New Maruti Swift 2024: కొత్త మారుతి స్విఫ్ట్ వచ్చేసింది - ఎలా ఉందో చూశారా?

కొత్త మారుతి స్విఫ్ట్ కారు మనదేశంలో లాంచ్ అయింది. దీని ధర ఎంత? కారు ఎలా ఉంది?

మారుతి స్విఫ్ట్ 2024

కొత్త తరం మారుతి సుజుకి స్విఫ్ట్ మనదేశంలో లాంచ్ అయింది. దీని ధర రూ.6.49 లక్షల నుంచి ప్రారంభం అయింది. టాప్ ఎండ్ వేరియంట్ ధర రూ.9.64 లక్షలుగా ఉంది. కొత్త స్టైలింగ్, మరిన్ని ఫీచర్లు, మంచి సేఫ్టీ స్టాండర్డ్స్‌తో ఈ కారు మనదేశంలో ఎంట్రీ ఇచ్చింది.

ఎల్ఎక్స్ఐ, వీఎక్స్ఐ, వీఎక్స్ఐ (ఓ), జెడ్ఎక్స్ఐ, జెడ్ఎక్స్ఐ ప్లస్ వేరియంట్లలో దీన్ని కొనుగోలు చేయవచ్చు. తొమ్మిది కలర్ ఆప్షన్లతో ఈ కారు మార్కెట్లో ఎంట్రీ ఇచ్చింది. స్టైలింగ్ పరంగా చూసుకుంటే ముందు వెర్షన్ కంటే ఇందులో చాలా మార్పులు చేశారు.

కొత్త గ్రిల్, కొత్త హెడ్ ల్యాంప్స్, కొత్త తరహా బంపర్‌ను ఇందులో చూడవచ్చు. ఈ కారులో కొత్త అల్లాయ్ వీల్స్‌ను అందించారు. డోర్ హ్యాండిల్ కూడా ఇంతకు ముందు తరహాలో కాకుండా కొత్తగా ఉంది. దీని పొడవు ముందు వెర్షన్ కంటే కొంచెం ఎక్కువగా ఉంది. కానీ సన్నగా ఉంది. అలాగే ఎత్తు కూడా ఎక్కువగా ఉంది.

దీని వీల్ బేస్ మాత్రం ముందు వెర్షన్ తరహాలోనే ఉంది. బూట్ స్పేస్‌లో కూడా ఎక్కువ మార్పులు చేయలేదు. ఇంటీరియర్ కూడా కొత్త లుక్‌ను పొందింది. తొమ్మిది అంగుళాల టచ్ స్క్రీన్ ఇన్‌ఫోటెయిన్ మెంట్ సిస్టంను ఈ కారులో అందించారు.

కనెక్టెడ్ కార్ టెక్నాలజీ, వెనకవైపు కెమెరా, ఆరు ఎయిర్ బ్యాగ్స్ ఫీచర్లను ఇందులో చూడవచ్చు. దీంతో పాటు ఈఎస్సీ, క్లైమెట్ కంట్రోల్, వైర్‌లెస్ ఛార్జింగ్, అర్కామిస్ సౌండ్ సిస్టం, వెనకవైపు ఏసీ వెంట్లు, టైప్-సీ ఛార్జింగ్ పోర్టు కూడా ఉన్నాయి.

దీని ఇంజిన్‌లో 3 సిలిండర్ యూనిట్ అందించారు. ఇది తక్కువ పవర్‌ను అందించనుంది. మైలేజీ కూడా 25.72 కిలోమీటర్లకు పెరిగింది. ఇది ముందు వెర్షన్ కంటే మూడు కిలోమీటర్లు ఎక్కువగా ఉంది. హ్యుందాయ్ ఐ10 నియోస్, టాటా టియాగోలతో ఇది పోటీ పడనుంది.