Eluru Acid Attack: ఏలూరు యాసిడ్ దాడి బాధితురాలు మృతి
యడ్ల ఫ్రాన్సిక ఈ నెల 13 తేదీ రాత్రి ఆమె పనిచేస్తున్న డెంటల్ క్లినిక్ నుంచి స్కూటర్పై ఇంటికి వెళ్తుండగా ఇంటికి సమీపంలోనే కొందరు ఆమెపై యాసిడ్ పోశారు.
ఏలూరులో యాసిడ్ దాడికి గురైన మహిళ మరణించింది. ఫ్రాన్సిక అనే మహిళ ఆస్పత్రిలో చికిత్స పొందుతుండగా మంగళవారం (జూన్ 20) కన్నుమూసింది. యడ్ల ఫ్రాన్సిక ఈ నెల 13 తేదీ రాత్రి ఆమె పనిచేస్తున్న డెంటల్ క్లినిక్ నుంచి స్కూటర్పై ఇంటికి వెళ్తుండగా ఇంటికి సమీపంలోనే కొందరు ఆమెపై యాసిడ్ పోశారు. ఈ కేసు తీవ్ర సంచలనం కలిగించింది. ఈ కేసులో ఇప్పటికే బోడా నాగసతీష్, బెహర మోహన్, బూడిద ఉషాకిరణ్లను అరెస్టు చేశారు. మోహన్, ఉషాకిరణ్ల చేత యాసిడ్ను బోడా నాగ సతీష్ పోయించాడు.
ప్రమాదకరమైన యాసిడ్ను తన బంగారం పని అవసరం కోసం అని చెప్పి కొనుగోలు చేసి తీసుకువచ్చి నాగసతీష్కు విక్రయించిన ఏలూరు కత్తేపువీధికి చెందిన షేక్ ఖాజాబాబు (25)ను ఏలూరు దిశ పోలీసులు అరెస్టు చేశారు. ఆ యాసిడ్ను ఎలాంటి అనుమతులు లేకుండా విక్రయిస్తున్న ఏలూరు గడియారస్తంభం ప్రాంతానికి చెందిన కిరాణాషాపు వ్యాపారి కోళ్ళ త్రివిక్రమరావు, అతడి గుమస్తా విదేలా సత్యనారాయణలను అరెస్టు చేశారు.
యాసిడ్ దాడి అనంతరమే ఏలూరులోని ఆస్పత్రి నుంచి మెరుగైన వైద్యం కోసం బాధితురాలిని విజయవాడ తరలించారు. అయితే, ఆమె కంటిచూపు కోల్పోయింది. పోలీసులు తెలిపిన వివరాల ప్రకారం.. ఏలూరులోని విద్యానగర్లో నివాసం ఉంటున్న యడ్ల ఫ్రాన్సిక (35) అనే మహిళ భర్త ఆంజనేయులుతో ఏడాది క్రితం గొడవ జరగడం వల్ల వేరుగా ఉంటోంది. ఆంజనేయులు రాజమండ్రిలో తల్లిదండ్రులతో ఉంటున్నాడు. ఫ్రాన్సిక తన ఐదేళ్ల కుమార్తె స్మైలీతో తన పుట్టింటి వారితోనే ఉంటుంది. రెండు నెలల క్రితం విద్యానగర్లో ఒక డెంటల్ క్లినిక్లో రిసెప్షనిస్టుగా చేరింది. అయితే, మంగళవారం రాత్రి 9 గంటల ప్రాంతంలో డ్యూటీ దిగి తన స్కూటర్పై ఇంటికి వెళ్తుండగా ఇంటి సమీపంలోని మానిస్ట్రీ దగ్గర గుర్తు తెలియని ఇద్దరు వ్యక్తులు మోటారు సైకిల్పై ఆగి అకస్మాత్తుగా ఆమెపై యాసిడ్ పోశారు. ఆమె కేకలు వేస్తూ సమీపంలోని ఇంటి వద్దకు వెళ్ళిపోయింది.
పరిస్థితి తీవ్రంగా మారడంతో ఆమె చెల్లెలు యడ్ల సౌజన్య, తల్లిదండ్రులు ఆమెపై నీళ్లు పోసి కాలిపోయిన బట్టలు మార్చి ఏలూరు ప్రభుత్వ ఆసుపత్రికి తరలించారు. ఆమె పరిస్థితి ప్రమాదకరంగా ఉందని ఆసుపత్రి వర్గాలు చెప్పడంతో విజయవాడకు తరలించారు.
ఆస్పత్రిలో బాధితురాలిని డీఐజీ అశోక్ కుమార్, ఎస్పీ మేరీ ప్రశాంతి, ఏఎస్పీ వివరాలు అడిగి తెలుసుకున్నారు. సమాచారం అందుకున్న పోలీసులు జిల్లా ఎస్పీ ప్రశాంతి ఆధ్వర్యంలో ఆసుపత్రికి చేరుకుని ఘటనా వివరాలు సేకరించారు. ఏలూరు డీఎస్పీ శ్రీనివాస్ పర్యవేక్షణలో నగరంలోని సీఐలు నిందితుల కోసం గాలింపు చర్యలు చేపట్టారు. మొత్తానికి నిందితులను అరెస్టు చేశారు.
టాప్ హెడ్ లైన్స్
ట్రెండింగ్ వార్తలు
