Young Woman Murder: నడిరోడ్డుపై యువతి హత్య - గొడ్డలితో నరికి చంపిన యువకుడు, నిర్మల్ జిల్లాలో దారుణం

Nirmal News: నిర్మల్ జిల్లాలో గురువారం దారుణం జరిగింది. ఓ యువకుడు నడిరోడ్డుపై ఓ యువతిని గొడ్డలితో నరికి చంపాడు. ప్రేమ వ్యవహారమే ఈ హత్యకు కారణమని పోలీసులు అనుమానిస్తున్నారు.

నిర్మల్ జిల్లాలో యువతి దారుణ హత్య

Young Man Killed His Girl Friend in Nirmal: నిర్మల్ (Nirmal) జిల్లాలో గురువారం దారుణం జరిగింది. ఖానాపూర్ (Khanapur)లోని శివాజీనగర్ లో ప్రధాన రహదారిపై ఓ యువకుడు ఓ యువతిని గొడ్డలితో నరికి చంపాడు. పట్టణంలోని అంబేడ్కర్ నగర్ కాలనీకి చెందిన అలేఖ్య (20)ను అదే కాలనీకి చెందిన శ్రీకాంత్ అనే యువకుడు టైలరింగ్ షాపు నుంచి ఇంటికి వెళ్తుండగా దాడి చేశాడు. ఈ క్రమంలో ఆ దాడిని అడ్డుకోబోయిన యువతి వదిన, పక్కనే ఉన్న మరో రెండేళ్ల చిన్నారిపైనా దాడికి పాల్పడ్డాడు. దీంతో వారిద్దరికీ తీవ్ర గాయాలయ్యాయి. గమనించిన స్థానికులు వెంటనే క్షతగాత్రుల్ని ఆస్పత్రికి తరలించారు. సమాచారం అందుకున్న పోలీసులు ఘటనా స్థలాన్ని పరిశీలించారు. యువతి మృతదేహాన్ని స్వాధీనం చేసుకున్నారు. ప్రేమ వ్యవహారమే ఈ హత్యకు కారణమని అనుమానిస్తున్నట్లు సీఐ మోహన్, ఎస్ఐ లింబాద్రి తెలిపారు. పరారీలో ఉన్న నిందితుని కోసం గాలిస్తున్నామని.. కేసు నమోదు చేసి దర్యాప్తు చేస్తున్నట్లు తెలిపారు.