Curd Poha: పొయ్యి వెలిగించకుండా చిటికెలో చేసుకునే బ్రేక్‌ఫాస్ట్ ఇదే! రుచి, ఆరోగ్యం, ఆదాయం మూడు గుణాల అటుకుల పెరుగు!

Curd Poha: ఇరాన్‌, అమెరికా, ఇజ్రాయెల్ యుద్ధం కారణంగా గ్యాస్ కష్టాలు మొదలయ్యాయి. అందుకే పొయ్యి వెలిగించకుండానే ఉదయం కుటుంబమంతా ఆరగించే బ్రేక్‌ఫాస్ట్ గురించి చూద్దాం. 

పొయ్యి వెలిగించకుండా చిటికెలో చేసుకునే బ్రేక్‌ఫాస్ట్ ఇదే! రుచి, ఆరోగ్యం, ఆదాయం మూడు గుణాల అటుకుల పెరుగు!

Source : freepik

Show Quick Read

Key points generated by AI, verified by newsroom

• గ్యాస్ కొరత నేపథ్యంలో స్టవ్ వాడకుండా పెరుగు అటుకులు తయారుచేయండి.
• ఐదు నిమిషాల్లో తయారయ్యే రుచికరమైన, ఆరోగ్యకరమైన బ్రేక్‌ఫాస్ట్ ఆప్షన్.
• జీర్ణక్రియకు మేలుచేసి, ఎముకలను బలపరిచే పోషకాలు కలిగి ఉంటుంది.
• శరీరానికి శక్తినిచ్చి, వేసవిలో చల్లదనాన్ని అందించే అద్భుత వంటకం.

Curd Poha: ఉదయం లేచిన దగ్గర నుంచి మొదలు రాత్రి డిన్నర్ వరకు పొయ్యి వెలిగించదని ఏ ఫుడ్ రెడీ కాదు. అయితే ఇప్పుడు పరిస్థితులు అంత అనుకూలంగా లేవు. ఇరాన్‌పై అమెరికా, ఇజ్రాయెల్ జరుపుతున్న దాడులు కారణంగా గ్యాస్ కొరత ఏర్పడుతోంది. దీంతో గ్యాస్ కష్టాలు మొదలయ్యాయి. అందుకే గ్యాస్‌తో పని లేకుండా పొయ్యి వెలిగించకుండా చేసుకునే బ్రేక్‌ఫాస్ట్‌ గురించి తెలుసుకుందాం. 

చాలా మంది గ్యాస్ కొరత కారణంగా బ్రేక్‌ఫాస్ట్‌ను స్కిప్ చేస్తున్నారు. అయితే ఇది ప్రమాదం. అందుకే ఖాళీ కడుపుతో ఉండటం కంటే ఆరోగ్యకరమైన బ్రేక్‌ఫాస్ట్‌ను సింపుల్‌గా స్టౌవ్ వెలిగించకుండానే చేసుకోవచ్చు. కేవలం ఐదు నిమిషాల్లో తయారయ్యే ఎంతో రుచికరమైన , ఆరోగ్యకరమైన పెరుగు అటుకులు(Curd Poha) గురించి చూద్దాం. 

పెరుగు అటుకులు చేయటానికి కావాల్సిన పదార్థాలు 

ఈ వంటకానికి కావాల్సిన వి ఇంట్లో ఉండేవే. 

• అటుకులు- ఒక కప్పు(పలచనివి అయితే మంచిది)
• పెరుగు- ఒక కప్పు
• క్యారెట్ తురుము- రెండు టేబుల్ స్పూన్లు
• పచ్చిమిర్చి- ఒకటి చాలు 
• కొత్తిమీర- కొద్దిగా చాలు 
• ఉప్పు- తగినంత
• క్రిస్పీ టచ్‌ కోసం - పల్లీలు లేదా మిక్చర్‌
• ఫ్లేవర్‌ కోసం - అర టీ స్పూన్‌ నిమ్మరం(ఇష్టమైతే వేసుకోవచ్చు లేదంటే స్కిప్ చేయవచ్చు)

తయారీ విధానం 

మొదట అటుకులను ఒక గిన్నెలోకి తీసుకొని నీటితో కడగాలి. నీటిని పూర్తిగా వడకట్టి రెండు నుంచి మూడు నిమిషాల పాటు పక్కన పెట్టుకోవాలి. ఇలా చేయడం వల్ల అటుకులు మెత్తగా, మృదువుగా తయారవుతాయి. తర్వాత ఒక బౌల్‌ తీసుకొని అందులో నానిన అటుకులను వేయాలి. అందులో ఒక కప్పు పెరుగు, తగినంత ఉప్పు వేసి బాగా కలపాలి. ఇప్పుడు ఇందులో ముందుగా తురిమి పెట్టుకున్న క్యారెట్, సన్నగా తరిమిన పచ్చి మిర్చి ముక్కలు , కొత్తిమీర వేసుకోవాలి. చివరగా వడ్డించే ముందు పైన కొద్దిగా పల్లీలు, లేదా మిక్చర్‌ చల్లితే, తినేటప్పుడు కరకరలాడుతుంది. చాలా రుచిగా ఉంటుంది. కొంచెం పులుపు ఇష్టపడేవారు కొద్దిగా నిమ్మరసం కూడా కలుపుకోవచ్చు. 

మరింత రుచి కోసం చిన్న చిట్కాలు 

ఈ పెరుగు అటుకులు ఇంకా వెరైటీగా మార్చుకోవాలని అనుకుంటే అందులో కొన్ని దానిమ్మ గింజలు లేదా దోసకాయ ముక్కలు కూడా కలుపుకోవచ్చు. దీని వల్ల రుచి పెరగడమే కాకుండా మరిన్ని విటమిన్లు శరీరానికి అందుతాయి. 

పెరుగు అటుకులు తినడం వల్ల కలిగే ప్రయోజనం

ఇది కేవలం కడుపు నింపే ఆహారం మాత్రమే కాదు, దీని వెనుక ఆరోగ్యం రహస్యాలు ఉన్నాయి. అటుకులు, పెరుగు రెండు కూడా జీర్ణవ్యవస్థకు మేలు చేస్తాయి. తిన్న తర్వాత భారంగా అనిపించదు. పెరుగులో ఉండే కాల్షియం, ప్రోటీన‌‌ వల్ల ఎముకలు బలంగా తయారవుతాయి. ఇది పెరుగుతున్న పిల్లలకు చాలా మంచిది. ఉదయం పూట ఈ బ్రేక్‌ఫాస్ట్ తింటే శరీరానికి వెంటనే శక్తి లభిస్తుంది. రోజంతా ఉత్సాహంగా ఉండేలా చేస్తుంది. ముఖ్యంగా వేసవి కాలంలో పెరుగు అటుకులు తినడం వల్ల శరీరానికి చల్లదనం లభిస్తుంది. ఎండ వల్ల వచ్చే నీరసం తగ్గుతుంది.