కువైట్ నుంచి వచ్చి కుమార్తెను వేధించిన వ్యక్తి హత్య - పోలీసులేమంటున్నారు?

Murder: కువైట్ నుంచి వచ్చి బంధువును చంపేసి మళ్లీ కువైట్ వెళ్లిపోయాడు అన్నమయ్య జిల్లాకు చెందిన వ్యక్తి. తన కుమార్తెను వేధించినందుకేనని ఆయన వీడియో రిలీజ్ చేశారు.

కువైట్ నుంచి వచ్చి కుమార్తెను వేధించిన వ్యక్తి హత్య

Source : x

Annamaiya district Crime News: అన్నమయ్య జిల్లా ఓబులవారిపల్లె మండలం కొత్తమంగంపేటలో దివ్యాంగుడైన గుట్ట ఆంజనేయులు దారుణ హత్యకు గురయ్యాడు. పోలీసులకు ఎవరు చంపారో  అర్థం కాలేదు. దాంతో అనుమానాస్పద మృతి కింద కేసు నమోదు చేసి దర్యాప్తు చేస్తున్నారు పోలీసులు. అయితే ఈ క్రమంలో కువైట్ లో ఉంటే ఆంజయనేయ ప్రసాద్ అనే వ్యక్తి ఓ వీడియో తీసుకుని పోలీసులకు పంపించాడు. తానే అంజనేయులను చంపేశానని అందులో పేర్కొన్నాడు. దాంతో పోలీసులు షాక్ కు గురయ్యారు. 

అంజనేయ ప్రసాద్ కుమార్తెను వేధించిన ఆంజనేయలు

ఆంజనేయ ప్రసాద్ తో పాటు ఆయన  భార్య కువైట్‌లో ఉపాధి కోసం ఉంటున్నారు. వారికి పన్నెండేళ్ల కుమార్తె ఉంది. ఆంజనేయ ప్రసాద్ భార్య చంద్రకళ సోదరి లక్ష్మి అదే గ్రామంలో నివాసం ఉంటారు. తాము ఉపాధి కోసం వెళ్తున్నామని చెప్పి చెల్లి వద్ద కుమార్తెను ఉంచారు. అయితే లక్ష్మి మామ .. దివ్యాంగుడైన ఆంజనేయులు ఆ పసిపిల్లపై లైంగిక వేధింపులకు పాల్పుడుతున్నాడు. ఈ విషయం తల్లి ఫోన్ చేసినప్పుడు ఓ సారి చెప్పడంతో ఆమె ఇండియాకు వచ్చి పోలీసులకు ఫిర్యాదు చేసింది. అయితే పోలీసులు హెచ్చరికలు జారీ చేసి వదిలేశారు.                                

తన కుమార్తెకు న్యాయం చేయాలనుకున్న ఆంజనేయ ప్రసాద్

పోలీసుల తీరుతో ఆవేదనకు గురైన  ఆంజనేయ ప్రసాద్‌  ఆడపిల్లపై అసభ్యకరంగా ప్రవర్తించినా పోలీసులు పట్టించుకోకపోవడం ఏమిటని ఆవేదన చెందాడు.  కువైట్ నుంచి వచ్చి శనివారం ఇంటి ఆవరణలో నిద్రిస్తున్న ఆంజనేయులు తలపై ఇనుప రాడ్డుతో మోది హత్య చేసి వెంటనే కువైట్ వెళ్లిపోయాడు. అతను వచ్చిన విషయం .. వెళ్లిన విషయం కూడా ఎవరికీ తెలియదు. దాంతో అతనిపై ఎవరికీ అనుమానం రాలేదు. అనంతరం ఈ విషయాన్ని వివరిస్తూ సామాజిక మాధ్యమాల్లో వీడియో పోస్టు చేశాడు. ఆడ బిడ్డ తండ్రిగా తాను చేసింది న్యాయమేనని.. పోలీసులకు లొంగిపోతానని వెల్లడించాడు.                                        

అనుమానాస్పద కేసు హత్యగా మార్చి దర్యాప్తు చేయనున్న పోలీసులు

ఆ తండ్రి చెబుతున్నది నిజమా కాదా అన్నదానిపై పోలీసులు దర్యాప్తు చేస్తున్నారు.  తన బిడ్డపై లైంగిక వేధింపులకు పాల్పడుతున్నాడని  తల్లి పిర్యాదు చేసిన మాట వాస్తవమేనని చెబుతున్నారు. ఈ విషయంలో కువైట్ లో ఉంటున్న దంపతుల బంధువులు కూడా సైలెంట్ గా ఉంటున్నారు. మొత్తంగా ఆ తండ్రి తీర్పు మాత్రం సోషల్ మీడియాలో వైరల్ గా మారింది.