కియా అమ్మకాలలో 96% వాటా ఈ మూడు మోడళ్లదే.. ఏ కారుకు ఎంత డిమాండ్?

మే 2026లో కియా ఇండియా 27,586 కార్లు విక్రయించి 24% వృద్ధి నమోదు చేసింది. సెల్టోస్, సోనెట్, కారెన్స్ అమ్మకాలలో ఆధిపత్యం చాటగా, సైరోస్ భారీ పతనాన్ని చవిచూసింది.

మే 2026లో కియా కార్లకు భారీ డిమాండ్

Source : https://x.com/

Kia Sales May 2026: భారత ఆటోమొబైల్ మార్కెట్లో తనకున్న ఆదరణను కియా ఇండియా మరోసారి బలంగా చాటి చెప్పింది. 2026 మే నెలలో, ఈ కంపెనీ దేశీయ మార్కెట్లో మొత్తం 27,586 యూనిట్ల కార్లను విక్రయించింది. గత ఏడాది ఇదే నెలలో నమోదైన 22,315 యూనిట్లతో పోలిస్తే 24 శాతం వృద్ధి సాధించడం విశేషం. ఏప్రిల్ 2026తో పోల్చినా అమ్మకాలు స్వల్పంగా పెరిగాయి.

మూడు మోడళ్లకే ఎక్కువ డిమాండ్‌

మే 2026లో కూడా కియా అమ్మకాలలో సెల్టోస్, సోనెట్, కారెన్స్ మోడళ్లు ప్రధాన పాత్ర పోషించాయి. కంపెనీ మొత్తం అమ్మకాలలో 96 శాతానికి పైగా ఈ మూడు మోడళ్ల నుంచే రావడం గమనార్హం.

అమ్మకాల పరంగా కియా సెల్టోస్ అగ్రస్థానంలో నిలిచింది. 2025 మేలో 6,082 యూనిట్లు విక్రయించగా, 2026 మేలో ఈ సంఖ్య 10,597 యూనిట్లకు చేరింది. దీంతో ఏకంగా 74 శాతం వార్షిక వృద్ధి నమోదైంది. మిడ్‌ సైజ్‌ SUV విభాగంలో హ్యుందాయ్ క్రెటా, మారుతి గ్రాండ్ విటారా, టయోటా హైరైడర్ వంటి ప్రత్యర్థుల నుంచి తీవ్ర పోటీ ఉన్నప్పటికీ సెల్టోస్ తన ఆధిపత్యాన్ని కొనసాగిస్తోంది.

సెల్టోస్‌లో 1.5 లీటర్ నేచురల్లీ ఆస్పిరేటెడ్ పెట్రోల్, 1.5 లీటర్ టర్బో పెట్రోల్, 1.5 లీటర్ డీజిల్ ఇంజిన్ ఆప్షన్స్‌ అందుబాటులో ఉన్నాయి. మాన్యువల్, IMT, ఆటోమేటిక్, డ్యూయల్ క్లచ్ ఆటోమేటిక్ ట్రాన్స్‌మిషన్ ఆప్షన్లు కస్టమర్లను ఆకట్టుకుంటున్నాయి.

కియా సోనెట్‌ జోరు

రెండో స్థానంలో కియా సోనెట్ నిలిచింది. మే 2026లో ఈ కాంపాక్ట్ SUV 9,707 యూనిట్ల అమ్మకాలు నమోదు చేసింది. గత ఏడాదితో పోలిస్తే 21 శాతం వృద్ధి సాధించినప్పటికీ, ఏప్రిల్ 2026తో పోలిస్తే 8 శాతం తగ్గుదల కనిపించింది.

కుటుంబ అవసరాలను దృష్టిలో ఉంచుకుని రూపొందించిన కియా కారెన్స్ కూడా మంచి ఫలితాలను నమోదు చేసింది. మే నెలలో 6,208 యూనిట్లు అమ్ముడైంది, గత ఏడాదితో పోలిస్తే ఇది 37 శాతం పెరుగుదల. ఇటీవల పరిచయమైన క్లావిస్ ఈవీ వేరియంట్ కుటుంబ వాహనాల విభాగంలో కియా ఉనికిని మరింత బలపరిచినట్లు కనిపిస్తోంది.

సైరోస్‌ వెనుకడుగు

అయితే కియా లైనప్‌లో అత్యధిక పతనాన్ని నమోదు చేసిన మోడల్ సైరోస్. గత ఏడాది మేలో 3,611 యూనిట్లు విక్రయించగా, ఈసారి అమ్మకాలు 961 యూనిట్లకు పరిమితమయ్యాయి. దీంతో 73 శాతం తగ్గుదల నమోదైంది. అయితే ఏప్రిల్ 2026తో పోలిస్తే సైరోస్ అమ్మకాలు 73 శాతం పెరగడం కొంత ఊరటనిచ్చే అంశం.

ప్రీమియం సెగ్మెంట్‌లో ఉన్న కియా కార్నివాల్ కూడా మెరుగైన ప్రదర్శన కనబర్చింది. 2025 మేలో 44 యూనిట్లు విక్రయించగా, ఈసారి 113 యూనిట్లు అమ్ముడయ్యాయి. దీంతో 157 శాతం వృద్ధి నమోదైంది. 2.2 లీటర్ డీజిల్ ఇంజిన్, ఎనిమిది స్పీడ్ ఆటోమేటిక్ గేర్‌బాక్స్‌తో పాటు లగ్జరీ ఫీచర్లతో ఈ ఎమ్‌పీవీ వినియోగదారులను ఆకర్షిస్తోంది.

మొత్తంగా చూస్తే, కియా ఇండియా అమ్మకాల వృద్ధికి సెల్టోస్, సోనెట్, కారెన్స్ ప్రధాన బలంగా నిలిచాయి. ముఖ్యంగా సెల్టోస్ రికార్డు స్థాయి వృద్ధితో బ్రాండ్‌కు అతిపెద్ద అమ్మకాల మోడల్‌గా కొనసాగుతుండగా, రానున్న నెలల్లో కూడా ఈ మోడళ్లే కియా వృద్ధిని ముందుకు నడిపించే అవకాశం కనిపిస్తోంది.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.

మరిన్ని చదవండి

నేషనల్ హైవేలపై రాత్రి పూట లైట్లు ఎందుకు ఉండవు.. దీనిపై ఎన్‌హెచ్‌ఏఐ  క్లారిటీ ఇదే !