MMTS Trains: కొత్తగా మరో 4 ఎంఎంటీఎస్ రైళ్లు, మేడ్చల్-లింగంపల్లి, మేడ్చల్-హైదరాబాద్ మధ్య సేవలు

MMTS Trains: హైదరాబాద్, సికింద్రాబాద్ సబర్బన్‌కు సంబంధించి 4 ఎంఎంటీఎస్ రైళ్లను దక్షిణ మధ్య రైల్వే ప్రారంభించింది.

కొత్తగా మరో 4 ఎంఎంటీఎస్ రైళ్లు, మేడ్చల్-లింగంపల్లి, మేడ్చల్-హైదరాబాద్ మధ్య సేవలు

Source : Representative Image

MMTS Trains: కొత్తగా మరో 4 ఎంఎంటీఎస్ రైళ్లను ప్రవేశపెడుతూ దక్షిణ మధ్య రైల్వే జోన్ నిర్ణయం తీసుకుంది. హైదరాబాద్, సికింద్రాబాద్ సబర్బన్ లో ఈ కొత్త ఎంఎంటీఎస్ లు సేవలు అందించనున్నాయి. ఎంఎంటీఎస్ లోకల్ రైలు సర్వీసులను మేడ్చల్-లింగంపల్లి, మేడ్చల్- హైదరాబాద్ స్టేషన్ల మధ్య కొత్తగా నాలుగు సర్వీసులను అందుబాటులోకి తీసుకువచ్చారు. ఈ నెల 1 నుంచే ఈ సర్వీసులను అందుబాటులోకి తీసుకువస్తూ శుక్రవారం దక్షిణ మధ్య రైల్వే జోన్ నిర్ణయం తీసుకుంది. 

సికింద్రాబాద్, కాచిగూడ నుంచి నడుస్తున్న మూడు వందే భారత్ రైళ్లను అందుకునేందుకు వీలుగా ఉండే ఉండే విధంగా ఎంఎంటీఎస్ రైళ్లను అనుసంధానిస్తున్నట్లు దక్షిణ మధ్య రైల్వే జోన్ ప్రకటించింది. అందుకు సంబంధించిన నూతన టైమ్ టేబుల్ ను కూడా విడుదల చేసింది. అందుకోసం సికింద్రాబాద్ - ఉమ్‌దానగర్, ఫలక్‌నుమా - సికింద్రాబాద్ స్టేషన్ల మధ్య కూడా ఎంఎంటీఎస్ సర్వీసులను నడుపుతున్నట్లు దక్షిణ మధ్య రైల్వే తెలిపింది.

రోజూ మేడ్చల్ లో ఉదయం 7.20 గంటలకు, మధ్యాహ్నం 3.30 గంటలకు ఎంఎంటీఎస్ సేవలు ఉంటాయి. అలాగే, లింగంపల్లి నుంచి ఉదయం 10.20 గంటలకు, సాయంత్రం 6.10 గంటలలకు ఎంఎంటీఎస్ సర్వీసులు అందుబాటులో ఉంటాయి. ఆదివారం సర్వీసులు నిలిపివేయనున్నట్లు అధికారులు తెలిపారు. అలాగే, మేడ్చల్ - హైదరాబాద్ కు సంబంధించిన సర్వీసు ఉదయం 11.50 గంటలకు మేడ్చల్ లో బయల్దేరుతుంది. తిరిగి మధ్యాహ్నం 1.40 గంటలకు హైదరాబాద్ లో స్టేషన్ నుంచి బయల్దేరుతుంది.

కొత్త ఎంఎంటీఎస్ సేవలు విద్యార్థులు, ప్రయాణికులు, చిన్న వ్యాపారులు, మహిళలు, ఉద్యోగులు మొదలైన వారికి ప్రయోజనకరంగా ఉంటాయని దక్షిణ మధ్య రైల్వే జనరల్ మేనేజర్ అరుణ్ కుమార్ జైన్ తెలిపారు. కొత్త టైమ్ టేబుల్ కార్యాలయాలకు వెళ్లే వారి ప్రయాణ అవసరాలకు అనుగుణంగా రూపొందించినట్లు చెప్పారు.

ప్రత్యేక వందేభారత్ రైళ్లు

అక్టోబరు 14న అహ్మదాబాద్‌లోని జరిగే దాయాది దేశాల మధ్య పోరుకు భారీగా అభిమానులు తరలిరానుండడంతో క్రికెట్‌ అభిమానులకు భారతీయ రైల్వే శుభవార్త చెప్పింది. భారత్‌-పాక్‌ మ్యాచ్ జరిగే రోజున మధ్యప్రదేశ్‌, రాజస్థాన్‌, మహారాష్ట్రల నుంచి అహ్మదాబాద్‌కు ప్రత్యేక వందే భారత్‌ రైళ్లు నడపనున్నట్లు వెల్లడించింది. ఈ రైళ్లు నడిపేందుకు ప్రణాళికలు సిద్ధం చేస్తున్నట్లు రైల్వే అధికారులు వెల్లడించారు. త్వరలోనే రైళ్ల షెడ్యూల్‌, టికెట్ ధరల వివరాలు వెల్లడిస్తామని తెలిపారు. 

 

మ్యాచ్‌ ప్రారంభం కావడానికి కొన్నిగంటల ముందు ఈ ప్రత్యేక రైళ్లు సబర్మతీ, అహ్మదాబాద్ స్టేషన్లకు చేరుకుంటాయని రైల్వే అధికారులు తెలిపారు. ఈ రెండు స్టేషన్లు నరేంద్ర మోదీ స్టేడియానికి దగ్గరగా ఉండటంతో అభిమానులు సులభంగా స్టేడియానికి చేరుకోవచ్చన్నారు. అదేవిధంగా మ్యాచ్‌ ముగిసిన కొద్ది గంటల తర్వాత ఈ రైళ్లు అహ్మదాబాద్‌ నుంచి తిరిగి బయల్దేరుతాయని, దాని వల్ల అభిమానులు అదే రోజు తిరిగి తమ స్వస్థలాలకు చేరుకోవచ్చని తెలిపారు.