Maharashtra News: ప్రెగ్నెంట్ అని బ్లాక్ మెయిల్- ప్రియుడి నుంచి రూ.67 లక్షలు దోచేసిన యువతి!

Maharashtra News: ప్రెగ్నెంట్ అని బ్లాక్ మెయిల్ చేసి ప్రియుడి దగ్గర నుంచి రూ.67 లక్షలు దోచేసింది ఓ యువతి.

(Image Source: Pixabay)

Maharashtra News: ఓ ప్రియురాలు చేసిన మోసానికి ప్రియుడు నట్టేట మునిగాడు. గర్భం దాల్చినట్లు ప్రియుడ్ని బ్లాక్ మెయిల్ చేసిన యువతి అతడి దగ్గర నుంచి పలు దఫాలుగా రూ.67 లక్షలు దోచుకుని పరారైంది. దీంతో ప్రియుడు.. పోలీసులను ఆశ్రయించాడు.

ఇలా జరిగింది

మహారాష్ట్ర పుణేలో ఈ సంఘటన జరిగింది. ఓ వ్యాపారి దగ్గర బాధితుడు (26) ఏళ్లు పని చేస్తున్నాడు. ఈ ఏడాది జనవరిలో కోరెగావ్ భీమా ప్రాంతంలోని ఒక లాడ్జిలో బస చేసిన సందర్భంగా ఓ యువతితో పరిచయం ఏర్పడింది. అనంతరం ఇద్దరి పరిచయం ప్రేమ వరకు వెళ్లింది. అయితే యువతి ప్రేమిస్తుందని నమ్మిన బాధితుడు అప్పుడప్పుడూ అడిగితే ఆమెకు డబ్బులు ఇచ్చేవాడు.

బ్లాక్ మెయిల్

అయితే కొద్ది రోజుల తర్వాత ఆ యువతి మరో ఇద్దరు స్నేహితులతో కలిసి బాధితుడ్ని బ్లాక్‌మెయిల్‌ చేసింది. హడప్సర్‌లో నివాసం ఉండే రవీంద్ర హింగ్‌మీర్‌ను భర్తగా, గౌరవ్‌ అనే వ్యక్తిని సామాజిక కార్యకర్తగా పరిచయం చేసింది. తాను ప్రెగ్నెంట్‌ అని, రేప్‌ కేసు పెడతానంటూ ఆ వ్యక్తిని బెదిరించింది. దీంతో ఆ ముగ్గురు కలిసి అతడి నుంచి పలు దఫాలుగా రూ.67.07 లక్షలు వసూలు చేశారు.

ఫిర్యాదు

అన్ని డబ్బులు ఇచ్చినా ఇంకా డిమాండ్‌ చేస్తుండటంతో ఆ వ్యక్తి  పోలీస్ స్టేషన్‌లో ఫిర్యాదు చేశాడు. దీంతో క్రైమ్ బ్రాంచ్‌కు చెందిన యాంటీ ఎక్స్‌టార్షన్ సెల్ బృందం రంగంలోకి దిగింది. ఈ కేసు దర్యాప్తును ప్రారంభించింది. యువతి స్నేహితులైన రవీంద్ర, నిఖిల్‌ను పోలీసులు అరెస్ట్‌ చేశారు. పరారీలో ఉన్న ఆ యువతి కోసం గాలిస్తున్నారు.

" ఓ యువతి తాను రేప్ చేశానని బెదిరిస్తోందని ఫిర్యాదు చేశాడు వ్యక్తి. తన బంధువుకు సంబంధించిన ఓ వ్యాపార సంస్థలో అతను పని చేస్తున్నాడు. నిందితురాలు మరో ఇద్దరు వ్యక్తులతో కలిపి తన దగ్గర డబ్బులు వసూలు చేసిందని ఆ వ్యక్తి ఫిర్యాదు ఇచ్చాడు. ఈ కేసులో ఇద్దరు వ్యక్తులను మేం అరెస్ట్ చేశాం. యువతి కోసం గాలిస్తున్నాం.                                            "

-  పోలీసులు