Iran War Update: యుద్ధంతో ఖర్చైపోతున్న అమెరికా - ఎదురొస్తున్న ఆర్థిక సంక్షోభం - ఆపక తప్పదా?
Trump: ఖొమైనీని చంపేసిన తర్వాత కూడా యుద్ధం ఎందుకు చేస్తున్నారో అమెరికన్లకు అర్థం కావడం లేదు. యుద్ధం ఆపకపోతే ఆర్థిక సంక్షోభంలోకి వెళ్లిపోతామని సలహాదారులు ట్రంప్ కు అదే పనిగా చెబుతున్నారు.
Will America stop the war: ఇరాన్ పై చేస్తున్న దాడులతో అమెరికా తీవ్ర నష్టాలకు గురవుతోంది. అమెరికా ఆర్థిక వ్యవస్థను ఉక్కిరిబిక్కిరి చేస్తున్నాయి. యుద్ధం వల్ల కలుగుతున్న విపరీతమైన వ్యయం దేశాన్ని భారీ రుణ ఊబిలోకి నెడుతుండటంతో, యుద్ధాన్ని తక్షణమే ముగించాలని వైట్ హౌస్ సలహా మండలి అధ్యక్షుడు డొనాల్డ్ ట్రంప్పై తీవ్ర ఒత్తిడి తెస్తోంది. ఒకవైపు రికార్డు స్థాయికి చేరుతున్న జాతీయ అప్పు, మరోవైపు సామాన్య అమెరికన్లపై పడుతున్న ద్రవ్యోల్బణ భారం ఇప్పుడు ట్రంప్ యంత్రాంగానికి పెను సవాలుగా మారింది.
ఈ యుద్ధంలో ఆర్థిక వ్యయాల మధ్య ఉన్న భారీ వ్యత్యాసం అమెరికాను ఆందోళనకు గురిచేస్తోంది. ఇరాన్ తయారీ షాహెద్-136 వంటి వన్-వే అటాక్' డ్రోన్ల ధర కేవలం 20 వేల నుండి 50 వేల డాలర్లు మాత్రమే కాగా, వాటిని గాలిలోనే అడ్డుకోవడానికి అమెరికా ఉపయోగిస్తున్న ఇంటర్సెప్టర్ మిస్సైళ్ల ధర ఒక్కో షాట్కు 15 లక్షల నుండి 40 లక్షల డాలర్ల వరకు ఉంటోంది. అంటే, శత్రువు ప్రయోగించే అతి తక్కువ ధర ఆయుధాలను ఎదుర్కోవడానికి అమెరికా వందల రెట్లు ఎక్కువ ఖర్చు చేయాల్సి రావడం వల్ల భారీగా ఖర్చు అవుతోంది.
ప్రస్తుత గణాంకాల ప్రకారం, అమెరికా ఈ యుద్ధం కోసం సగటున రోజుకు 100 కోట్ల డాలర్లు ఖర్చు చేస్తోందని అంచనా . మార్చి 2026 నాటికి అమెరికా జాతీయ అప్పు రికార్డు స్థాయిలో 38.9 ట్రిలియన్ల డాలర్లకు చేరకుంది. గత కొద్ది కాలంగా ఈ అప్పు ప్రతి 100 రోజులకు సుమారు 1 ట్రిలియన్ డాలర్ల చొప్పున పెరుగుతుండటంతో ఆర్థిక నిపుణులు హెచ్చరికలు జారీ చేస్తున్నారు. దేశ రక్షణ బడ్జెట్ కంటే కూడా అప్పుపై కట్టే వడ్డీయే ఎక్కువగా ఉండటం అమెరికా ఆర్థిక పునాదులను కదిలిస్తోంది.
మరోవైపు, అమెరికా వీధుల్లో యుద్ధానికి వ్యతిరేకంగా నిరసనలు మిన్నంటుతున్నాయి. స్వదేశంలో మౌలిక సదుపాయాలు, విద్య, వైద్యంపై వెచ్చించాల్సిన పన్నుల సొమ్మును ఇతర దేశాల యుద్ధాల కోసం తగలేయడంపై అమెరికన్లు ఆగ్రహం వ్యక్తం చేస్తున్నారు. 2026 నవంబర్లో జరగబోయే కాంగ్రెస్ మధ్యంతర ఎన్నికల దృష్ట్యా, ఓటర్ల ఆగ్రహాన్ని చల్లార్చాలంటే యుద్ధాన్ని నిలిపివేయడం ఒక్కటే మార్గమని ట్రంప్ సన్నిహితులు బలంగా వాదిస్తున్నారు. అమెరికా ఫస్ట్ నినాదంతో అధికారంలోకి వచ్చిన ట్రంప్, ఇప్పుడు తన వాగ్దానాన్ని నిలబెట్టుకోవాల్సిన క్లిష్ట పరిస్థితిలో ఉన్నారు.
అంతర్జాతీయ దౌత్యం కంటే దేశ ఆర్థిక స్థిరత్వమే ముఖ్యం అని భావిస్తున్న వైట్ హౌస్ సలహాదారులు, ఇరాన్తో ఒక శాంతి ఒప్పందానికి రావాలని ట్రంప్ను కోరుతున్నారు. యుద్ధం ఇలాగే మరికొన్నాళ్లు కొనసాగితే అమెరికా డాలర్ ప్రపంచ ఆధిపత్యాన్ని కోల్పోయే ప్రమాదం ఉందని వారు హెచ్చరిస్తున్నారు. అటు యుద్ధ క్షేత్రంలో ఉద్రిక్తతలు, ఇటు స్వదేశంలో ఆర్థిక ఒత్తిళ్ల మధ్య ట్రంప్ తీసుకునే నిర్ణయం రాబోయే కాలంలో ప్రపంచ రాజకీయ ముఖచిత్రాన్ని మార్చనుంది.
Before You Go
PM Modi Midnight Statement on Paper Leak | పేపర్ లీకేజీలపై మోదీ అర్ధరాత్రి ప్రకటన
టాప్ హెడ్ లైన్స్
ట్రెండింగ్ వార్తలు
