Telangana Gurukulam Funds Scam: ఆర్ఎస్ ప్రవీణ్ కుమార్పై పదివేల కోట్ల స్కామ్ ఆరోపణలు - జైలుకెళ్లడానికి సిద్ధమన్న మాజీ ఐపీఎస్
RS Praveen Kumar Gurukulam Controversy: తెలంగాణ రాజకీయాల్లో గురుకులాల నిధుల వివాదం తీవ్ర కలకలం రేపుతోంది. ఆర్ఎస్ ప్రవీణ్ కుమార్పై రూ. 10 వేల కోట్ల అవినీతి ఆరోపణలు వస్తున్నాయి.
RS Praveen Kumar Open Challenge: తెలంగాణ రాజకీయాల్లో మరో భారీ కుంభకోణం మరియు నిధుల దుర్వినియోగం వ్యవహారం తీవ్ర దుమారం రేపుతోంది. మాజీ ఐపీఎస్ అధికారి, బీఆర్ఎస్ కీలక నేత ఆర్ఎస్ ప్రవీణ్కుమార్ టార్గెట్గా గురుకుల విద్యాలయాల కాలం నాటి నిధుల నిర్వహణపై సరికొత్త వివాదం చెలరేగింది. బీఆర్ఎస్ మాజీ ఎమ్మెల్యే గువ్వల బాలరాజు నేరుగా ముఖ్యమంత్రి రేవంత్రెడ్డికి ఒక సంచలన లేఖ రాయడంతో ఈ వ్యవహారం ఒక్కసారిగా వేడెక్కింది. ఆర్ఎస్ ప్రవీణ్కుమార్ గురుకులాల సొసైటీ కార్యదర్శిగా పనిచేసిన 2013 నుంచి 2021 మధ్య కాలంలో భారీ స్థాయిలో ఆర్థిక అక్రమాలు జరిగాయని, సుమారు రూ. 10,000 కోట్ల ప్రజాధనం దుర్వినియోగమైందని గువ్వల బాలరాజు ఆ లేఖలో ఆరోపించడం రాష్ట్రవ్యాప్తంగా సంచలనం సృష్టిస్తోంది.
గువ్వల బాలరాజు తన లేఖలో కేవలం ప్రవీణ్ కుమార్నే కాకుండా అప్పటి బీఆర్ఎస్ ప్రభుత్వ పెద్దలను కూడా లీగల్గా టార్గెట్ చేశారు. నాటి ముఖ్యమంత్రి కేసీఆర్ పూర్తి మద్దతుతోనే ఈ అక్రమాలు జరిగాయని ఆయన ఆరోపించారు. సాధారణంగా సీనియర్ ఐఏఎస్ క్యాడర్ అధికారులు నిర్వహించాల్సిన గురుకులాల సెక్రటరీ బాధ్యతలను, ఐపీఎస్ అధికారి అయిన ఆర్ఎస్ ప్రవీణ్కుమార్కు దాదాపు పదేళ్లపాటు నిబంధనలకు విరుద్ధంగా అప్పగించడం వెనుక ఉన్న మతలబుపై కూడా సమగ్ర విచారణ జరగాలని డిమాండ్ చేశారు. టెండర్ విధానాన్ని పక్కనబెట్టి నిధులు ఖర్చు చేశారని, నియామకాలు, ఉద్యోగాల క్రమబద్ధీకరణతో పాటు ఐఐటీ, జేఈఈ కోచింగ్ పేరుతో నిధులను పక్కదారి పట్టించారని పేర్కొంటూ.. ఈ అక్రమాలపై క్రిమినల్ కేసులు నమోదు చేసి, ఆస్తులను స్వాధీనం చేసుకోవాలని సీఎం రేవంత్రెడ్డికి విజ్ఞప్తి చేశారు.
తనపై వచ్చిన ఈ అవినీతి ఆరోపణలపై ఆర్ఎస్ ప్రవీణ్కుమార్ తనదైన శైలిలో ఘాటుగా కౌంటర్ ఇచ్చారు. గువ్వల బాలరాజు లేఖలోని అంశాలను పసలేని అబద్ధాలుగా కొట్టిపారేశారు. రాష్ట్రంలో రూ.82 వేల కోట్లతో కట్టిన కాళేశ్వరం ప్రాజెక్టులో లక్ష కోట్ల అవినీతి జరిగిందనే ప్రచారం ఎంత పెద్ద అబద్ధమో.. అసలు కేవలం రూ.800 కోట్ల వార్షిక బడ్జెట్ మాత్రమే ఉన్న గురుకులాల్లో ఏకంగా రూ.10 వేల కోట్ల అవినీతి జరిగిందనడం కూడా అంతే పెద్ద అబద్ధం అంటూ ప్రాథమిక లాజిక్ను తెరపైకి తెచ్చారు. బడ్జెట్ పరిమితులను దాటి వేల కోట్లు దోచేశారనడం కేవలం బురదజల్లే చర్యేనని మండిపడ్డారు.
ఈ మొత్తం వ్యవహారం వెనుక రాజకీయ కుట్ర దాగి ఉందని ప్రవీణ్ కుమార్ తీవ్ర ఆరోపణలు చేశారు. గతంలో ఇదే గువ్వల బాలరాజు అసెంబ్లీ వేదికగా తన పనితీరును, గురుకులాల ప్రగతిని ఎంతో పొగిడారని గుర్తు చేశారు. కానీ ఇప్పుడు అధికార కాంగ్రెస్, బీజేపీ, మరియు బీఆర్ఎస్ అసంతృప్త నేతలు ఒక అపవిత్ర కూటమిగా ఏర్పడ్డారని విమర్శించారు. ముఖ్యమంత్రి రేవంత్ రెడ్డి, కేంద్ర మంత్రి బండి సంజయ్, గువ్వల బాలరాజు ముగ్గురూ చేతులు కలిపి తనను రాజకీయంగా దెబ్బతీయడానికే ఈ స్క్రిప్ట్ నడుపుతున్నారని ఆరోపించారు.
ఈ రాజకీయ యుద్ధంలో తాను వెనకడుగు వేసే ప్రసక్తే లేదని ప్రవీణ్ కుమార్ స్పష్టం చేశారు. "నేనే గనుక ఏదైనా తప్పు చేసి ఉంటే, గురుకులాల నిధులు ఒక్క రూపాయి కూడా దుర్వినియోగం చేసినట్లు ఆధారాలు ఉంటే నన్ను నేరుగా జైలుకు పంపండి" అంటూ ప్రభుత్వానికి మరియు దర్యాప్తు సంస్థలకు బహిరంగ సవాల్ విసిరారు. గురుకులాల విద్యార్థుల భవిష్యత్తు కోసం తాను రేయింబగళ్లు పడిన శ్రమను ఇప్పుడిలా రాజకీయ కక్షసాధింపులకు వాడుకోవడం అత్యంత దుర్మార్గమని ఆవేదన వ్యక్తం చేశారు. రాబోయే రోజుల్లో ఈ గురుకులాల వివాదం తెలంగాణ రాజకీయాల్లో మరిన్ని సంచలనాలకు దారితీసేలా కనిపిస్తోంది.
టాప్ హెడ్ లైన్స్
ట్రెండింగ్ వార్తలు
