Hyderabad: మాదాపూర్‌లో నడి రోడ్డుపైనే డబ్బు కట్టలు.. అన్నీ 2 వేల నోట్లే.. ఎగబడి తీసుకున్న జనం, అంతలోనే ఉసూరు

ఆ డబ్బులు తీసుకున్న వారు ఆ నోట్లను తదేకంగా చూడగా ఆ రూ.2 వేల నోట్లపై రిజర్వ్ బ్యాంక్ ఆప్ ఇండియాకు బదులుగా చిల్డ్రన్ బ్యాంక్ ఆఫ్ ఇండియా అని ఉంది.

నోటుపై చిల్డ్రన్ బ్యాంక్ ఆఫ్ ఇండియా

హైదరాబాద్‌లోని మాదాపూర్‌లో నడి రోడ్డుపై డబ్బుల కట్టలు కనిపించడం కలకలం రేపింది. పట్టపగలే ఈ ఘటనను చూసి అంతా అవాక్కయ్యారు. అంత డబ్బు రోడ్డుపైకి ఎలా వచ్చిందా అని ఆశ్చర్యపోయారు. అవన్నీ రూ.2 వేల నోట్లు కావడం గమనార్హం. దీంతో అటుగా వెళ్తున్న స్థానికులు, వాహనదారులు వాటిని నిజమైన నోట్లుగా భావించి వాటిని అందినకాడికి తీసుకుపోయేందుకు తెగ పోటీపడ్డారు. పలువురు వాహనదారులు చేతికందినంత డబ్బులు తీసేసుకున్నారు. అనంతరం వాటిని పరిశీలిస్తే, అవి ఫేక్ కాగితాలుగా తేలాయి. దీంతో అంతా ఉసూరుమన్నారు. డబ్బులు దొరికాయనే వారి ఉత్సాహం ఎక్కువ సేపు నిలవకుండా పోయింది.

కాగా, ఈ నోట్లను నిజమైనవిగా భావించి వాటిని దక్కించుకునేందుకు.. స్థానికులు, వాహనదారులు ఎగబడగా.. ఆ రోడ్డుపై ట్రాఫిక్ మొత్తం భారీగా నిలిచిపోయింది. ఆ తర్వాత పోలీసులు రంగప్రవేశం చేయడంతో పరిస్థితి సద్దుమణిగింది. అయితే, పిల్లలు ఆడుకునేందుకు ఆ నోట్స్ వినియోగిస్తున్నారని విచారణలో తేలింది. 

ఆ డబ్బులు తీసుకున్న వారు ఆ నోట్లను తదేకంగా చూడగా ఆ రూ.2 వేల నోట్లపై రిజర్వ్ బ్యాంక్ ఆప్ ఇండియాకు బదులుగా చిల్డ్రన్ బ్యాంక్ ఆఫ్ ఇండియా అని ఉంది. దీంతో నోట్లు తీసుకెళ్లినవారంతా ఉసూరుమన్నారు. పండక్కి తమ పంట పండిందని.. అనుకుని ఆ నోట్లను ఎత్తుకున్న వారందరూ అసలు విషయం తెలిసి.. వాటిని అక్కడే పడేని నిరాశతో ఇళ్ల బాట పట్టారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి