Heart Attack: గర్భనిరోధక మాత్రలు అతిగా వాడే మహిళలు గుండెపోటుకు గురయ్యే అవకాశం ఎక్కువ

మహిళల కంటే పురుషులకు గుండెపోటు వచ్చే అవకాశాలు రెండింతలు ఎక్కువని గతంలో చేసిన చాలా అధ్యయనాలు చెప్పాయి. అయితే మెట్రోపాలిటన్ నగరాల్లో నివసిస్తున్న మహిళలు కూడా అధికంగా గుండెపోటుకు గురవుతున్నారు. మహిళల్లో పెరుగుతున్న గుండెపోటు కేసులుపై అధ్యయనాలు సాగుతున్నాయి. ఇలా మహిళల్లో గుండెపోటు పెరగడానికి ప్రధాన కారణాలను వైద్యులు వివరిస్తున్నారు. మెట్రోపాలిటన్ నగరాల్లో నివసించే మహిళలు ఎక్కువగా ధూమపానం చేస్తున్నారు. ఒత్తిడిని తగ్గించుకోవడానికి వారు ధూమపానాన్ని ఎంచుకున్నారు. ఉద్యోగ ప్రపంచంలో కలిగే ఒత్తిడి, కుటుంబ ఒత్తిడిని తగ్గించుకునేందుకు వారు ధూమపానానికి, మద్యపానానికి అలవాటు పడుతున్నట్టు అధ్యయనాలు చెబుతున్నాయి. ఇలా ధూమపానం చేసే మహిళల్లో గుండె పోటు వచ్చే అవకాశాలు ఎక్కువ. అలాగే గర్భనిరోధక మాత్రలు అధికంగా వాడే మహిళల్లో కూడా గుండెపోటు వచ్చే అవకాశం ఎక్కువగా ఉన్నట్టు తెలుస్తోంది.

పురుషులతో పోలిస్తే మహిళల్లో గుండెపోటు లక్షణాలు కాస్త భిన్నంగా ఉంటాయి. వారికి ఎడమవైపు ఛాతీ నొప్పి రాకపోవచ్చు. దానికి బదులుగా భుజాలలో నొప్పి రావడం, దవడలు నొప్పిగా అనిపించడం, చేతులకు రెండు వైపులా నొప్పి రావడం, విపరీతంగా చెమట పట్టడం వంటివి జరుగుతాయి. ఒకప్పుడు పురుషులకు గుండెపోటు వచ్చే అవకాశం ఎక్కువ అని చెప్పిన విషయం నిజమే కానీ ఇప్పుడు పురుషులు, మహిళలు ఇద్దరూ సమానంగా గుండె జబ్బుల ప్రమాదంలో ఉన్నారు. కాకపోతే మహిళలు గుండెపోటుకు తక్కువ గురవ్వడానికి కారణం వారి శరీరంలో ఉండే ఈస్ట్రోజన్ హార్మోన్లు. ఈస్ట్రోజన్ హార్మోన్లలో సమతుల్యత దెబ్బ తింటే వారిలో కూడా గుండెపోటు వచ్చే అవకాశం పెరుగుతుంది. మహిళల జీవన శైలిలో మార్పు రావడం, పని ఒత్తిడి పెరగడం, వర్క్ లైఫ్ బ్యాలెన్స్ లేకపోవడం, జంక్ ఫుడ్ అలవాట్లు పెరగడం, వ్యాయామం చేయకపోవడం, ధూమపానం ఇవన్నీ కూడా మహిళల్లో గుండెపోటు పెరగడానికి కారణం అవుతున్నాయి. మహిళలు జీవితంలో ఒత్తిడిని తగ్గించుకొని, విశ్రాంతి తీసుకుంటే మంచిదని సూచిస్తున్నారు వైద్యులు. మానసిక ఆరోగ్యం పై కూడా శ్రద్ధ పెట్టాలని చెబుతున్నారు. మానసిక ఆరోగ్యం బాగుంటే శారీరక ఆరోగ్యం కూడా చక్కగా ఉంటుంది. దీనివల్ల గుండెపోటు వంటివి వచ్చే అవకాశం తగ్గుతుంది.

గుండెకు మేలు చేసే ఆహారాన్ని అధికంగా తింటూ ఉండాలి. చేపలు, ఆకుపచ్చని కూరగాయలు, టొమాటోలు వంటివి అధికంగా తినాలి. చేపల్లో ఒమేగా 3 ఫ్యాటీ ఆమ్లాలు పుష్కలంగా ఉంటాయి. ఇవి గుండెకు మేలు చేస్తాయి. స్ట్రాబెర్రీలు, నట్స్, డార్క్ చాక్లెట్లు వంటివి అధికంగా తింటే మంచిది.  

Also read: ఈ నల్ల కోడిమాంసాన్ని తింటే మంచి రుచే కాదు, ఎంతో ఆరోగ్యం కూడా