Asifabad News: బీఆర్ఎస్ పార్టీకి రాజీనామా చేసిన సిర్పూర్(టి) జడ్పీటీసీ, నేడు బీజేపీలోకి చేరిక 

Telangana News: కుమురం భీం ఆసిఫాబాద్ జిల్లా సిర్పూర్ (టి) జడ్పీటీసీ నీరేటి రేఖ బీఆర్ఎస్ పార్టీకి రాజీనామా చేశారు. ఈరోజే బీజేపీ పార్టీ కండువా కప్పుకోబోతున్నట్లు ప్రకటించారు. 

బీఆర్ఎస్ పార్టీకి రాజీనామా చేసిన సిర్పూర్(టి) జడ్పీటీసీ, నేడు బీజేపీలోకి చేరిక 

Source : ABP Reporter

Asifabad News: కుమురం భీం ఆసిఫాబాద్ జిల్లా సిర్పూర్ (టి) జడ్పీటీసీ సభ్యురాలు నీరేటి రేఖ, ఆమె భర్త జిల్లా గ్రంథాలయ సంస్థ డైరెక్టర్ నీరెటి సత్యనారాయణ శుక్రవారం బీఆర్ఎస్ పార్టీ సభ్యత్వానికి రాజీనామా చేశారు. ఈ సందర్భంగా సిర్పూరు(టి)లో విలేకరుల సమావేశం నిర్వహించి మాట్లాడారు. ఎమ్మెల్యే కోనేరు కోనప్ప స్థానిక నాయకుడి మాటలు విని మండల అభివృద్ధిని విస్మరిస్తుననారని ఆరోపించారు. సిర్పూర్ (టీ) మండల కేంద్రానికి మంజూరైన ఎమ్మేల్యే క్వార్టర్ నీ కాగజ్ నగర్ పట్టణానికి తరలించారని ఆరోపించారు. సిర్పూర్ (టి) కి మంజూరైన ఏకలవ్య ఆశ్రమ పాఠశాలను సైతం పురపాలిక పరిధిలో ఏర్పాటు చేయించారని పేర్కొన్నారు. మండల అభివృద్ధిని ఎమ్మెల్యే పట్టించుకోవడం లేదని, ఇక్కడ కనీసం బస్టాండ్ సౌకర్యం కూడా లేదన్నారు. ఎమ్మెల్యే చూపుతున్న వివక్ష కారణంగానే పార్టీకి రాజీనామా చేస్తున్నట్లు పేర్కొన్నారు. శనివారం భాజపా రాష్ట్ర అధ్యక్షుడు, కేంద్ర మంత్రి కిషన్ రెడ్డి సమక్షంలో బీజేపీలో చేరతామని ప్రకటించారు. నీరేటి రేఖ 2014 నుంచి 2018 వరకు సిర్పూరు(టి) మండల ఎంపీపీగా 2018 నుంచి జడ్పీటీసీ సభ్యురాలు కొనసాగుతున్నారు. 

నేడే బీజేపీలో చేరబోతున్న జడ్పీటీసీ సభ్యురాలు నీరేటి రేఖ

బీఆర్ఎస్ పార్టీకి రాజీనామా చేసిన సిర్పూర్(టి) జడ్పీటీసీ సభ్యురాలు నీరేటి రేఖ, సత్య నారాయణ దంపతులు భాజపాలో చేరేందుకు హైదరాబాద్ కు బయల్దేరారు. ఈ సందర్భంగా శుక్రవారం రాత్రి బీజేపీ రాష్ట్ర కార్యవర్గ సభ్యులు డా. పాల్వాయి హరీష్ బాబుతో కలిసి ర్యాలీ నిర్వహించారు. ముందుగా సిర్పూర్ (టీ) మండలంలోని టోంకిని సిద్ది హనుమాన్ దేవాలయంలో పూజలు నిర్వహించి, బీజేపీ జెండాను ఆవిష్కరించారు. అనంతరం సిర్పూర్ టౌన్ లోని బస్టాండ్ చౌరస్తాలో కాగజ్ నగర్ లోని ప్రధాన కూడళ్లలో టపాసులు పేల్చి సంబరాలు చేసుకున్నారు. ఈ సందర్భంగా భాజపా రాష్ట్ర కార్యవర్గ సభ్యులు డా.పాల్వాయి హరీష్ బాబు మాట్లాడుతూ.. సిర్పూర్ నియోజకవర్గాన్ని అన్ని విధాలుగా వెనక్కి నెట్టిన ఘనత కోనేరు కొన్నపకే దక్కిందని దుయ్యబట్టారు. తెలంగాణ రాష్ట్రంలో దోపిడీకి చిరునామా కల్వకుంట్ల కుటుంబం అయితే సిర్పూర్ (టీ) నియోజకవర్గంలో దోపిడీకి చిరునామా కోనేరు కుటుంబమని విమర్శించారు. 

రాబోయే రోజుల్లో సిర్పూర్ (టీ) నియోజవర్గం విముక్తి పోరాటంలో జడ్పీటిసి సభ్యురాలు నీరటి రేఖ - సత్యనారాయణ దంపతుల మాదిరిగా అందరూ భాగస్వాములు కావాలని పిలుపునిచ్చారు. త్వరలో సిర్పూర్ (టి) నియోజకవర్గంలో బిఆర్ఎస్ పార్టీ ప్రజల హృదయాల నుండి ఖాళీ అవ్వడమే కాకుండా తెలంగాణ రాష్ట్రం నుంచి కూడా ఖాళీ అవుతుందని తెలిపారు. సిర్పూర్ లో బిజేపి గెలుపే లక్ష్యంగా ముందుకు వెళ్తామన్నారు. ఈ కార్యక్రమంలో మండల భాజపా అధ్యక్షులు ఎల్ములే శంకర్, జిల్లా గ్రంథాలయ సంస్థ డైరక్టర్ నీరెటి సత్యనారాయణ, మాజీ ఎంపీపీ కొప్పుల శంకర్, నాయకులు కొండ్ర మనోహర్ గౌడ్, రాచర్ల మహేష్ యాదవ్, దంద్రే శంకర్, చౌదరి భగవాన్, ఉప్పుల వెంకట్శ్వర్, మైదం తిరుపతి, మేకల తిరుపతి, మేకల వెంకటేష్, అశోక్ ఆచార్య గురూజీ, జాగరి రమేష్, సాయి బనార్కర్ తదితరులు పాల్గొన్నారు.