Prakasam Politics: ప్రకాశం జిల్లాలో వైసీపీకి కష్టాలు! స్థానాల మార్పుతో మరింత గందరగోళం
YSRCP Prakasam Politics: ప్రకాశం జిల్లాలో ఇప్పటికే పార్టీ అంతర్గత రాజకీయాలు అంతంతమాత్రంగానే ఉన్నాయి. ఇప్పుడు ఇన్ చార్జ్ ల మార్పు తర్వాత ఈ పరిస్థితి మరింత దిగజారుతుందో లేక మెరుగు పడుతుందో చూడాలి.
YSRCP Politics: యర్రగొండపాలెం ఎమ్మెల్యేగా ఉన్న ఆదిమూలపు సురేష్ ఇప్పుడు కొండెపి నియోజకవర్గ ఇన్ చార్జ్..
వేమూరు నియోజకవర్గ ఎమ్మెల్యేగా ఉన్న మేరుగ నాగార్జున ఇప్పుడు సంతనూతలపాడు ఇన్ చార్జ్..
ఈ రెండు నియామకాలతో ప్రకాశం జిల్లాలో వైసీపీ అంతర్గత రాజకీయం మరింత గందరగోళంగా మారింది. కొండెపిలో టీడీపీ ఎమ్మెల్యే డోలా బాల వీరాంజనేయస్వామిని ఓడించేందుకు మంత్రిగా ఉన్న ఆదిమూలపు సురేష్ ని అక్కడికి పంపించారని అనుకున్నా.. ఆయన ప్రస్తుతం ప్రాతినిధ్యం వహిస్తున్న యర్రగొండపాలెంకు ఎవరినీ ఇన్ చార్జ్ గా వేయకపోవడం విశేషం. ఇక సంతనూతలపాడుకి కొత్త ఇన్ చార్జ్ గా మంత్రి మేరుగ నాగార్జునను పంపించడంతో అక్కడ ఉన్న వైసీపీ ఎమ్మెల్యే సుధాకర్ బాబు పరిస్థితి ఏంటనేది చర్చనీయాంశంగా మారింది. ఈ మార్పుతో మేరుగ నాగార్జున నియోజకవర్గం వేమూరుకి కొత్త ఇన్ చార్జ్ రావడం విశేషం. మొత్తమ్మీద వైసీపీ అంతర్గత రాజకీయాలు మరింత గందరగోళానికి దారితీశాయనే చెప్పాలి.
ఇప్పటికే ప్రకాశం జిల్లాలో వైసీపీకి వ్యతిరేక పవనాలు వీస్తున్నాయనే ప్రచారం జరుగుతోంది. ఒంగోలు ఎమ్మెల్యే, మాజీ మంత్రి బాలినేని శ్రీనివాసులరెడ్డి వైసీపీకి మంటపెడుతున్నారు. తన వ్యాఖ్యలతో అధినేతకు చికాకు కలిగిస్తున్నారు. ఆయనకు ప్రస్తుత జిల్లా మంత్రి ఆదిమూలపు సురేష్ కి అస్సలు పడటంలేదు. బాలినేనికి కూడా టికెట్ డౌట్ అనుకుంటున్న సందర్భంలో కొత్తగా మరికొన్ని నియోజకవర్గాల్లో ఇన్ చార్జ్ ల మార్పు కలకలం రేపింది.
ఉమ్మడి ప్రకాశం లోని 12 స్థానాల్లో గత ఎన్నికల్లో టీడీపీ 4 స్థానాలు కైవసం చేసుకుంది. చీరాల ఎమ్మెల్యే కరణం బలరాం, వైసీపీ వైపు రావడంతో ప్రస్తుతం ముగ్గురు టీడీపీ ఎమ్మెల్యేలున్నారు. మిగతా చోట్ల వైసీపీ ఎమ్మెల్యేలు ఉన్నా కూడా.. ఎన్నికల నాటికి పరిస్థితులు అంత సానుకూలంగా కనపడటంలేదు. అందుకే సీఎం జగన్ ఈ ఫార్ములా ప్రయోగించారు. రెండు స్థానాలకు ఇన్ చార్జ్ లను ప్రకటించారు సీఎం జగన్. ఆ రెండు స్థానాలతోపాటు మంత్రి ఆదిమూలపు సురేష్ ప్రాతినిధ్యం వహిస్తున్న యర్రగొండపాలెం కూడా ఇప్పుడు సందిగ్ధంలో పడింది. ప్రస్తుతానికి అక్కడ ఇన్ చార్జ్ గా ఎవరినీ ప్రకటించలేదు. అలాగని మంత్రి సురేష్ ఆ నియోజకవర్గ బాధ్యతలు చూసుకుంటారని కూడా చెప్పలేం. ఆయనకు కొత్తగా కొండెపి బాధ్యతలు అప్పగించడంతో ఎన్నికల ఏడాదిలో అక్కడ తన టీమ్ ని సిద్ధం చేసుకోడానికి సురేష్ ప్రయత్నాలు ప్రారంభించారు.
ఎందుకీ మార్పులు..?
ఇటీవల తెలంగాణ ఎన్నికల్లో సిట్టింగ్ లకు అధిక సీట్లిచ్చి దెబ్బతిన్నారు కేసీఆర్. ఏపీలో కూడా అలాంటి ఫలితాలు పునరావృతమవుతాయనే అనుమానం జగన్ లో ఉంది. అందుకే ఆయన ఇన్ చార్జ్ ల పేరుతో అభ్యర్థులను మార్చేస్తున్నారు. కొత్త అభ్యర్థులను కొన్నిచోట్ల తెరపైకి తెస్తుండగా, మిగతా చోట్ల ఉన్నవారినే అటు ఇటు మారుస్తున్నారు. ఈ ప్రయోగం ఈసారి ఫలిస్తుందో లేదో చూడాలి. అయితే ప్రకాశం జిల్లాలో ఇప్పటికే పార్టీ అంతర్గత రాజకీయాలు అంతంతమాత్రంగానే ఉన్నాయి. ఇప్పుడు ఇన్ చార్జ్ ల మార్పు తర్వాత ఈ పరిస్థితి మరింత దిగజారుతుందో లేక మెరుగు పడుతుందో చూడాలి. ప్రస్తుతానికయితే.. జగన్ ప్రయోగం ప్రకాశం జిల్లాలో మరింత గందరగోళం సృష్టించిందనే చెప్పాలి.
టాప్ హెడ్ లైన్స్
ట్రెండింగ్ వార్తలు
