రి పూట ఆత్మహత్య చేసుకున్నాడు ప్రమోద్. ఉదయం ఎంత సేపటికీ తలుపు తీయకపోవడం వల్ల అనుమానం వచ్చి తలుపులు పగలగొట్టి లోపలకు వెళ్లారు కుటుంబ సభ్యులు. గదిలో వేలాడుతూ కనిపించడం చూసి షాక్ అయ్యారు. కర్వా చౌత్‌ రోజున భార్య తన పక్కనే లేదన్న ఆవేదనతో ఇలా బలవన్మరణానికి పాల్పడ్డాడు. కేసు నమోదు చేసుకున్న పోలీసులు విచారణ చేపడుతున్నారు.