Cockroaches : బొద్దింకలు(కాక్రోచ్) ఆరోగ్యానికి ప్రమాదమా? వీటి వల్ల వ్యాధులు ఎలా వ్యాపిస్తాయంటే..

Diseases Spread by Cockroaches : బొద్దింకల (కాక్రోచ్) బెడదా ఎక్కువగా ఉందా? వాటివల్ల వ్యాపించే వ్యాధులు ఏంటి? ఎలాంటి జాగ్రత్తలు తీసుకుంటే మంచిదో ఇప్పుడు తెలుసుకుందాం.

బొద్దింకల ద్వారా వ్యాపించే వ్యాధులు ఇవే

బొద్దింకలు ఎక్కువగా చెత్త ప్రాంతాలు, డ్రెయిన్లు, బాత్రూమ్ మూలల్లో తిరుగుతుంటాయి. అక్కడి నుంచి బ్యాక్టీరియా, వైరస్‌లను కాళ్లకు, శరీరానికి అంటించుకుని వంటగది వరకు తీసుకొస్తాయి. ఆ తర్వాత ఆహారంపై, పాత్రలపై తిరగడం వల్ల క్రిములు మన శరీరంలోకి వెళ్లే ప్రమాదం ఉంటుంది.

బొద్దింకలు తాకిన ఆహారం తింటే ఫుడ్ పాయిజనింగ్ వచ్చే అవకాశం ఉందని ఆరోగ్య నిపుణులు చెబుతున్నారు. ముఖ్యంగా సాల్మొనెల్లా, ఈ-కోలై వంటి హానికర బ్యాక్టీరియా వ్యాపించే ప్రమాదం ఉంటుంది. దీని వల్ల వాంతులు, విరేచనాలు, కడుపు నొప్పి వంటి సమస్యలు రావచ్చు.

బొద్దింకల మలము, రెక్కలు, చనిపోయిన భాగాలు గాల్లో కలిసిపోతాయి. ఇవి కొందరికి అలర్జీని ట్రిగ్గర్ చేస్తాయి. ముఖ్యంగా పిల్లల్లో ఆస్తమా దాడులు ఎక్కువయ్యే అవకాశం ఉందని పరిశోధనలు చెబుతున్నాయి.

పరిశుభ్రత లేకపోతే బొద్దింకల ద్వారా టైఫాయిడ్, డైరీయా, గ్యాస్ట్రోఎంటరైటిస్ వంటి వ్యాధులు వ్యాపించే ప్రమాదం ఉంటుంది. ముఖ్యంగా వేసవిలో ఇవి వేగంగా పెరుగుతాయి.

బొద్దింకలు రాత్రి సమయంలో ఎక్కువగా బయటకు వస్తాయి. వంటగదిలో ఓపెన్‌గా ఉంచిన ఆహారం, పండ్లు, కూరగాయలపై తిరగడం వల్ల అవి కలుషితమయ్యే అవకాశం ఉంటుంది.

రోగనిరోధక శక్తి తక్కువగా ఉన్నవారికి బొద్దింకల వల్ల వచ్చే ఇన్ఫెక్షన్లు త్వరగా సోకే ప్రమాదం ఉంటుంది. ముఖ్యంగా చిన్నపిల్లలు, వృద్ధులు, అనారోగ్యంతో బాధపడుతున్నవారు మరింత జాగ్రత్తగా ఉండాలి.

ఇంట్లో తడి ఎక్కువగా ఉండటం, చెత్త పేరుకుపోవడం, సింక్‌లు శుభ్రంగా లేకపోవడం బొద్దింకలకు అనుకూల పరిస్థితులు కల్పిస్తాయి. అందుకే ఇంటిని పరిశుభ్రంగా ఉంచడం చాలా ముఖ్యం.

ఇంట్లో బొద్దింకలు ఎక్కువగా కనిపిస్తే సాధారణ క్లీనింగ్ సరిపోకపోవచ్చు. అలాంటి సమయంలో ప్రొఫెషనల్ పెస్ట్ కంట్రోల్ చేయించడం మంచిది. లేకపోతే సమస్య మళ్లీ మళ్లీ రావచ్చు.