Car Mileage Drops in Winter : కారు మైలేజ్ తగ్గిందా? ఈ డ్రైవింగ్ చిట్కాలు పాటించండి

Winter Driving Tips : చలికాలంలో కార్ మైలేజ్ తగ్గుతూ ఉంటుంది. సరైన డ్రైవింగ్ చిట్కాలు, సంరక్షణతో ఇంధన ఖర్చు తగ్గించుకోవచ్చు. అవేంటో ఇప్పుడు చూసేద్దాం.

కారు మైలేజ్ని పెంచే టెక్నిక్స్ ఇవే

చలికాలంలో వాహనాల మైలేజ్ తగ్గడం సాధారణమని.. ఏమీ చేయలేమని అనుకుంటారు. కానీ వాస్తవానికి కొంచెం అవగాహన, సరైన అలవాట్లతో మీరు చాలా వరకు ఆ సమస్యను మెరుగుపరచవచ్చు. సరైన డ్రైవింగ్ శైలి, సర్వీసింగ్, అవసరమైన విడిభాగాల సంరక్షణ మైలేజ్ను పెంచడమే కాకుండా కారు పనితీరును కూడా మెరుగుపరుస్తుంది.

చలికాలంలో టైర్లలోని గాలి కుంచించుకుపోతుంది. దీనివల్ల ఒత్తిడి వాటంతట అదే తగ్గుతుంది. గాలి తక్కువగా ఉంటే కారు ఎక్కువ శక్తిని ఉపయోగించాల్సి వస్తుంది. దీంతో ఇంధనం ఎక్కువ ఖర్చవుతుంది. కాబట్టి వారానికి లేదా పదిహేను రోజులకు ఒకసారి టైర్ ప్రెజర్ని తప్పనిసరిగా చెక్ చేయించుకోండి. కంపెనీ సూచించిన స్థాయి వరకు గాలిని నింపండి.

చలికాలంలో హీటర్, డీఫాగర్ లేకుండా డ్రైవ్ చేయడం కష్టంగా అనిపించవచ్చు. కానీ వాటిని ఎక్కువగా ఉపయోగించడం ఇంజిన్ మీద అదనపు భారం కలిగిస్తుంది. ఇది నేరుగా మైలేజ్ మీద ప్రభావం చూపుతుంది. నిజంగా అవసరమైనప్పుడు మాత్రమే వాటిని ఉపయోగించడానికి ప్రయత్నించండి. అనవసరంగా ఆన్ చేయకుండా ఉంటే ఇంధన ఖర్చు కూడా తగ్గుతుంది.

అకస్మాత్తుగా వేగంగా పెంచడం, పదేపదే బ్రేక్ వేస్తూ డ్రైవ్ చేయడం మైలేజ్కు అతిపెద్ద శత్రువు. చలికాలంలో ఇంజిన్ను స్టార్ట్ చేసిన తర్వాత.. అది సాధారణ ఉష్ణోగ్రతకు రావడానికి కొంత సమయం ఇవ్వండి. తరువాత స్థిరమైన వేగంతో కారును నడపండి. ఇది ఇంజిన్ మీద తక్కువ ఒత్తిడిని కలిగిస్తుంది. ఇంధనాన్ని ఆదా చేస్తుంది.

చలికాలంలో తప్పు గ్రేడ్ ఇంజిన్ ఆయిల్ వాడటం వలన వాహనం పనితీరు, మైలేజ్ రెండూ దెబ్బతినవచ్చు. కంపెనీ సిఫార్సు చేసిన ఆయిల్ మాత్రమే వాడండి. దీనితో పాటు సమయానికి సర్వీస్ చేయించుకోండి. శుభ్రమైన ఫిల్టర్లు, మంచి ఇంజిన్, సరైన ట్యూనింగ్తో మైలేజ్ వాటంతట అదే మెరుగుపడుతుంది.

భారీ సామానులను తీసుకెళ్లడం, అనవసరంగా వాహనాన్ని స్టార్ట్ చేసి ఉంచడం, చిన్న మార్గాల్లో పదేపదే స్టార్ట్-స్టాప్ చేయడం కూడా మైలేజీని తగ్గిస్తుంది. అనవసరమైన బరువును తగ్గించడానికి ప్రయత్నించండి. ఒకే ట్రిప్లో ఎక్కువ పనిని పూర్తి చేయండి. ఈ చిన్న అలవాట్లతో శీతాకాలంలో కూడా కారు మైలేజీని చాలా వరకు నియంత్రించవచ్చు.