Oppo A2: ఎక్కువ స్టోరేజ్ ఫోన్ బడ్జెట్ ధరలో కావాలా? - 24 జీబీ ర్యామ్, 512 జీబీ స్టోరేజ్ ఒప్పో ఫోన్ రూ.20 వేలకే!

Oppo 24GB RAM Phone: 24 జీబీ వరకు ర్యామ్, 512 జీబీ వరకు స్టోరేజ్‌తో ఒప్పో ఏ2 ఫోన్ మార్కెట్లో లాంచ్ అయింది.

ఒప్పో ఏ2 స్మార్ట్ ఫోన్ చైనాలో లాంచ్ అయింది.

Source : Oppo

Oppo 512GB Storage Phone: ఒప్పో ఏ2 (Oppo A2) స్మార్ట్ ఫోన్ చైనాలో లాంచ్ అయింది. కంపెనీ లాంచ్ చేసిన లేటెస్ట్ బడ్జెట్ ఫోన్ ఇదే. ఒప్పో ఏ-సిరీస్‌లో లాంచ్ అయిన ఈ ఫోన్ మీడియాటెక్ డైమెన్సిటీ 6020 ప్రాసెసర్‌పై పని చేయనుంది. 12 జీబీ వరకు ర్యామ్, 512 జీబీ వరకు ఇంటర్నల్ స్టోరేజ్ కూడా ఉంది. ఇందులో 6.72 అంగుళాల ఎల్టీపీఎస్ ఎల్సీడీ డిస్‌ప్లేను అందించారు. దీని స్క్రీన్ రిఫ్రెష్ రేట్ 90 హెర్ట్జ్‌గా ఉంది. ఇందులో వెనకవైపు 50 మెగాపిక్సెల్ కెమెరా ఉంది. 33W ఫాస్ట్ ఛార్జింగ్‌ను సపోర్ట్ చేసే 5000 ఎంఏహెచ్ బ్యాటరీ ఒప్పో ఏ2 5జీలో అందించారు.

ఒప్పో ఏ2 ధర (Oppo A2 Price)
ఈ స్మార్ట్ ఫోన్‌లో రెండు వేరియంట్లు అందుబాటులో ఉన్నాయి. వీటిలో బేస్ వేరియంట్ అయిన 12 జీబీ ర్యామ్ + 256 జీబీ స్టోరేజ్ వేరియంట్ ధర 1,699 యువాన్లుగా (సుమారు రూ.16,500) నిర్ణయించారు. ఇక 12 జీబీ ర్యామ్ + 512 జీబీ స్టోరేజ్ ధర 1,799 యువాన్లుగా (సుమారు రూ.20,000) ఉంది. ఐస్ క్రిస్టల్ వయొలెట్, జిన్‌గాయ్ బ్లాక్, కింగ్‌బో ఎమరాల్డ్ రంగుల్లో దీన్ని కొనుగోలు చేయవచ్చు. ఈ ఫోన్ మనదేశంలో ఎప్పుడు లాంచ్ కానుందో తెలియరాలేదు.

ఒప్పో ఏ2 స్పెసిఫికేషన్లు, ఫీచర్లు (Oppo A2 Specifications, Features)
ఇందులో 6.72 అంగుళాల ఫుల్ హెచ్‌డీ+ ఎల్టీపీఎస్ ఎల్సీడీ డిస్‌ప్లే అందించారు. దీని స్క్రీన్ రిఫ్రెష్ రేట్ 90 హెర్ట్జ్‌గానూ, స్క్రీన్ టు బాడీ రేషియో  91.4 శాతంగానూ ఉంది. అంతే కాకుండా 391 పీపీఐ పిక్సెల్ డెన్సిటీ, 680 నిట్స్ పీక్ బ్రైట్‌నెస్ ఫీచర్లు కూడా ఉన్నాయి. ఆక్టాకోర్ మీడియాటెక్ డైమెన్సిటీ 6020 ప్రాసెసర్‌పై ఒప్పో ఏ2 5జీ పని చేయనుంది. 12 జీబీ వరకు ఎల్పీడీడీఆర్4ఎక్స్ ర్యామ్ ఈ ఫోన్‌లో ఉంది. స్టోరేజ్ నుంచి మరో 12 జీబీని ర్యామ్‌లా ఉపయోగించవచ్చు. అంటే 24 జీబీ ర్యామ్ ఇందులో ఉండనుందన్న మాట. 512 జీబీ వరకు యూఎఫ్ఎస్ 2.2 స్టోరేజ్ కూడా ఈ ఫోన్‌లో ఉంది.

ఇక కెమెరాల విషయానికి వస్తే... ఫోన్ వెనకవైపు రెండు కెమెరాలు ఉన్నాయి. వీటిలో ప్రధాన కెమెరా సామర్థ్యం 50 మెగాపిక్సెల్ కాగా, దీంతోపాటు 2 మెగాపిక్సెల్ సెన్సార్ కూడా ఉంది. సెల్ఫీలు, వీడియో కాల్స్ కోసం ముందువైపు 8 మెగాపిక్సెల్ కెమెరా అందించారు.

వైఫై, బ్లూటూత్, యూఎస్‌బీ 2.0, 3.5 ఎంఎం ఆడియో జాక్, యూఎస్‌బీ టైప్-సీ పోర్టు, జీపీఎస్, ఏ-జీపీఎస్ వంటి కనెక్టివిటీ ఫీచర్లు అందుబాటులో ఉన్నాయి. యాక్సెలరోమీటర్, యాంబియంట్ లైట్ సెన్సార్, జియోమ్యాగ్నటిక్ సెన్సార్, గ్రావిటీ సెన్సార్, ప్రాక్సిమిటీ సెన్సార్లు కూడా అందించారు. ఫింగర్ ప్రింట్ సెన్సార్‌ ద్వారా ఫోన్‌ను అన్ లాక్ చేయవచ్చు. ఫేస్ అన్‌లాక్ సపోర్ట్ కూడా ఇందులో ఉంది. దీని బ్యాటరీ సామర్థ్యం 5000 ఎంఏహెచ్ కాగా, 33W సూపర్‌వూక్ ఫాస్ట్ ఛార్జింగ్ సపోర్ట్ కూడా ఉన్నాయి. దీని మందం 0.79 సెంటీమీటర్లు కాగా, బరువు 193 గ్రాములుగా ఉంది.