Toyota Innova Crysta ధరలు పెంపు: GX నుంచి ZX వరకు అన్ని వేరియంట్లు రూ.26,000 వరకు భారం
Toyota Innova Crysta ధరలు రూ.19,000 నుంచి రూ.26,000 వరకు పెరిగాయి. GX నుంచి ZX వరకు అన్ని వేరియంట్లపై కొత్త ధరలు అమల్లోకి వచ్చాయి. ఇంజిన్, ఫీచర్లలో ఎలాంటి మార్పులు లేవు.
Toyota Innova Crysta Price Hike: భారత మార్కెట్లో మంచి పేరు తెచ్చుకున్న ప్రీమియం MPV Toyota Innova Crysta ఇప్పుడు మరింత ఖరీదైంది. టయోటా, తాజాగా, క్రిస్టా ధరలను పెంచింది. ఈ పెంపుతో వేరియంట్ను బట్టి రూ.19,000 నుంచి రూ.26,000 వరకు అదనపు భారం పడింది. ముఖ్యంగా టాప్ ఎండ్ వేరియంట్ అయిన ZX ట్రిమ్పై అత్యధికంగా రూ.26,000 పెంపు అమల్లోకి వచ్చింది.
కొత్త ధరలు ఎంత నుంచి ఎంత వరకు?
ఈ ధరల పెంపు తర్వాత Toyota Innova Crysta ఎక్స్-షోరూమ్ ధరలు రూ.18.85 లక్షల నుంచి రూ.25.53 లక్షల వరకు ఉన్నాయి. ధరలు తప్పించి, ఈ MPVలో ఇతర మార్పులను టయోటా చేయలేదు. డిజైన్, ఫీచర్లు, ఇంజిన్ అన్నీ యథాతథంగానే ఉన్నాయి.
వేరియంట్లు & సీటింగ్ ఆప్షన్లు
Toyota Innova Crysta ప్రస్తుతం GX, GX+, VX, ZX అనే నాలుగు ట్రిమ్లలో లభిస్తోంది. ZX ట్రిమ్ తప్ప మిగతా అన్ని వేరియంట్లలో 7 సీటర్, 8 సీటర్ ఆప్షన్లు అందుబాటులో ఉన్నాయి. బేస్ వేరియంట్ అయిన GX ట్రిమ్ 7, 8 సీటర్ మోడళ్లకు ఇప్పుడు రూ.18.66 లక్షల (ఎక్స్-షోరూమ్ ధర)గా నిర్ణయించారు. ఇది గతంతో పోలిస్తే రూ.19,000 పెరిగింది.
ఏ వేరియంట్పై ఎంత పెంపు?
GX తర్వాత వచ్చే GX+, VX వేరియంట్లు రూ.20,000కి పైగా పెరిగాయి. టాప్ స్పెక్ ZX వేరియంట్ 7 సీటర్గా మాత్రమే అందుబాటులో ఉండగా, దాని ధరపై రూ.26,000 భారం పెట్టారు. అదనంగా, Platinum White Pearl కలర్ ఎంచుకుంటే అన్ని వేరియంట్లకు రూ.14,000 అదనపు ఛార్జ్ చెల్లించాల్సి ఉంటుంది.
ఇంజిన్, పనితీరు వివరాలు
Toyota Innova Crystaలో 2.4 లీటర్ డీజిల్ ఇంజిన్ కొనసాగుతోంది. ఇది 150hp పవర్, 343Nm టార్క్ అందిస్తుంది. ఈ ఇంజిన్కు 5 స్పీడ్ మాన్యువల్ గేర్బాక్స్ జతచేశారు. పవర్ను వెనుక చక్రాలకు పంపే RWD సెటప్ ఇందులో ఉంది.
ఫీచర్లు & సేఫ్టీ
ఫీచర్ల విషయానికి వస్తే, క్రిస్టాలో 8 అంగుళాల టచ్స్క్రీన్ ఇన్ఫోటైన్మెంట్ సిస్టమ్, అనలాగ్ డయల్స్తో ఇన్స్ట్రుమెంట్ క్లస్టర్, కలర్ TFT డిస్ప్లే, ఆటో ఏసీ, రియర్ వెంట్స్, పవర్డ్ డ్రైవర్ సీట్ ఉన్నాయి.
సేఫ్టీ పరంగా 3 నుంచి 7 ఎయిర్బ్యాగ్స్, రియర్ పార్కింగ్ కెమెరా, ముందు & వెనుక పార్కింగ్ సెన్సర్లు, హిల్ స్టార్ట్ అసిస్ట్ అందిస్తున్నారు.
మార్కెట్లో స్థానం
2016 నుంచి ఇదే స్పెసిఫికేషన్తో అమ్మకాల్లో ఉన్న Innova Crystaను, 2027లో కఠినమైన CAFE-3 నిబంధనల కారణంగా నిలిపివేయనున్నారు. ప్రస్తుతం ఇది Toyota Innova Hycross, Maruti Suzuki Invicto, Kia Carens Clavis వంటి మోడళ్లతో పోటీ పడుతోంది.
విశ్వసనీయత, కంఫర్ట్, రీసేల్ వాల్యూ కోసం ఇన్నోవా క్రిస్టాను ఎంచుకునే వారికి ఈ ధరల పెంపు కొంత భారం అయినప్పటికీ, దీని డిమాండ్ మాత్రం తగ్గే సూచనలు కనిపించడం లేదు.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
