Abhinandan Varthaman Update: భారత్‌పై పాక్ అక్కసు.. విమానం ఏం కూలలేదట..! అభినందన్ ఏం చేయలేదట!

కెప్టెన్ అభినందన్ వర్ధమాన్‌కు వీర్ చక్ర పురస్కారం దక్కిన తర్వాత భారత్‌పై పాకిస్థాన్ అక్కసు వెళ్లగక్కింది.

భారత్‌పై పాక్ అక్కసు

పాకిస్థాన్ మళ్లీ పాత పాటే పాడింది. దేని గురించి అనుకుంటున్నారా? ఇటీవల కెప్టెన్ అభినందన్ వర్ధమాన్‌కు 'వీర్‌ చక్ర' పురస్కారాన్ని భారత ప్రభుత్వం అందించడంపై పాకిస్థాన్ విషం కక్కింది. 2019 ఫిబ్రవరిలో పాకిస్థాన్​కు చెందిన యుద్ధ విమానం ఎఫ్​​-16ను తాము కూల్చివేశామని భారత్ చేస్తోన్న వ్యాఖ్యలను పాకిస్థాన్ ఖండించింది. ఇది నిరాధారమని ఆరోపించింది. ఈ మేరకు ఆ దేశ విదేశాంగ కార్యాలయం ఓ ప్రకటన విడుదల చేసింది.

" 2019 ఫిబ్రవరిలో పాకిస్థాన్​కు చెందిన ఎఫ్​-16 యుద్ధవిమానాన్ని తమ పైలట్​ కూల్చివేశాడని భారత్ చేస్తోన్న వాదన నిరాధారం. దీనిని పాకిస్థాన్ ఖండిస్తోంది. ఆరోజు ఎలాంటి విమానం నేలకూలలేదని అంతర్జాతీయ నిపుణులు, అమెరికా అధికారులు ఇదివరకే స్పష్టం చేశారు.​ భారత పైలట్​ను ఆరోజు పాక్​ విడుదల చేయడం శాంతి కాముక దేశంగా పాకిస్థాన్ వైఖరికి నిదర్శనం.                                                     "

-పాకిస్థాన్ విదేశాంగ కార్యాలయం

పాకిస్థాన్‌తో జరిగిన వాయు ఘర్షణలో అభినందన్​ చూపిన శౌర్యానికి 'వీర్ చక్ర' పురస్కారంతో కేంద్రం సత్కరించింది. రాష్ట్రపతి రామ్ నాథ్ కోవింద్ చేతుల మీదుగా ఆయన సోమవారం ఈ పురస్కారాన్ని అందుకున్నారు. 

బాలాకోట్ ఉగ్రవాద శిబిరాలపై భారత వాయుసేన దాడుల తర్వాత.. 2019, ఫిబ్రవరి 27న  భారత్, పాక్  మధ్య జరిగిన ఘర్షణలో అభినందన్ ధైర్యసాహసాలు చూపించారు. పాక్ వైమానికదళంతో వీరోచితంగా పోరాడి దాయాదుల ఎఫ్-16 యుద్ధ విమానాన్ని కుప్పకూల్చారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి